ၾႆးမႆႈႁိူၼ်းၵူၼ်း တီႈပွၵ်ႉ 10 ၸႄႈဝဵင်းတၢင်ႉယၢၼ်း လင်ၼိုင်ႈ လွင်ႈၵူၼ်း မၢတ်ႇၸဵပ်းလူႉတၢႆ ဢမ်ႇမီး  ။

မိူဝ်ႈဝႃး ဝၼ်းတီႈ 17/5/2021 ယၢမ်းဝၢႆးဝၼ်း မွၵ်ႈ 2 မူင်းပၢႆ ၾႆးမႆႈႁိူၼ်းၵူၼ်းဝၢၼ်ႈ တီႈပွၵ်ႉ 10 လင်ၼိုင်ႈ ၸႄႈဝဵင်း တၢင်ႉယၢၼ်း ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ  ။

ၽူႈတူင်ႉၼိုင် ၼႂ်းတူင်ႇဝူင်းၵူၼ်း တီႈတၢင်ႉယၢၼ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၾႆးမႆႈႁိူၼ်းယေး ၵူၼ်းဝၢၼ်ႈလင်ၼိုင်ႈ တီႈပွၵ်ႉ 10 ။   မႆႈတင်းလင် ၶႃႈဢေႃႈ ၶူဝ်းၶွင်ႁိူၼ်းယေးတႄႉ ဢမ်ႇတၼ်းလႆႈသင်ၶႃႈ၊ ၵမ်ႈၽွင်ႈဝႃႈမဝ်းယႃႈ ၵမ်ႈၽွင်ႈဝႃႈယူႇမဝ်ၵိၼ်မၢင်လႄႈမႆႈ ။ ဢမ်ႇႁူႉတႅတ်ႈတေႃးၶႃႈ ပလိၵ်ႈၶဝ်တိုၵ်ႉၵူတ်ႇထတ်းယူႇ”- ဝႃႈၼႆ။

ဢိင်ၼိူဝ် လွင်ႈၾႆးမႆႈႁိူၼ်းၼႆႉသေ ႁွင်ႈၵၢၼ်ပိုၼ်ၽၢဝ်ႇသူၺ်ႇၽီႇမျေႇတႄႉ တႅမ်ႈဝႆႉဝႃႈ –  ၸဝ်ႈၼႃႈတီႈၾၢႆႇၶႄၾႆးတၢင်ႉယၢၼ်းလၢတ်ႈဝႃႈ ၸဝ်ႈ ၶွင်ႁိူၼ်း ယွင်ႇယႃႈသေ ၸုတ်ႇၽဝ်ႁိူၼ်းယေး ၸဝ်ႈၵဝ်ႇၶိုၼ်း – ဝႃႈၼႆဝႆႉ။

ၾၢႆႇၼိုင်ႈထဝ်ႈဝၢၼ်ႈထဝ်ႈၼႃးၼႂ်းဝဵင်းတၢင်ႉယၢၼ်းတႄႉလၢတ်ႈဝႃႈ – ယၢမ်းလဵဝ်ၼႆႉ ထိုင်ၶၢဝ်းႁႅင်ႈၶၢဝ်းႁွင်သေဢမ်ႇၵႃး မႆႈႁႅင်းၼႃႇဢႃးလႃးလႄႈ ထုၵ်ႇလီၾၢင်ႉလွင်ႈၸႂ်ႉၽိုၼ်းၸႂ်ႉၾႆး၊ ဢမ်ႇထုၵ်ႇယူႇမဝ်ၵိၼ်မၢင် ၵူဝ်ပဵၼ်ၽေးၽိုၼ်းၽေးၾႆးၵူၺ်းဢၼ်ႇၵႃး ၵူဝ်တိူဝ်ႉပၢႆးယူႇလီပႃးထႅင်ႈ- ဝႃႈၼႆ။

ယၢမ်းလဵဝ်တႄႉ  ပလိၵ်ႈၸႄႈဝဵင်းတၢင်ႉယၢၼ်း လႆႈၵုမ်းတူဝ် ၸဝ်ႈၶွင်ႁိူၼ်းယေး ဝႆႉသေ ပိုတ်ႇလိူင်ႈၸွႆးတြႃးၵႂႃႇ ၸွမ်းၼင်ႇပၵ်းပိူင်မၢႆမီႈဝၢၼ်ႈမိူင်းမီးဝႆႉ။