ၾၢႆႇၽွင်းငမ်း ဢိူင်ႇၵွင်းၵႄး ႁူဝ်ပိုၵ်ႉ ၸႄႈဝဵင်းလႃႈသဵဝ်ႈဢဝ်လိၼ်ၵူၼ်းမိူင်းၶၢႆ ၊ ၵူၼ်းမိူင်းဢမ်ႇလႆႈၸႂ် တၢင်ႇလိၵ်ႈယွၼ်းတၢင်းၸွႆႈတီႈလုမ်းၵွၼ်းၸႄႈဝဵင်းၵေႃႈ ဢမ်ႇၸွႆႈၵႄႈလိတ်ႈပၼ်သင်သေဢမ်ႇၵႃး ၽူႈၵွၼ်းဢိူင်ႇယင်းဢဝ်ႁႅင်းသိုၵ်းမၢၼ်ႈၶဝ်ႈမႃးလွၵ်ႇငိုတ်ႈၵူၼ်းဝၢၼ်ႈထႅင်ႈလူးၵွၼ်ႇ ။
ၵူၼ်းဝၢၼ်ႈၼႃးမူၼ်း ဢႃယု 50 ပၢႆၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ -“မၼ်းမႃးဢဝ်တီႈလိၼ်ၵူၼ်းဝၢၼ်ႈ ဝၢၼ်ႈၼႃးမူၼ်းၶၢႆဢေႃႈ။ ၵူၼ်းဝၢၼ်ႈဢမ်ႇၽွမ်ႉဢမ်ႇလႆႈၸႂ် ၵႂႃႇသၢၼ်ၶတ်းယူႇၵေႃႈ မၼ်းဢမ်ႇထွမ်ႇ။ ၸႂ်ႉဢႃႇၼႃႇမၼ်းသေ ယိုတ်းတီႈလိၼ်ၽုင်ႇၵူၼ်းဝၢၼ်ႈၼႃးမူၼ်း၊ ပေႃးယဝ်ႉဢဝ်ၶၢႆ။ မၼ်းၸႂ်ႉဢႃႇၼႃႇပေႉၵိၼ်ၵူၼ်းဝၢၼ်ႈၼႆႉၼမ်ၼႃႇယဝ်ႉၶႃႈ။ ပေႃးၵူၼ်းဝၢၼ်ႈၶႂ်ႈၶၢႆလိၼ်ၸဝ်ႈၵဝ်ႇသေ ၵႂႃႇၸႂ်ႉမၼ်းလူင်းလၢႆးမိုဝ်းပၼ် သမ်ႉဢမ်ႇလူင်းပၼ် ႁဵတ်းၼႆၶႃႈဢေႃႈၼၼ်ႉ ”- ဝႃႈၼႆ။
ၵွၼ်းဢိူင်ႇၵွင်းၵႄးၼႆႉ ႁွင်ႉဢဝ်သိုၵ်းမၢၼ်ႈၶဝ်ႈဝၢၼ်ႈမႃးသေ မႃးၼႄဢဵၼ်ႁႅင်း လွၵ်ႇငိုတ်ႈၵူၼ်းဝၢၼ်ႈထႅင်ႈလူးၵွၼ်ႇ ဝႃႈၼႆ။
“မိူဝ်ႈလိူၼ်ပူၼ်ႉမႃးၼႆႉၵူၺ်းႁဝ်းၶႃႈၵူၼ်းဝၢၼ်ႈဢွၼ်ၵၼ်ၵႂႃႇတၢင်ႇလိၵ်ႈတီႈလုမ်းၵွၼ်းၸႄႈဝဵင်း၊ ႁႂ်ႈၵူတ်ႇထတ်းတူၺ်းသေ ႁၢမ်ႈပၼ်လွင်ႈဢၼ်ၵူၼ်းဝၢၼ်ႈထုၵ်ႇပူၼ်ႉပႅၼ်သုၼ်ႇလႆႈ ၊ လွင်ႈဢၼ်ၵူၼ်းဝၢၼ်ႈၺႃးလွင်ႈဢမ်ႇတြႃး ၼၼ်ႉၼႆ။ ၾၢႆႇၸႄႈဝဵင်းယင်းပႆႇတွပ်ႇမႃးဝႃႈႁိုဝ် မၼ်းပေႃးၵႂႃႇႁွင်ႉသိုၵ်းမၢၼ်ႈလူင်မႃးၼႂ်းဝၢၼ်ႈယဝ်ႉၶႃႈၼႃႇ ”- ၵူၼ်းဝၢၼ်ႈၼႃးမူၼ်းလၢတ်ႈၼင်ႇၼႆ။
ယၢမ်းလဵဝ်ၼႆႉ လိၼ်ၽုင်ႇၵူၼ်းဝၢၼ်ႈၼႃးမူၼ်း 60 ထတ်းပၼ်ႇမူၼ်း 2 လွၵ်းတႄႉ ၵွၼ်းဢိူင်ႇၶၢႆပႅတ်ႈယဝ်ႉ ၵူၼ်းဝၢၼ်ႈလၢတ်ႈၼင်ႇၼႆ။
လိူဝ်သေတီႈလိၼ်ၵူၼ်းဝၢၼ်ႈၵွင်းၵႄးယဝ်ႉ ဢၼ်ပဵၼ်တီႈလိၼ်ၵူၼ်းဝၢၼ်ႈၽၢႆလူင်၊ ဝၢၼ်ႈၵွင်းတပ်ႉ၊ ဝၢၼ်ႈၵုင်းၸူင်၊ ဝၢၼ်ႈၵွင်းၵႄး ၸိူဝ်းၼႆႉၵေႃႈၺႃးၵွၼ်းဢိူင်ႇတတ်းၶၢႆမိူၼ်ၵၼ် ၵူၼ်းဝၢၼ်ႈၼႃးမူၼ်းၼၼ်ႉသိုပ်ႇလၢတ်ႈထႅင်ႈၼင်ႇၼႆ။
ၵွၼ်းဢိူင်ႇၵေႃႉၼႆႉ ၵူၼ်းဝၢၼ်ႈၵႂႃႇယွၼ်းဝႂ်ၵမ်ႉၵဵဝ်ႇၵပ်းလွင်ႈၶူဝ်ႊဝိတ်ႉ တႃႇၵႂႃႇဝဵင်းၼႆၵေႃႈ ဢၼ်ဢမ်ႇလူင်းလၢႆးမိုဝ်းပၼ်ၵေႃႈၺႃးၼမ် ၵူၼ်းဝၢၼ်ႈထူပ်းတၢင်းယၢပ်ႇၽိုတ်ႇတႄႉတႄႉဝႃႈၼႆ။
လွင်ႈတၢင်းယၢပ်ႇၽိုတ်ႇၸိူဝ်းၼႆႉၵူၼ်းဝၢၼ်ႈၵႂႃႇတၢင်ႇတီႈလုမ်းၸႄႈဝဵင်းဝႆႉလၢႆလၢႆၵမ်းယူႇၵေႃႈဢမ်ႇလူင်းၸွႆႈထႅမ်ၵႄႈလိတ်ႈပၼ်ၵူၼ်းဝၢၼ်ႈ လႆႈႁူႉၼင်ႇၼႆ။