ၵူၼ်းၼုမ်ႇ ဝၢၼ်ႈၼႃးဝၢဝ်း ၸႄႈဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇ 2 ၵေႃႉ ၺႃး သိုၵ်း SSPP တီႉၺွပ်းၵႂႃႇ ၵူၼ်းပိုၼ်ႉတီႈလၢတ်ႈ။

ၵူၼ်းၼုမ်ႇ 2 ၵေႃႉၼႆႉ ပဵၼ် ၸၢႆးယွၼ်း ဢႃယု 16 ပီလႄႈ ၸၢႆးပၼ်ႇတိ ဢႃယု 17 ပီ။ တႃႇႁဵတ်းသိုၵ်းၼႆသေ မီးၵူၼ်းၸုမ်းၼိုင်ႈ ၼုင်ႈၶူဝ်း SSPP မႃးတီႉၺွပ်းဢဝ်ၵႂႃႇ မိူဝ်ႈဝၼ်းတီႈ 7/12/2021 ၵူၼ်းႁိူၼ်းၸၢႆးယွၼ်း လၢတ်ႈၽူႈတွႆႇႁွၵ်ႈၼင်ႇၼႆ။

“ၸုမ်းၶဝ် ၶီႇၵႃးမႃးဢေႃႈ ။ ဢဝ်လိၵ်ႈၽိုၼ်ၼိုင်ႈမႃးယိုၼ်ႈၼႄသေယဝ်ႉလၢတ်ႈဝႃႈ ၼႃႈႁိူၼ်းသူတူၵ်းပုၼ်ႈၽွၼ်းသူင်ႇလုၵ်ႈၸၢႆးၵေႃႉၼိုင်ႈ ၼႆသေ တေႁွင်ႉၵႂႃႇဝၼ်းၼၼ်ႉၵမ်းလဵဝ်ၼႆဢေႃႈ။ ၸၢႆးယွၼ်းသမ်ႉ ၵႂႃႇႁဵတ်းၵၢၼ် ယင်းပႆႇပွၵ်ႈမႃးႁိူၼ်းၶိုၼ်းၶႃႈၶၢဝ်းၼၼ်ႉ။ မိူဝ်ႈၽုၵ်ႈၸင်ႇသူင်ႇပၼ်ဢမ်ႇလႆႈႁႃႉၼႆၵေႃႈ ဝႃႈဢမ်ႇလႆႈၼႆဝႃႈ ထိုင်တီႈပေႃးလႆႈသူင်ႇၵူၼ်းၵႂႃႇႁွင်ႉမႃးဢဝ်ဢေႃႈ” ၵူၼ်းႁိူၼ်းၸၢႆးယွၼ်းလၢတ်ႈၼင်ႇၼႆ။

ၸၢႆးယွၼ်းၼႆႉ ပဵၼ်ၵူၼ်းႁဵတ်းၵၢၼ်ႁႃလဵင်ႉပေႃႈမႄႈဢၼ်ပၢႆးယူႇလီဢမ်ႇၶႅမ်ႉတင်းသွင်ၸဝ်ႈ၊ မီးၼွင်ႉၸၢႆးဢွၼ်ႇၵေႃႉၼိုင်ႈဢႃယု 10 ပီ။

ၸၢႆးပၼ်ႇတိ ၵေႃႈတေႃႈၼင်ႇၼၼ်။ ႁဵတ်းၵၢၼ်ႁႃငိုၼ်းလဵင်ႉ မႄႈ ဢၼ်မီးဢႃယု 50 ပၢႆ  လႄႈၼွင်ႉယိင်းဢွၼ်ႇၵေႃႉၼိုင်ႈ ။

ယွၼ်ႉပိူဝ်ႈၶႃသွင်ၵေႃႉ ၺႃးတီႉၵႂႃႇႁဵတ်းသိုၵ်းလႄႈ တွၼ်ႈတႃႇၼႃႈႁိူၼ်းတႃယေး ၶဝ် တေပဵၼ်လွင်ႈယၢပ်ႇၽိုတ်ႇလူင်လၢင်တႄႉတႄႉၼႆ ၶူးသွၼ်ၵူၼ်းဝၢၼ်ႈၼႃးဝၢဝ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈၼင်ႇၼႆ။

 ၵဵဝ်ႇၵပ်းလွင်ႈၼႆႉ ၸဝ်ႈႁၢၼ်ၽူင်းႁၢၼ် ၽူႈၶၢၼ်ပၢၵ်ႇ SSPP လၢတ်ႈတီႈၽူႈတွႆႇႁွၵ်ႈဝႃႈ ဢမ်ႇမီးပေႃးပေႃႇလသီႇၵဵပ်းသိုၵ်းလုၵ်ႈဢွၼ်ႇဢႃယုပႆႇတဵမ်၊ လွင်ႈၵဵပ်းသိုၵ်းတီႈတၢင်ႉယၢၼ်းၼႆႉၵေႃႈ ဢမ်ႇပႆႇလႆႈႁူႉၶေႃႈမုၼ်း ဝႃႈၼႆ။

“SSPP ႁဝ်းၶႃႈၼႆႉ မီးပေႃႇလသီႇၵဵပ်းသိုၵ်းမႂ်ႇယူႇ။ ၵူၺ်းၵႃႈဢမ်ႇမီးပေႃႇလသီႇၵဵပ်းသိုၵ်းလုၵ်ႈဢွၼ်ႇဢၼ်ဢႃယုပႆႇတဵမ် 18 ပီ။ သင်ဝႃႈဢမ်ႇႁူႉသေလႆႈၵဵပ်းမႅၼ်ႈမႃးၼႆၵေႃႈ ယင်းပွႆႇပၼ်ၶိုၼ်းၵွၼ်ႇဢေႃႈ။  သင်ၸိူဝ်ႉဝႃႈၶဝ် ၶႂ်ႈႁဵၼ်းလိၵ်ႈၵေႃႈယင်းၸွႆႈထႅမ်ပၼ်တႃႇၶဝ်တေလႆႈႁဵၼ်းလိၵ်ႈပႃးထႅင်ႈၵွၼ်ႇဢေႃႈ။ ၼင်ႇၵႃႈႁဝ်းၶႃႈပဵၼ်လႆႈၼၼ်ႉၸွႆႈထႅမ်ပၼ်ဢေႃႈ။ လွင်ႈပိူင်ႈပဵၼ်တီႈဝၢၼ်ႈၼႃးဝၢဝ်းယၢမ်းလဵဝ်ၼႆႉတႄႉ ပႆႇမီးႁၢႆးငၢၼ်းၶိုၼ်ႈမႃး ပႆႇလႆႈႁပ်ႉႁူႉလွင်ႈတၢင်းမၼ်းၶႃႈ”- ၸဝ်ႈႁၢၼ်ၽူင်းႁၢၼ် လၢတ်ႈၼင်ႇၼႆ။

မၼ်းၸဝ်ႈယင်းလၢတ်ႈထႅင်ႈဝႃႈ လိူၼ်ပူၼ်ႉမႃးၵေႃႈ ၶၢဝ်ႇ SSPP ၵဵပ်းသိုၵ်းမႂ်ႇ ၵဵပ်းပႃးလုၵ်ႈဢွၼ်ႇဢၼ်ဝႃႈၼၼ်ႉ ဢွၵ်ႇမႃးၽႄႈယူႇၵမ်းၼိုင်ႈ ။ၼၼ်ႉၵေႃႈပဵၼ်ၶၢဝ်ႇပွမ် ၶၢဝ်ႇသေႃႇသူၼ်းႁဵတ်းႁႂ်ႈပဵၼ်လွင်ႈသုၵ်ႉယုင်ႈၵူၺ်း  ဝႃႈၼႆ။

ၵူၼ်းမိူင်းတၢင်ႉယၢၼ်းတႄႉလၢတ်ႈဝႃႈ ယၢမ်းလဵဝ်ၵၢၼ်မိူင်းဢမ်ႇၼိမ် တၢင်းပဵၼ်ၵၢပ်ႈၵႃႇလ ၵေႃႈၽႄႈလိူင်ႇ ၵူၼ်းမိူင်းႁႃၵိၼ်လဵင်ႉတွင်ႉယၢပ်ႇ၊ ပေႃးၸုမ်းယိပ်းၵွင်ႈၵၢင်ႇသမ်ႉမႃးတီႉဢဝ်လုၵ်ႈလၢင်းၵူၼ်းမိူင်းၵႂႃႇႁဵတ်းသိုၵ်းတိၵ်တိၵ်းၼႆ လွင်ႈယူႇလွင်ႈၵိၼ်ၵူၼ်းမိူင်းတႆး တေၵိၼ်းၸႂ်မႃးလိူဝ်ၵဝ်ႇတိၵ်းတိၵ်း။ ၵွပ်ႈၼႆ ၸၢႆးယွၼ်းလႄႈၸၢႆးပၼ်ႇတိ ၵူၼ်းဝၢၼ်ႈၼႃးဝၢဝ်းၼႆႉၵေႃႈ ဢႃယုယင်းပႆႇတဵမ် 18 လႄႈ ႁႂ်ႈၶိုၼ်းပွႆႇမႃးပၼ်တႃႇႁႃလဵင်ႉပေႃႈမႄႈၵူၼ်းႁိူၼ်းၶိုၼ်းဝႆးဝႆးသေၵမ်း ၵူၼ်းမိူင်းတၢင်ႉယၢၼ်း တုၵ်းယွၼ်းလၢတ်ႈၼင်ႇၼႆ။