ၵူၼ်းလႅၵ်ႈငိုၼ်း သွင်ၵေႃႉ ၼႂ်းၵၢင်ဝဵင်းမူႇၸေႊ ၺႃးၸူၼ် ၵေႃႉပဵၼ်ၽူႈၸၢႆး တိူဝ်ႉၺႃးမၢၵ်ႇၵွင်ႈသွင်ႁွႆး မၢတ်ႇၸဵပ်း ဝႃႈၼႆ။
မိူဝ်ႈဝႃး ဝၼ်းတီႈ 20/12/2021 ယၢမ်းႁူဝ်ၶမ်ႈ မွၵ်ႈ 6 မူင်းၶိုင်ႈ ၵူၼ်းလႅၵ်ႈငိုၼ်း သွင်ၵေႃႉ တီႈႁူဝ်ၵၢတ်ႇ ၼႂ်းၵၢင်ဝဵင်း ႁိမ်းႁေႃၼႃႇလီႇ ၼႂ်း ဝဵင်းမူႇၸေႊ ၸိုင်ႈတႆးပွတ်းႁွင်ႇ ထုၵ်ႇၵူၼ်းႁၢႆႉ ၶဝ်ႈၸူၼ် သုမ်းငိုၼ်းတင်းၼမ် ၽူႈၸၢႆးၵေႃႉလႅၵ်ႈငိုၼ်း ၵေႃႉၼိုင်ႈ ၺႃးယိုဝ်း သွင်ႁွႆး ။
ၵူၼ်း မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၵူၼ်းလႅၵ်ႈငိုၼ်း သွင်ၵေႃႉ ၺႃးၸူၼ် တီႈႁူဝ်ၵၢတ်ႇ ၵၢင်ဝဵင်းၼႆႉၶႃႈ။ ၵူၼ်း လႅၵ်ႈငိုၼ်းၼၼ်ႉ တေမီး 2 ၵေႃႉ ၽူႈၸၢႆးၵေႃႉၼိုင်ႈ ၼၢင်းယိင်းၵေႃႉၼိုင်ႈ။ ၵေႃႉပဵၼ်ၽူႈၸၢႆးၼၼ်ႉ မၢၵ်ႇၵွင်ႈသႅတ်ႈၵွင်ႇၵေႃႈမၼ်းၵႂႃႇႁွႆး ၼိုင်ႈလႄႈ တီႈၵွင်းလင် ႁွႆးၼိုင်ႈၶႃႈ”- ဝႃႈၼႆ။
ၵူၼ်းႁၢႆႉၸုမ်းၼႆႉ ၶီႇၵႃးမႃးၸွမ်းၵၼ်လမ်းၼိုင်ႈ၊ ဢဵၼ်ႁႅင်းၵူၼ်းမီးမွၵ်ႈ 5 ၵေႃႉ၊ ၶဝ်ႈႁၢၼ်ႉမႃးဢဝ်ၵွင်ႈၸမ်ႈသေ ၸူၼ်ဢဝ်ငိုၼ်းၵႂႃႇ ။
“လႆႈႁူႉဝႃႈ ၵူၼ်းၸူၼ်ၼၼ်ႉ လႆႈငိုၼ်းၵႂႃႇထူင်ၼိုင်ႈၼႆၶႃႈ။ ပႃးၵႂႃႇၵႃႈႁိုဝ်တႄႉၵေႃႈ ဢမ်ႇလႆႈႁူႉၶႃႈ။ ယဝ်ႉၵေႃႈ ပဵၼ်ငိုၼ်းၶႄႇႁႃႉ ငိုၼ်းမၢၼ်ႈႁႃႉၵေႃႈ ဢမ်ႇႁူႉ ဢၼ်လႆႈၵႂႃႇၼၼ်ႉ။ ၵမ်ႈၼမ် ၵူၼ်းလႅၵ်ႈငိုၼ်းၶဝ် တေသႂ်ႇႁူမ်ႈၵၼ် ငိုၼ်းၶႄႇတင်းငိုၼ်းမၢၼ်ႈဝႆႉ။ ၵူၼ်းၸူၼ် ၼၼ်ႉ ပေႃးလႆႈ ငိုၼ်းယဝ်ႉၵေႃႈ ႁေႃႈၵႃးပၢႆႈၵမ်းလဵဝ်”- ၵူၼ်းပိုၼ်ႉတီႈ မူႇၸေႊ သိုပ်ႇလၢတ်ႈၼႄၼင်ႇၼႆ။
ၵူၼ်းလႅၵ်ႈငိုၼ်း သွင်ၵေႃႉ ၺႃးၸူၼ်ၼၼ်ႉ ပဵၼ်ၵူၼ်းပွၵ်ႉၼိူဝ် ။ ၵူၼ်း ၸူၼ်ၼၼ်ႉပဵၼ်ၽႂ် ပဵၼ်ၸုမ်းလႂ် ဢမ်ႇႁူႉ လႆႈႁူႉၼင်ႇၼႆ။
ပူၼ်ႉမႃး မိူဝ်ႈဝၼ်းတီႈ 25/8/2021 ယၢမ်းၵၢင်ၼႂ်မွၵ်ႈ 10 မူင်း ၼၼ်ႉၵေႃႈ ၼၢင်းယိင်း ၵေႃႉၼိုင်ႈ ဢႃယုမွၵ်ႈ 40 ပၢႆ ၺႃးၵူၼ်းၸူၼ်ၽၼ်းမိုဝ်းၾၢႆႇၶႂႃ၊ ႁိမ်းႁူင်းႁႅမ်း သူၺ်ႇၼၵႃး ဝၢၼ်ႈၵွင်းမူးလွႆ ပွၵ်ႉၵွင်းမူးတူင်ႈ ၸႄႈဝဵင်းမူႇၸေႊၼၼ်ႉ ၺႃးၸူၼ်ဢဝ်ငိုၼ်းၵႂႃႇ၊ မၼ်းၼၢင်းၵေႃႈ မၢတ်ႇၸဵပ်း ႁၢဝ်ႈႁႅင်း။
မိူဝ်ႈဝၼ်းတီႈ 26/2/2020 ၼၼ်ႉၵေႃႈ ၼၢင်းဢေမီး ၵူၼ်းလႅၵ်ႈငိုၼ်းၶႄႇ-မၢၼ်ႈ ဢွင်ႈတီႈလႅၵ်ႈ ပွၵ်ႉၵၢတ်ႇ ၸႄႈဝဵင်းမူႇၸေႊ ၸိုင်ႈတႆးပွတ်း ႁွင်ႇၼၼ်ႉ ၺႃးၽူႈၸၢႆး 4 ၵေႃႉ ဢဝ်မိတ်ႈငႃသေ ၸူၼ်ဢဝ် ငိုၼ်းၵႂႃႇ 100 သႅၼ်ပၢႆ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ