ဝၼ်းတီႈ 13/12/2021 ယၢမ်းၵၢင်ဝၼ်းတဵင်ႈ တီႈဝၢၼ်ႈၼႃးသၢၼ် ၸႄႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်း ၽွင်းၸဝ်ႈႁိူၼ်းဢမ်ႇယူႇ မီးၽူႈလၵ်ႉၵူၼ်းၸူၼ် ယႃႉၽၵ်းတူႁိူၼ်းၶဝ်ႈတဝ်သွၵ်ႈဢဝ် ငိုၼ်းလႄႈၶမ်းၸဝ်ႈႁိူၼ်းၵႂႃႇဢမ်ႇဝႆႉၵိုတ်းပၼ်သေဢိတ်း။

ပဵၼ်ႁိူၼ်း ၼၢင်းလိူၼ် ဢၼ်ႁဵတ်းၵၢၼ်ႁႆႈၵၢၼ်သူၼ်ႁႃလဵင်ႉလုၵ်ႈလၢင်း 3 ၵေႃႉ ။ ၸူၼ်ၼၼ်ႉလႆႈၵႂႃႇၶမ်း  2 ၵျၢပ်ႈလႄႈ ငိုၼ်း 30 သႅၼ်ပျႃးပၢႆ ဝႃႈၼႆ။

ၵူၼ်းယူႇႁိမ်းၵိၼ်ၸမ် ဢၼ်ပဵၼ်ပီႈၼွင်ႉၼၢင်းလိူၼ် ၼၼ်ႉလၢတ်ႈတီႈၽူႈတွႆႇႁွၵ်ႈဝႃႈ -“ပဵၼ်ၽွင်းႁဝ်းၶႃႈဢွၼ်ၵၼ်ၵႂႃႇႁဵတ်းၵၢၼ်သူၼ်။ ဢမ်ႇမီးၽႂ်ပႂ်ႉႁိူၼ်း။ ပဵၼ်ၶၢဝ်းၵၢင်ဝၼ်းတႅင်ႈတႅင်ႈဢေႃႈ။ ၸူၼ်ယႃႉၽၵ်းတူၶဝ်ႈတဝ်ႁိူၼ်းလႆႈၵႂႃႇမူတ်း ငိုၼ်းလႄႈၶမ်းမၼ်း။ ထိုင်မၼ်းမႃးႁၼ်ၶူဝ်းႁိူၼ်းမၼ်းၺႃးယႃႉဝႆႉ ငိုၼ်းၶမ်းပႃးၵႂႃႇမူတ်း၊ ၵိုတ်းယူႇၶဝ်ႈသၢၼ် 2 ထူင်ဢေႃႈ။ မၼ်းပေႃးပဵၼ်လူမ်းဢေႃႈ   ”- ဝႃႈၼႆ။

ၼၢင်းလိူၼ်ၼႆႉၵေႃႉပဵၼ်ၸဝ်ႈၽူဝ်ဢမ်ႇလႆႈယူႇႁိူၼ်းယေး ၵႂႃႇႁဵတ်းၵၢၼ်ႁႃငိုၼ်းသေသူင်ႇပၼ်လုၵ်ႈလၢင်းမေးၼၢင်း၊ ။ ယၢမ်းလဵဝ်သမ်ႉပဵၼ်ၶၢဝ်းၶူဝ်ႊဝိတ်ႉလၢမ်းၽႄႈ ၊ ၶူဝ်းၵုၼ်ႇဢွၵ်ႇသူၼ်ၵေႃႈဢမ်ႇၸၢင်ႈၶၢႆ၊ ပေႃးမီးၵူၼ်းသိုဝ်ႉသမ်ႉလႆႈၶၢႆထုၵ်ႇၶၢႆပေႃး၊ ပေႃးၵႂႃႇသိုဝ်ႉၶူဝ်းပိူၼ်ႈမႃးၵိၼ်မႃးၸႂ်ႉသမ်ႉလႆႈသိုဝ်ႉၵႃႈသိုဝ်ႉပႅင်း။ယွၼ်ႉပိူဝ်ႈၺႃးၸူၼ်ၶဝ်ႈႁိူၼ်းလၵ်ႉဢဝ်ငိုၼ်းၶမ်းၶူဝ်းၶွင်ၵႂႃႇမူတ်းယဝ်ႉလႄႈတႃႇယူႇသဝ်းၵႂႃႇဝၼ်းတႃမိူဝ်းၼႃႈ ပဵၼ်ဢၼ်ယၢပ်ႇၽိုတ်ႇလိူဝ်ႁႅင်း – ၵူၼ်းၸမ်ၸႂ်ၼၢင်းလိူၼ် လၢတ်ႈၼင်ႇၼႆ။

ၽွင်းၵၢင်ပီ 2021 မႃးတေႃႇထိုင်ယၢမ်းလဵဝ် ၼႂ်းမိူင်းတႆး လၢႆလၢႆၸႄႈဝဵင်း ၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇလႄႈ ၽူႈလၵ်ႉၵူၼ်းၸူၼ်လိူင်ႇၼမ် ။ ရူတ်ႉၶိူင်ႈ ရူတ်ႉထိပ်ႇ ႁူဝ်ၸၢၵ်ႈထႆၼႃး ႁၢႆၵူႈဝၼ်း။ ၼႂ်းၸႄႈဝဵင်းမူႇၸေႊ ၼမ်ႉၶမ်း ရူတ်ႉၵႃးၵိုတ်းဝႆႉၼႃႈႁိူၼ်းယင်းထုပ်ႉမၢၼ်ႇရူတ်ႉလႅဝ်သေ လၵ်ႉဢဝ်ၵႂႃႇၵေႃႈမီး။

တီႈဝဵင်းၵဵင်းတုင် ပူၼ်ႉမႃး 2-3 ဝၼ်းၼႆႉ ၵူၼ်းၸူၼ်ၶဝ်ႈႁိူၼ်းၵူၼ်းႁဵတ်းၵၢၼ်လႅၵ်ႈငိုၼ်းသေ ပေႃႉထုပ်ႁႅမ်ၸဝ်ႈႁိူၼ်းတၢႆယဝ်ႉ ၸူၼ်ဢဝ်ၶူဝ်းၶွင်ငိုၼ်းၶမ်းၵႂႃႇၵေႃႈမီး။

ဝၼ်းတီႈ 1/12/2021 ၼႆႉ UNDP ၶပ်းမၢႆႁုၼ်ႈမုၼ်း ၸၢတ်ႈၸိုင်ႈလုမ်ႈၾႃႉ  ပိုၼ်ၽၢဝ်ႇဢွၵ်ႇႁၢႆးငၢၼ်းဝႆႉဝႃႈ ၼႂ်းမိူင်းႁူမ်ႈတုမ်ၼႆႉ ယွၼ်ႉတၢင်းပဵၼ်ၶူဝ်ႊဝိတ်ႉ လႄႈၵၢၼ်မိူင်းသုၵ်ႉယုင်ႈၼႆႉသေ ၼႂ်းပီတေမႃးၼႆႉ ၵူၼ်းၽၢၼ်ၵိၼ်းယၢပ်ႇၽိုတ်ႇၶၢၼ်ၸႂ်တေၸၢင်ႈပုင်ႈၶိုၼ်ႈပဵၼ် 3 ပုၼ်ႈ- ဝႃႈၼႆ။