ၼႂ်းၸႄႈဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇ ၼၼ်ႉ ၾၢႆႇယူႇလီ ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19 မီး 220 ၵေႃႉယဝ်ႉၼႆ လႅင်ႇၶၢဝ်ႇပိုၼ်ႉတီႈလၢတ်ႈၼႄၼင်ႇၼႆ။
တႄႇဢဝ် ႁၢင်လိူၼ်ၵျုၼ်ႊမႃး တေႃႇထိုင် ၼႂ်းႁၢင်လိူၼ်ၵျုႊလၢႆႊ 2021 ၼႆႉ တၢင်းၸႄႈဝဵင်းတၢင်ႉယၢၼ်း ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ၼၼ်ႉ ၾၢႆႇပၢႆးယူႇလီ ၵူတ်ႇထတ်း ၵူၼ်းဢၼ်ထၢင်ႇထိူမ် ၸပ်းၸိူဝ်ႉမႅင်းၶူဝ်ႊဝိတ်ႉ 19 ၼၼ်ႉ လႆႈႁူပ်ႉႁၼ် ၵူၼ်းၸပ်းတၢင်းပဵၼ် မီး 220 ၵေႃႉ ၊ လူႉတၢႆ 20 ၵေႃႉပၢႆ။
ၵူၼ်းၼုမ်ႇ တၢင်ႉယၢၼ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၼႂ်းဝဵင်းတႄႉ ဢမ်ႇ Lockdown ၶႃႈ ၸွမ်းဝၢၼ်ႈၼွၵ်ႈၼႃးပၢင်ႇႁဝ်းၶႃႈတႄႉ ယူႇတီႈၽူႈၵွၼ်းဢိူင်ႇဝၢၼ်ႈ ၽႂ်မၼ်းၶပ်းၶိုင်ၵႂႃႇၵူၺ်းၶႃႈ။ ပၼ်ၶဝ်ႈဝၢၼ်ႈ ဢမ်ႇပၼ်ၶဝ်ႈဝၢၼ်ႈဢၼ်ဝႃႈၼၼ်ႉ။ ယဝ်ႉၵေႃႈ ႁၼ်ၽူႈမီးပုၼ်ႈၽွၼ်းၶဝ်ၵေႃႈ ပႂ်ႉၵူတ်ႇထတ်း တႅၵ်ႈလူမ်းမႆႈပၼ် ၵူၼ်းၶဝ်ႈ ဢွၵ်ႇၵႂႃႇမႃး ၼႂ်းၸႄႈဝဵင်းတၢင်ႉယၢၼ်းယူႇၶႃႈ”- ဝႃႈၼႆ။
ယွၼ်ႉၵူၼ်းမိူင်းႁူပ်ႉတၢင်းယၢပ်ႇၽိုတ်ႇသေ မိူဝ်ႈဝၼ်းတီႈ 24/7/2021 ၼၼ်ႉ ၽူႈမီးပုၼ်ႈၽွၼ်း ၼႂ်းဝဵင်းတၢင်ႉယၢၼ်း ပၼ်ၶႂၢင်ႉ ၶၢႆၶိုၼ်းၶွင်ၵိၼ်ယႅမ်ႉ လႄႈ ႁၢၼ်ႉၶၢႆယႃႈယႃ ၸိူဝ်းၼႆႉ။
ၽူႈတူင်ႉၼိုင် ၼႂ်းတူင်ႇဝူင်းၵူၼ်း တၢင်ႉယၢၼ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵၢတ်ႇတႄႉ ၶဝ်ပိုတ်ႇပၼ် ၼႂ်း ဝၼ်းတီႈ 24 ၼႆႉ ၵူၺ်းၵႃႈ ပၼ်ၶွင်ၵိၼ် ၶွင်ယႅမ်ႉ၊ ယႃႈယႃ ၸိူဝ်းၼႆႉၵူၺ်းၶႃႈ။ ဢၼ်ယၢပ်ႇၽိုတ်ႇထႅင်ႈဢၼ်ၼိုင်ႈတႄႉ ၵူၼ်းမိူင်းၸိူဝ်းႁႃၸဝ်ႉ ၵိၼ်ၶမ်ႈၼၼ်ႉၶႃႈဢေႃႈ ယၢမ်းလဵဝ် ဢမ်ႇမီးၵၢၼ်ႁဵတ်းသေယၢပ်ႇၽိုတ်ႇၶႃႈဢေႃႈ”- ဝႃႈၼႆ။
တၢင်းပဵၼ်ၶူဝ်ႊဝိတ်ႉ 19 ၽႄႈမႃးၶိုၼ်းၵမ်းၼႆႉ ၼႂ်းမိူင်းတႆး 9 ၸႄႈဝဵင်း ႁႂ်ႈၵူၼ်းမိူင်း ၵုမ်းၵၵ်းတူဝ် ယူႇၵိုၵ်းႁိူၼ်း stay at home ။ မိူၼ်ၼင်ႇ ဝဵင်းၵၢတ်ႇၵဝ်ႇ(လၢဝ်ႇၵၢႆး)၊ မူႇၸေႊ၊ လႃႈသဵဝ်ႈ၊ သီႇပေႃႉလႄႈ ၼွင်ၶဵဝ်၊ တႃႈၶီႈလဵၵ်း၊ တူၼ်ႈတီး၊ ယွင်ႁူၺ်ႈလႄႈ လွၵ်းၸွၵ်ႇ ၸိူဝ်းၼႆႉ။ ယၢမ်းလဵဝ် ၼႂ်းမိူင်းတႆး ၵူၼ်းၸပ်းၶူဝ်ႊဝိတ်ႉ မီး မိုၼ်ႇပၢႆ။ လူႉတၢႆ ယွၼ်ႉၶူဝ်ႊဝိတ်ႉ 200 ၵေႃႉပၢႆ ။
