မိူဝ်ႈၼႆႉ ဝၼ်းတီႈ 2/6/2021 ယၢမ်းၵၢင်ၼႂ် မွၵ်ႈ 4 မူင်း မၢၵ်ႇတႅၵ်ႇတီႈႁိမ်းယေးငိုၼ်း မျၢၼ်ႇမႃႉၸီးပႂႃးယေး (မြန်မာ့စီးပွား ရေးဘဏ်) ၼႂ်းဝဵင်းတၢင်ႉယၢၼ်း ၸႄႈတွၼ်ႈလႃႈသဵဝ်ႈ ၸိုင်ႈတႆး ပွတ်းႁွင်ႇ လုၵ်ႈၼိုင်ႈ လွင်ႈတုမ်ႉတိူဝ်ႉ ၵူၼ်းမၢတ်ႇၸဵပ်း လူႉတၢႆ ဢမ်ႇမီး။
ၵူၼ်းပိုၼ်ႉတီႈ တၢင်ႉယၢၼ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ မၢၵ်ႇတႅၵ်ႇတီႈႁိမ်းပၢၼ်ႇမျၢၼ်ႇမႃႉၸီးပႂႃးယေး ။ တႅၵ်ႇႁႅင်းၶႃႈဢေႃႈ။ လွင်ႈတုမ်ႉ တိူဝ်ႉၵူၼ်းမၢတ်ႇၸဵပ်း လူႉတၢႆတႄႉ ဢမ်ႇမီး။ ၵူၺ်းၵႃႈ တႅၵ်ႇတိူဝ်ႉသႂ်ႇ တီႈ ၼင်ႈဢုတ်ႇ တီႈႁိမ်းၼၼ်ႉ လူႉၵွႆၵူၺ်းၶႃႈ”- ဝႃႈၼႆ။
ဢိင်ၼိူဝ် လွင်ႈၼႆႉ ပဵၼ်ၼမ်ႉမိုဝ်းၽႂ် ၵေႃႉလႂ် ၸုမ်းလႂ် မႃးႁၢင်ႈၵၢင် ႁဵတ်းဢၼ်ဝႃႈၼၼ်ႉ ပႆႇလႆႈႁူႉ ၼႆယဝ်ႉ။
“လွင်ႈၼႆႉ ပဵၼ်ၽႂ်ႁဵတ်းတႄႉ ဢမ်ႇလႆႈႁူႉၶႃႈ တေလႆႈဝႃႈ ၼႂ်းဝဵင်းႁဝ်းၶႃႈ မၢၵ်ႇတႅၵ်ႇ ၵမ်းၼႆႉ ပဵၼ်ပွၵ်ႈၵမ်းဢွၼ်တၢင်း သုတ်းၶႃႈဢေႃႈ။ ဢွင်ႈတီႈၼၼ်ႉ မိူဝ်ႈၵူႈပွၵ်ႈ မီးသိုၵ်းပႂ်ႉဝႆႉ။ ဝၢႆးသေမၢၵ်ႇတႅၵ်ႇၼႆႉယဝ်ႉ ၶဝ်ထႅမ်ႁႅင်းသိုၵ်းမႃးပႂ်ႉ တိူဝ်း ၼမ်သေ ၵူႈဝၼ်း ၶႃႈဢေႃႈ တီႈယေးငိုၼ်းၼၼ်ႉ”- ၵူၼ်းပိုၼ်ႉတီႈ တၢင်ႉယၢၼ်း သိုပ်ႇလၢတ်ႈ ၼႄၼင်ႇၼႆ။
တႄႇဢဝ် ၼႂ်းလိူၼ်မေႊမႃးၼႆႉ ၼႂ်းမိူင်းတႆး လၢႆၸႄႈဝဵင်း မီးလွင်ႈမၢၵ်ႇတႅၵ်ႇ မႃးၶိူဝ်းယႂ်း ၸွမ်းႁိမ်းၵၢတ်ႇ၊ ႁူင်းႁဵၼ်း၊ လုမ်း ပၢႆးပၺ်ႇၺႃႇ၊ ႁိမ်းပၢၼ်ႇ ၸိူဝ်းၼႆႉ။
မိူဝ်ႈဝၼ်းတီႈ 31/5/2021 ၼၼ်ႉၵေႃႈ မီးၵူၼ်းမႃးထိုမ်ႈမၢၵ်ႇတႅၵ်ႇ သႂ်ႇၼႂ်း ဝၢင်းႁိူၼ်း ၵေႇပၢၵ်ႇ (ရာအိမ်မှူး) တီႈပွၵ်ႉၼိူဝ် ၸႄႈဝဵင်းမူႇၸေႊ။ မိူဝ်ႈဝၼ်းတီႈ 30/5/2021 ဝၼ်းတီႈ 30/5/2021 တီႈၾၢႆႇတူၵ်းၵၢတ်ႇလူင် ၸႄႈဝဵင်းၵေးသီး ၸႄႈတွၼ်ႈ လွႆလႅမ် ၸိုင်ႈတႆး ပွတ်းၸၢၼ်း မၢၵ်ႇတႅၵ်ႇလုၵ်ႈၼိုင်ႈ ပဵၼ်ပွၵ်ႈၵမ်းႁႅၵ်ႈ။
လိူဝ်ၼၼ်ႉ မိူၼ်ၼင်ႇ လုမ်းပၢႆးပၺ်ႇၺႃႇ မိူင်းၵိုင်၊ ႁူင်းႁဵၼ်းၸၼ်ႉၵၢင် ဝဵင်းပၢင်လူင်လႄႈ ၵၢင်ဝဵင်း ႁိမ်းယေးငိုၼ်း ၸၼ်ႉ ၸွမ် တီႈတူၼ်းတီး ၸိူဝ်းၼႆႉ။ ၵူၺ်းၵႃႈ ဢိင်ၼိူဝ် လွင်ႈမၢၵ်ႇတႅၵ်ႇ ၼႆႉသေ ပဵၼ်ၼမ်ႉမိုဝ်းၽႂ် ၵေႃႉလႂ် ႁဵတ်းဢၼ်ဝႃႈ ၼၼ်ႉ ဢမ်ႇလႆႈႁူႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ