SHRF ဢွၵ်ႇ ၽိုၼ်ႁၢႆးငၢၼ်းမႂ်ႇ ၸိုဝ်ႈဝႃႈ “ႁဵတ်းႁႂ်ႈၶၢဝ်းတၢင်းမိူဝ်းၼႃႈ ႁဝ်းငိုပ်းတၼ်” ၼႆသေ ပိူင်းၼႄ ဝႃႈ သိုၵ်းလူင်ပွင်ၸိုင်ႈမၢၼ်ႈ တင်းၶွမ်ႊပၼီႊ ၶုတ်းထၢၼ်ႇႁိၼ် ၼႂ်းမိူင်းတႆး ပွတ်းႁွင်ႇ 3 ၸႄႈဝဵင်းၼၼ်ႉ ၶွင်ႉၵဵဝ်ႇၵၼ်ဝႃႈၼႆ။
ဝၼ်းတီႈ 28/1/2021 ၼႆႉ ယူႇတီႈၸုမ်းၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး SHRF ဢွၵ်ႇၽိုၼ်ႁၢႆးငၢၼ်းမႂ်ႇ ၵဵဝ်ႇၵပ်းသိုၵ်းလူင် ပွင်ၸိုင်ႈမၢၼ်ႈတင်း ၶွမ်ႊပၼီႊငူၺ်ႇယီႇပလႄး ႁူမ်ႈၵၼ် ၶႂၢၵ်ႈၶုတ်း မိူင်ထၢၼ်ႇႁိၼ် ၼႂ်းပိုၼ်ႉတီႈ ပၢင်တိုၵ်းသိုၵ်း သိူဝ် ႁဵတ်းႁႂ်ႈၵူၼ်းမိူင်း ပွတ်းၸႄႈဝဵင်းသီႇပေႃႉ၊ တၢင်ႉယၢၼ်း တင်း မိူင်းယႆ ၸိူဝ်းၼႆႉ ႁူပ်ႉတၢင်းယၢပ်ႇၽိုတ်ႇ တီႈလိၼ် ၽုၵ်ႇသွမ်ႈ သူၼ် ႁႆႈ ၼႃး သေဢမ်ၵႃး ဢၼ်လႆႈၶၢႆႉဝၢၼ်ႈ ၶၢႆႉသူၼ် တင်းမူတ်းၵေႃႈမီး။
မိူဝ်ႈဝၼ်းတီႈ 15/12/2020 ၼၼ်ႉ ၵူၼ်းဝၢၼ်ႈၸိူဝ်းသၢၼ်ၶတ်း လွင်ႈတေလႆႈၶၢႆႉဝၢၼ်ႈ ဢၼ်ငူၺ်ႇယီႇပလႄး ၶိုင်ပၼ် ၼႂ်း ၸႄႈဝဵင်းတၢင်ႉယၢၼ်းၼၼ်ႉ ထုၵ်ႇၸုမ်းပျီႇတုၸိတ်ႉမိူင်းႁ တီႉမတ်ႉ ၵႂႃႇ ဝႃႈၼႆ။
ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး တုၵ်းယွၼ်းထိုင်ဝႃႈ – “ ႁဝ်းၶႃႈ တုၵ်းယွၼ်းႁႂ်ႈ ၵိုတ်းယင်ႉ ၵၢၼ်ၶုတ်းထၢၼ်ႇႁိၼ်တင်း တူဝ်ႈမိူင်းပတ်းပိုၼ်ႉ တေႃႇပေႃးမီး ပိူင်ငဝ်ႈပိုင်းမိူင်း/လၵ်းမိူင်းႁူမ်ႈတုမ်ၸိုၼ်ႈၸၢင်ႇ ဢၼ် ၸၢင်ႈႁဵတ်းႁႂ်ႈဝၢၼ်ႈမိူင်းၵတ်း ယဵၼ်လႄႈ ၵူၼ်းမိူင်းၼႂ်း ပိုၼ်ႉတီႈမီး သုၼ်ႇလႆႈၵႅတ်ႇၵင်ႈသုၼ်ႇလႆႈသုၼ်ႇပဵၼ်လႄႈ တီႈ လိၼ် ပႃးတင်းမႄႈၼမ်ႉ ၼင်ႇႁိုဝ် တေဢမ်ႇလႆႈထုၵ်ႇ ယႃႉၵွႆၼၼ်ႉ”– ဝႃႈၼႆ။
မိူၼ်ၼင်ႇ ၵၢၼ်ၶုတ်းထၢၼ်ႇႁိၼ် တၢင်းဢိူင်ႇၼမ်ႉမ ၸႄႈဝဵင်းသီႇပေႃႉၼၼ်ႉ ၵူၼ်းဝၢၼ်ႈ တုၵ်းယွၼ်းႁႂ်ႈၵိုတ်းၵၢၼ် မႃးၶိူဝ်းယႂ်းသေတႃႉ ၶွမ်ႊပၼီႊငူၺ်ႇယီႇပလႄး ဢမ်ႇၵိုတ်း၊ သိုၵ်းလူင်ပွင်ၸိုင်ႈမၢၼ်ႈ ၵေႃႈ ထႅမ်ႁႅင်းသိုၵ်းၼႂ်းပိုၼ်ႉတီႈ ဢဝ်ႁူမ်ႈလူမ်ႈပၼ်၊ ၶွမ်ႊပၼီႊ ယင်းလႂ် ႁပ်ၶုတ်းမႂ်ႇထႅင်ႈ တႃႇၶၢဝ်းတၢင်း 25 ပီ။
မိူၼ်တၢင်းၸႄႈဝဵင်းတၢင်ႉယၢၼ်းၵေႃႈ ၶွမ်ႊပၼီႊငူၺ်ႇယီႇပလႄး ၸူင်ၶုတ်းထၢၼ်ႇႁိၼ် တႂ်ႈဝၢၼ်ႈတၢၵ်ႇလႅတ်ႇ ဢိူင်ႇၼႃးႁုၵ်ႇ၊ ပျီႇတူႉၸိတ်ႉ ဢၼ်ယူႇတႂ်ႈသိုၵ်းမၢၼ်ႈၼၼ်ႉ ဢဝ်ႁူမ်ႇလူမ်ႈပၼ်။ လွၵ်ႇငိုတ်ႈတီႉၺွပ်းၵူၼ်းဝၢၼ်ႈ ၸႂ်ႉႁႂ်ႈၶၢႆႉဝၢၼ်ႈ ၶၢႆႉသူၼ် တႃႇလင်ႁိူၼ်း 82 လင်။
ၶွမ်ႊပၼီႊ ငူၺ်ႇယီႇပလႄး ၼႆႉ ၼႂ်းၸႄႈဝဵင်းမိူင်းယႆၵေႃႈ ၶုတ်းထၢၼ်ႇႁိၼ်ႇ၊ ႁဵတ်းႁူင်းႁုင်ၵိူဝ်ဝၢၼ် ၼမ်ႉဢွႆႈ ၊ ယင်းမီး ၶွမ်ႊပၼီႊဢွၼ် ဢၼ်ႁူမ်ႈၽၢၵ်ႈႁဵတ်းၵၢၼ် ၵေႃႈမီးလၢႆဢၼ် ။
မိူင်ထၢၼ်ႇႁိၼ် ၼႂ်းၸႄႈဝဵင်းတၢင်ႉယၢၼ်း၊ သီႇပေႃႉ ၊ မိူင်းယႆ ၸိူဝ်းၼႆႉ ၵမ်ႈၼမ် မီးၼႂ်းပိုၼ်ႉတီႈ ဢၼ်ၸၢင်ႈၵိူတ်ႇၶိုၼ်ႈ ပၢင်တိုၵ်းသိုၵ်းသိူဝ် လႆႈတႃႇသေႇ၊ ယွၼ်ႉမိူင် ထၢၼ်ႇႁိၼ်သေ ဢၼ်လႆႈႁဵတ်းသိုၵ်း ႁဵတ်းသိူဝ်တေႃႇၵၼ်မႃးၵေႃႈမီး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ