သိုၵ်း TNLA ၼႂ်းၸႄႈဝဵင်းၼမ်ႉတူႈ ၸုမ်းၼိုင်ႈယဝ်ႉၸုမ်းၼိုင်ႈၶဝ်ႈႁၢၼ်ႉတၢင်းၵိၼ် သင်ႇၵိၼ်ယႅမ်ႉယဝ်ႉ ႁႂ်ႈၸဝ်ႉႁၢၼ်ႉၵႂႃႇၵဵပ်းငိုၼ်းတီႈၵၢင်ႉၵႄႇဝၢၼ်ႈဢိူင်ႇ ၵူၼ်းမိူင်းယၢပ်ႇၸႂ်ၸွမ်း။
“ယၢမ်းလဵဝ်ၶဝ်မႃးပၵ်းပၢင်သဝ်းယူႇၼႂ်းဝၢၼ်ႈၼႂ်းဝဵင်း၊ ၶဝ်ၶႆႈၵိၼ်ႁၢၼ်ႉလႂ်ၵေႃႈၶဝ်ႈၵႂႃႇသင်ႇၵိၼ် ၊ ၵႃႈတၢင်းၵိၼ်ၶဝ်သမ်ႉ ၸႂ်ႉၵႂႃႇယွၼ်းတီႈၵၢင်ႉၵႄႇဝၢၼ်ႈဢိူင်ႇ၊ ၸဝ်ႈႁၢၼ်ႉၵေႃႈ ဢမ်ႇႁတ်းထဵင်ဢမ်ႇႁတ်းလၢတ်ႈလူးၼေႃႈ လႆႈၵႂႃႇယွၼ်းတီႈၵၢင်ႉၵႄႇ။ ဢမ်ႇၼၼ် ၶဝ်တေတဵင်ၵႂၢမ်းဝႆႉတီႈၵၢင်ႉၵႄႇႁိုဝ်ၵေႃႈဢမ်ႇႁူႉ တႃႇႁႂ်ႈႁပ်ႉပုၼ်ႈၽွၼ်းလဵင်ႉလူလွင်ႈၵိၼ်ယမ်ႉၶဝ်ၼၼ်ႉ။ မၼ်းႁိုဝ်တေၶၢမ်ႇလႆႈၶႃႈလႃႇၼေႃ ယၢပ်ႇၸႂ်ဢေႃႈ ”ၵူၼ်းမိူင်းၼမ်ႉတူႈ ၵေႃႉၼိုင်ႈလၢတ်ႈၽူႈတွႆႇႁွၵ်ႈၼင်ႇၼႆ။
လွင်ႈ TNLA ပူၼ်ႉပႅၼ်သုၼ်ႇလႆႈၵူၼ်းဝၢၼ်ႈ ၸဝ်ႉႁၢၼ်ႈလႄႈ ၵၢင်ႉၵႄႇၸိူင်ႉၼႆၼႆႉ ၵူၼ်းဝၢၼ်ႈဢမ်ႇႁူႉတေလႆႈၵႂႃႇတိူင်ႇၵႂႃႇလၢတ်ႈတီႈလႂ်။ ဢမ်ႇသၢင်ႇထုၵ်ႇၸၢင်ႈထူပ်းၽေးထိုင်သၢႆၸႂ်လႄႈ ၵႃႈလႆႈယူႇယဵၼ်ဝႆႉႁင်းၽႂ်မၼ်း ဝႃႈၼႆ။
“ရူတ်ႉၵႃးၵူၼ်းဝၢၼ်ႈၵေႃႈၶဝ်ဢဝ်ၶီႇ ဢဝ်ၸႂ်ႉဢေႃႈ။ မၢင်ပွၵ်ႈဢဝ်ၵႂႃႇၸႂ်ႉသေၵွႆယဝ်ႉ ဢမ်ႇမႄးပၼ်ၶိုၼ်း ၊ ၼႃႇလိူဝ်ၼၼ်ႉသမ်ႉ ဢၼ်ၶဝ်ၶႂ်ႈလႆႈၵေႃႈၶဝ်ဢဝ်ၵႂႃႇလၢႆလၢႆၵေႃႈမီးၶႃႈယဝ်ႉ ဢမ်ႇမႃးသူင်ႇၶိုၼ်းၶႃႈလူင်။ ၸဝ်ႈရူတ်ႉၸဝ်ႈၵႃးမၢင်ၵေႃႉၸိူဝ်းႁတ်းႁၢၼ်ဢိတ်းဢိတ်းၵေႃႈ ၵႂႃႇယွၼ်းၶိုၼ်း ၵေႃႈလႆႈမႃးၶိုၼ်း၊ မၢင်ၵေႃႉ ဢမ်ႇႁတ်းၵႂႃႇယွၼ်းၵေႃႈ ပဵၼ်ၶွင်ၶဝ်ၵႂႃႇပႅတ်ႈသေယဝ်ႉဢေႃႈ။ ” – ၵူၼ်းဝၢၼ်ႈတၢင်းထုင်ႉၼမ်ႉတူႈ ထႅင်ႈၵေႃႉၼိုင်ႈၵေႃႈလၢတ်ႈၼင်ႇၼႆ။
လွင်ႈၼႆႉ ၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇတူၺ်း ၽူႈၶၢၼ်ပၢၵ်ႇ TNLA ယူႇသေတႃႉ ဢမ်ႇႁပ်ႉၾူၼ်းလႄႈဢမ်ႇၸၢင်ႈလႆႈတွင်ႈထၢမ်။
ၵူၼ်းၼမ်ႉတူႈတႄႉလၢတ်ႈဝႃႈ ဝၢႆးလင်ပၢင်တိုၵ်းယဵၼ်မႃးၼႆႉ ၸွမ်းထုင်ႉၸွမ်းဝၢၼ်ႈ ထိုင်မႃးၼႂ်းဝဵင်း တပ်ႉသိုၵ်း TNLA ၵႂႃႇမႃးတူင်ႉၼိုင်ယူႇသဝ်းလွတ်ႈလႅဝ်း။ တီႈမီးၸုမ်းယိပ်းၵွင်ႈၵၢင်ႇယူႇၼမ် ၵူၼ်းမိူင်းၵေႃႈၺႃးပူၼ်ႉပႅၼ်သုၼ်ႇလႆႈ တီႉၺွပ်းပေႃႉထုပ်ႉၼမ်။ ဢမ်ႇၸၢင်ႈၵႂႃႇၸႂ်ယႂ်ႇပိုင်ႈဢိင်ၽႂ်ၸုမ်းလႂ်မႃးၸွႆႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ