ၼႂ်းၶၢဝ်းတၢင်းလိူၼ်သွင်လိူၼ်မႃးၼႆႉ ၼႂ်းၸႄႈဝဵင်းမူႇၸေႊ မီးၽူႈလၵ်ႉၵူၼ်းၸူၼ်လိူင်ႇၼမ် ရူတ်ႉၵႃး ၵူၼ်းမိူင်း ၺႃးလၵ်ႉ ၵူႈဝၼ်း ဢမ်ႇမီးလွင်ႈႁူမ်ႇလူမ်ႈသေဢိတ်း လႆႈႁူႉၼင်ႇၼႆ ။
မိူဝ်ႈၼႆႉ ဝၼ်းတီႈ 21/12/2021 ယၢမ်းၵၢင်ၼႂ် မွၵ်ႈ 2 မူင်း ရူတ်ႉၵႃး ၵူၼ်းပွၵ်ႉၸၢၼ်း လမ်းၼိုင်ႈ ၵိုတ်းဝႆႉတင်းၼႃႈ ႁိူၼ်း ၺႃးလၵ်ႉ တီႈၸႄႈဝဵင်းမူႇၸေႊ ၸိုင်ႈတႆး ပွတ်းႁွင်ႇ ။
ၵူၼ်းပွၵ်ႉၸၢၼ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ၵၢင်ၼႂ် မွၵ်ႈ 1 မူင်းၶိုင်ႈ ၸမ် 2 မူင်းၼႆႉ ရူတ်ႉၵႃး ၵူၼ်းဝၢၼ်ႈႁဝ်းၶႃႈ လမ်း ၼိုင်ႈ ထုၵ်ႇလၵ်ႉၵႂႃႇ။ ၵႃးၼႆႉ ၵိုတ်းဝႆႉ တီႈၼႃႈႁိူၼ်းၵူၺ်းၶႃႈဢေႃႈ။ ၼႂ်းၶၢဝ်းတၢင်းလိူၼ်သွင်လိူၼ်မႃးၼႆႉ ၽူႈလၵ်ႉၵူၼ်းၸူၼ်ၼႆႉ ၼမ်တႄႉၶႃႈ ဢေႃႈ။ ရူတ်ႉၵႃးၼႆႉ ႁၢႆၵူႈဝၼ်း ၼိုင်ႈဝၼ်း 3-4 လမ်း လႆႈငိၼ်းယူႇၵူႈဝၼ်းၶႃႈဢေႃႈ။ မိူဝ်ႈဝၼ်းတီႈ 7 ပူၼ်ႉမႃးသမ်ႉ တီႈပွၵ်ႉၸၢၼ်းၼႆႉၵူၺ်းၼင်ႇၵဝ်ႇ၊ ၵူၼ်းလၵ်ႉဢၢၼ်းမႃးလၵ်ႉၵႃးပိူၼ်ႈ။ ၸဝ်ႈႁိူၼ်းတၼ်းႁူႉသေလႄႈ ႁွင်ႉၵူၼ်းႁိမ်းႁွမ်းၸွႆႈ ။ ဢမ်ႇတၼ်းလႆႈလၵ်ႉၶႃႈ။ ၽူႈလၵ်ႉၵေႃႈ ဢမ်ႇတၼ်းတီႉလႆႈ”- ဝႃႈၼႆ။
ၼႂ်းလိူၼ်ၼႆႉၵူၺ်း ႁိူၼ်းၵူၼ်းဝၢၼ်ႈ ႁိမ်းႁေႃၼႃႇလီႇ ၵၢင်ဝဵင်းမူႇၸေႊၼၼ်ႉၵေႃႈ မီးၵူၼ်းလၵ်ႉၶဝ်ႈႁိူၼ်း ဢဝ်ၵႂႃႇရူတ်ႉၶိူင်ႈလမ်းၼိုင်ႈ ၼႆယဝ်ႉ။
“ပူၼ်ႉမႃးလၢႆဝၼ်းၼႆႉၵေႃႈ တီႈႁိမ်းႁေႃၼႃႇလီႇၵၢင်ဝဵင်း ၵေႃႈ ၺႃးၵူၼ်းလၵ်ႉၶဝ်ႈဢဝ်ရူတ်ႉၶိူင်ႈ သႅၼ်းSCOOPY လမ်းၼိုင်ႈၼင်ႇၵဝ်ႇ ။ မၢင်ပွၵ်ႈမႃးၵူၼ်းလၵ်ႉ ၸိူဝ်းၼႆႉ လၵ်ႉရူတ်ႉၵူၺ်းဢမ်ႇၵႃး ပၢႆဢဝ်မိတ်ႈငႃၸဝ်ႈႁိူၼ်းသေ ၸူၼ်လိပ်း ၸိူဝ်းၼႆႉပႃးဢေႃႈ ။ လွင်ႈႁူမ်ႇလူမ်ႈတႃႇၵူၼ်းမိူင်းတႄႉ ယႃႇပေထၢမ်ယဝ်ႉၶႃႈ မၼ်းဢမ်ႇမီးသင် သေဢိတ်းယဝ်ႉ တီႈမူႇၸေႊၼႆႉ”- ၵူၼ်းပိုၼ်ႉတီႈမူႇၸေႊ သိုပ်ႇ လၢတ်ႈၼႄ ၼင်ႇၼႆ။
ၼႂ်းဝဵင်းမူႇၸေႊၼႆႉ ပၢင်တေႃႇလွင်းၵေႃႈလိူင်ႇၼမ် မႃးလိူဝ်ၵဝ်ႇ ။ ပိုတ်ႇလဵၼ်ႈ တေႃႇၵၼ် ထၢင်ႇႁၢင်ႈလွတ်ႈလႅဝ်း။ ယႃႈမဝ်းၵမ် ၸိူဝ်းၼႆႉၵေႃႈ ၶႅၼ်းၼမ် ။ ဢမ်ႇမီးၸဝ်ႈၼႃႈတီႈ ပလိၵ်ႈယေးၶဝ် လိုပ်ႈလမ်းတီႉၺွပ်းသေပွၵ်ႈ – တင်ႈၸႂ်ပွႆႇႁႂ်ႈဝၢၼ်ႈမိူင်းသုၵ်ႉယုင်ႈဢူၼ်ၵဝ်းၵူၺ်း ၵူၼ်းပိုၼ်ႉတီႈလၢတ်ႈၼင်ႇၼႆ။
