ပလိၵ်ႈမၢၼ်ႈ ဝဵင်းၼမ်ႉၸၢင် ၸိုင်ႈတႆးပွတ်းၸၢၼ်းယႃႉတေႃႈၵႂၼ်းရူတ်ႉၶိူင်ႈၼေၵူၼ်းမိူင်း လၢတ်ႈဝႃႈပဵၼ်ဢၼ်တီႉလႆႈၼႂ်းဝဵင်းၼမ်ႉၸၢင်ဝႃႈၼႆသေတႃႉ ၵူၼ်းမိူင်းဝႃႈတၼ်းတီႉမိူဝ်ႈလႂ်ဢမ်ႇတၼ်းႁူႉ ဝႃႈၼႆ။
ႁူဝ်လိူၼ်ၼူဝ်ႊဝႅမ်ႊပိူဝ်ႊၼႆႉ ပလိၵ်ႈမၢၼ်ႈၵိုင်ႉၵၢင်ႉပွႆႇၶၢဝ်ႇဢွၵ်ႇမႃးဝႃႈ တေပႂ်ႉ ၵူတ်ႇထတ်း ရူတ်ႉၶိူင်ႈဢၼ်မီးတေႃႈၵႂၼ်း ဢဵၵ်ႇသေႃႊ (exhaust) သဵင်လင် ၵႂႃႇမႃးၼႂ်းဝဵင်း၊ ပေႃးထူပ်းႁၼ် ၸိုင်တေတီႉၺွပ်းပၼ်တူတ်ႈတၢမ်ႇၵႂႃႇ ဝႃႈၼႆ။
ၵူၺ်းၵႃႈဢမ်ႇတၼ်းႁၼ်ပလိၵ်ႈမၢၼ်ႈတီႉၺွပ်းသေ ထိုင်မႃး ဝၼ်းတီႈ 12/11/2025 ယၢမ်းၵၢင်ၼႂ် ပလိၵ်ႈမၢၼ်ႈ ၸတ်းပၢင်ယႃႉတေႃႈၵႂၼ်းရူတ်ႉၶိူင်ႈ တီႈပွၵ်ႉ 2 ဝဵင်းၼမ်ႉၸၢင်။
ၼၢင်းယိင်းၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ မိူဝ်ႈဝႃးၼႆႉၶဝ်ဢဝ်ၸၢၵ်ႈလေႃႉလဵၵ်းလူင်ၼၼ်ႉ မႃးဢိတ်ႇတေႃႈၵႂၼ်းရူတ်ႉၶိူင်ႈ ၼမ်ဝႃႈၼမ်။ ၶဝ်ဝႃႈပဵၼ် တေႃႈၾႆးသဵင်လင် ၸိူဝ်းဢၼ်ၶဝ် တီႉလႆႈၵၢင်ဝဵင်းၼမ်ႉၸၢင်ၼႆဝႃႇ။ ၶဝ်တၼ်းတီႉၺွပ်းမိူဝ်ႈလႂ်ၵေႃႈဢမ်ႇတၼ်းႁူႉ။ ဢဝ်မႃးတီႈလႂ်ၵေႃႈဢမ်ႇႁူႉ ၼမ်ဝႃႈၼမ် ပၢင်လိူၵ်ႈတင်ႈၸမ်မႃးယဝ်ႉၵေႃႈ ႁဵတ်းၵၢၼ်ၼႄယဝ်ႉၼႃႇ ”- ဝႃႈၼႆ ။
ပလိၵ်ႈမၢၼ်ႈၼႂ်းပိုၼ်ႉတီႈပိုၼ်ၽၢဝ်ႇလၢတ်ႈဝႆႉဝႃႈ တေႃႈၾႆး ဢၼ်တီႉၺွပ်းမႃးဢိတ်ႇယႃႉ ၼႄၼၼ်ႉ တင်းသဵင်ႈမီး 76 ဢၼ် ၵိုင်ႇငိုၼ်း 90 သႅၼ်ပျႃး တေသိုပ်ႇတီႉၺွပ်းၵႂႃႇ ရူတ်ႉၶိူင်ႈၸိူဝ်းသႂ်ႇတေႃႈၾႆးသဵင်လင် ဢၼ်ႁဵတ်းႁႂ်ႈပိုၼ်ႉတီႈဢူၼ်ဢၢၼ်မေႃးမႄးၼၼ်ႉ ၼႆယဝ်ႉ ။
ႁွင်ႈၵၢၼ်ဢၼ်ယူႇတႂ်ႈသိုၵ်းမၢၼ်ႈ ဝဵင်းၼမ်ႉၸၢင်ၼႆႉ ပေႃး ၵူၼ်းမိူင်းထူပ်းတၢင်းယၢပ်ႇၽိုတ်ႇမႃး မီးၽူႈလၵ်ႉၵူၼ်းၸူၼ်ၼႆ ဢမ်ႇတွၼ်ႉတီႉၺွပ်း ၸွႆႈထႅမ် သင်ပၼ် ၵူၼ်းမိူင်းၼင်ႇၵၼ်ၵူၺ်း လႆႈပိုင်ႈဢိင်ႇၵၼ်သေ ၾၢင်ႉၵိၼ်ၾၢင်ႉယူႇ – ၵူၼ်းပိုၼ်ႉတီႈလၢတ်ႈ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ဢၼ်တီႉၺွပ်းတေႃႈၾႆးသဵင်လင်ၼႆႉၵေႃႈလီယူႇ ၊ ၵူၼ်းၶီႇရူတ်ႉသဵင်လင်ၼၼ်ႉၵေႃႈလိူဝ်ၸႂ်တေႉ ၵူၺ်း ဢၼ်ၶဝ်လီတီႉၺွပ်းပၼ်ၼႆႉ ပဵၼ်ၽူႈလၵ်ႉၵူၼ်းၸူၼ် ဢၼ်ႁဵတ်းႁႂ်ႈၵူၼ်းမိူင်းဢမ်ႇမီးလွင်ႈႁူမ်ႇလူမ်ႈၼၼ်ႉႁႂ်ႈထိုင်တီႈပၼ် ဢမ်ႇၸႂ်ႈဝႃႈ ႁိုင်ႁိုင်မႃးႁဵတ်းၼႄၸိူင်ႉၼႆ”- ဝႃႈၼႆ ။
တီႈဝဵင်းၼမ်ႉၸၢင်ၼႆႉ ႁၢၼ်ႉၵိၼ်ၵျေႃႇ KTV လိူင်ႇ ၼမ် မႃး ဢွၼ်ၵၼ် ပိုတ်ႇ 24 ၸူဝ်ႈမူင်းမီးတင်းၼမ် ၊ ယႃႈမဝ်းၵမ်လိူင်ႇၼမ် သိုဝ်ႉၶၢႆၵၼ် ၶၼ်ထုၵ်ႇၶၼ်ပေႃး၊ ယႃႈမႃႉ ၵူႈ သႅၼ်းသိုဝ်ႉၶၢႆၵၼ်ငၢႆႈ ၵူၼ်းၵူႈသႅၼ်းထၢၼ်ႈ သိုဝ်ႉၵိၼ်သူႇသမ်း ငၢႆႈ သိုဝ်ႉလႆႈၵူႈတီႈ။ ၵူၼ်းၵိၼ်ယႃႈၼမ် ၽူႈလၵ်ႉၵူၼ်းၸူၼ်ၵေႃႈလိူင်ႇၼမ် ႁႅင်း ယူႇတီႈပလိၵ်ႈသိုၵ်းမၢၼ်ႈဢမ်ႇဢဝ်ပုၼ်ႈၽွၼ်း တီႉၺွပ်းထိုင်တီႈ – ၵူၼ်းပိုၼ်ႉတီႈလၢတ်ႈ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ