တႄႇဢဝ်မိူဝ်ႈၽုၵ်ႈ ဝၼ်းတီႈ 21/12/2021 ၼႆႉၵႂႃႇ ၵၢတ်ႇတႃႈၼမ်ႉ တီႈဝၢၼ်ႈလူင်ႁၢႆးယႃႈ (ဟဲယာရွာမ)ၼႂ်းၼွင်ႁၢႆးယႃႈ ၸႄႈဝဵင်းယွင်ႁူၺ်ႈ ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း တေၶိုၼ်းပိုတ်ႇယဝ်ႉ ဝႃႈၼႆ။
ၵူၼ်းၼႂ်း ၼွင်ႁၢႆးယႃႈ လၢတ်ႈတီႈၽူႈတွႆႇႁွၵ်ႈဝႃႈ – “တေတႄႇပိုတ်ႇမိူဝ်ႈၽုၵ်ႈ ဝၼ်းတီႈ 21 ၼႆႉၵႂႃႇၶႃႈဢေႃႈ။ ၶဝ်တႄႉဝႃႈ တေႁဵတ်းၸွမ်းမၢႆ မီႈဢၼ်ၾၢႆႇပၢႆးယူႇလီတမ်းဝၢင်းဝႆႉၼႆၶႃႈ။ ၸဵမ်မိူဝ်ႈတၢင်းပဵၼ်ၶူဝ်ႊဝိတ်ႉၽႄႈလၢမ်းပွၵ်ႈ 2 ၼၼ်ႉသေ ဝၢႆးသိုၵ်းမၢၼ်ႈယိုတ်းမိူင်းယိုတ်းဢႃႇၼႃႇမႃး ႁၢၼ်ႉတေႃႇထိုင်ယၢမ်းလဵဝ် ပႆႇပိုတ်ႇၶႃႈ”- ဝႃႈၼႆ။
လွင်ႈတေပိုတ်ႇၵၢတ်ႇၶိုၼ်းၼႆႉ မီးလွင်ႈမႆႈၸႂ်ၶူဝ်ႊဝိတ်ႉယူႇသေတႃႉ ယူႇတီႈၵူၼ်းၶၢႆလႄႈ ၵူၼ်းႁေႃႈႁိူဝ်းၶဝ်တႄႉ ႁူမ်ၸူမ်းယူႇ၊ ယွၼ်ႉဝႃႈ လႆႈၵိုတ်းၵၢၼ်ဝႆႉႁိုင်ယဝ်ႉသေ ယၢမ်းလဵဝ်သမ်ႉတေမီးၵၢၼ်ၶဝ်ႈမႃးၶိုၼ်းလႄႈ တႃႇ ႁႃၵိၼ်လဵင်ႉတွင်ႉၵေႃႈ တေငၢႆႈမႃး ဝႃႈၼႆ။
ၵၢတ်ႇတႃႈၼမ်ႉ ၼႂ်းၼွင်ႁၢႆးယႃႈၼႆႉသမ်ႉ ပဵၼ်တီႈၵူၼ်းၼွၵ်ႈမိူင်း ၵူၼ်းတၢင်ႇဝၢၼ်ႈ တၢင်းဝဵင်း ၶဝ်ႈမႃးဢႅဝ်ႇလႄႇၼမ်လႄႈ လွင်ႈ လွမ်မႆႈၸႂ် ၵဵဝ်ႇလူၺ်ႈတၢင်းပဵၼ် ၶူဝ်ႊဝိတ်ႉ 19 ၵေႃႈတိုၵ်ႉမီးယူႇႁင်းၽႂ်မၼ်းဝႃႈၼႆ။
“ ၵၢတ်ႇတႃႈၼမ်ႉၼႆႉ ၵမ်ႈၼမ်ပဵၼ်ၵူၼ်းတၢင်ႇတီႈတၢင်ႇလႅၼ်မႃးဢႅဝ်ႇၼမ်။ ၵူၺ်းၵႃႈ မိူဝ်ႈလဵဝ်သမ်ႉ တၢင်းပဵၼ်ၵေႃႈတိုၵ်ႉမီးယူႇၼႆလႄႈ ပေႃးၵူၼ်းတၢင်းၼွၵ်ႈၶဝ်ႈမႃးၼမ် ၵူၼ်းလၢႆတီႈ လၢႆတၢင်းမႃးၼမ် ၸိူင်ႉၼၼ်ႉၵေႃႈ လႆႈမႆႈၸႂ်လွင်ႈတၢင်းပဵၼ် ယူႇၶႃႈ။ မိူဝ်ႈလဵဝ်သမ်ႉ ၵူၼ်းမိူင်းၵမ်ႈၼမ်ၵေႃႈ ဢမ်ႇပေႃးၸွမ်းမၢႆမီႈ။ ယၢမ်းလဵဝ် တၢင်းပဵၼ်လူတ်းယွမ်းမႃးယဝ်ႉသေတႃႉ ဢမ်ႇၸႂ်ႈဝႃႈ ဢမ်ႇမီး ၵူၼ်းတိတ်းၸပ်းသေဢိတ်းဢမ်ႇၸႂ်ႈ တိုၵ်ႉမီးၵူၼ်းတိတ်းၸပ်းယူႇ။ လွင်ႈၼႆႉၵေႃႈ လႆႈမႆႈၸႂ်ပႃးၶႃႈဢေႃႈ”- ၵူၼ်းပိုၼ်ႉတီႈ သိုပ်ႇလၢတ်ႈၼႄ ၼင်ႇၼႆ။
ၵဵဝ်ႇလူၺ်ႈ လွင်ႈပိုတ်ႇၵၢတ်ႇတီႈတႃႈၼမ်ႉ ၼႂ်းၼွင်ႁၢႆးယႃႈၼႆႉ ယူႇတီႈၵူၼ်းမိူင်းၵမ်ႈၽွင်ႈတႄႉ ႁၼ်ထိုင်ဝႃႈ ပဵၼ်လွၵ်းလၢႆးၽႅၼ်ၵၢၼ်သိုၵ်း မၢၼ်ႈၵူၺ်း ၶဝ်ၶႂ်ႈၼႄၾၢင်ႁၢင်ႈဝႃႈ ၼႂ်းမိူင်းႁူမ်ႈတုမ်ၼႆႉ ဢမ်ႇမီးၵူၼ်းတိတ်းၸပ်းတၢင်းပဵၼ်ယဝ်ႉ၊ ဢမ်ႇမီးလွင်ႈသုၵ်းယုင်ႈသင်ယဝ်ႉ၊ ၵူၼ်းမိူင်း ယူႇသႃႇႁႃၵိၼ်ငၢႆႈမႃးယဝ်ႉ ၸိူင်ႉၼၼ်ၵူၺ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ