ဝၼ်းတီႈ 10/12/2021 ယၢမ်းၵၢင်ၶမ်ႈမွၵ်ႈ 9 မူင်းၶိုင်ႈ ၵူၼ်းဝၢၼ်ႈၵဵင်းလၢၼ်း ပွၵ်ႉ 2 ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း မီးၵူၼ်းၸုမ်းၼိုင်ႈ ၶဝ်ႈႁႅမ်ၼၢင်းယိင်း 3 ၵေႃႉထိုင်ၼႂ်းႁိူၼ်းယေး တၢႆထင်တီႈ ၼႆယဝ်ႉ။
ၵူၼ်း ၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ႁဝ်းၶႃႈ ထၢင်ႇတႄႉ ပဵၼ်ၸူၼ်ၶႃႈဢေႃႈ။ ႁိူၼ်းၼၼ်ႉသမ်ႉ ပဵၼ်ၸၢဝ်းၶႄႇ ပဵၼ်ၵူၼ်းလႅၵ်ႈငိုၼ်း တီႈၵၢတ်ႇလူင်ၵဵင်းတုင် ။ ယဝ်ႉၵေႃႈ တီႈႁိူၼ်းၵေႃႈ ႁပ်ႉလႅၵ်ႈငိုၼ်းၶႃႈ။ ၵူၼ်းႁၢႆႉတေမႃးႁဵတ်းၵႅင်ႈထၢမ်လႅၵ်ႈငိုၼ်းသေ ၸူၼ်/ ၶႃႈႁႅမ်ၶဝ် ၸိူင်ႉၼႆၶႃႈဢေႃႈ ႁဝ်းၶႃႈထၢင်ႇတႄႉ”- ဝႃႈၼႆ။
ႁိူၼ်းၵူၼ်းဝၢၼ်ႈ ဢၼ်ထုၵ်ႇၶႃႈႁႅမ်တၢႆၼၼ်ႉ ႁပ်ႉလႅၵ်ႈငိုၼ်းၵူၺ်းဢမ်ႇၵႃး ၶၢႆပႃးသိူဝ်ႈၽႃႈ ၼၢင်းယိင်း ၶူဝ်းဢုၼ်ႇ ၽႃႈႁူမ်ႇၶူဝ်း ၼွၼ်း ၸိူဝ်းၼႆႉထႅင်ႈ ဝႃႈၼႆ။
“ၼႂ်းၵဵင်းတုင်ၼႆႉ ဝၢႆးသေ သိုၵ်းမၢၼ်ႈသိမ်းဢႃႇၼႃႇမႃး ပၢႆးမၢၵ်ႈမီးဢမ်ႇပဵၼ်ၵၢၼ် ၵူၼ်းမိူင်းႁႃၵိၼ်ယၢပ်ႇ။ လိူဝ်ၼၼ်ႉ ပၢင်တေႃႇလွင်း၊ ထီႇသၢမ်တူဝ်၊ သၢမ်သိပ်းႁူၵ်းမိူင်းလူင် ၸိူဝ်းၼႆႉၵေႃႈၼမ် ႁဵတ်းၼၼ်သေ ၸင်ႇပဵၼ်မီးမႃး ၽူႈလၵ်ႉ ၵူၼ်းၸူၼ်ၵူၼ်းႁၢႆႉၼမ်ၶႃႈယဝ်ႉ”- ၵူၼ်းပိုၼ်ႉ တီႈ ၵဵင်းတုင် သိုပ်ႇလၢတ်ႈၼႄထႅင်ႈၼင်ႇၼႆ။
ၸုမ်းၸွႆႈထႅမ်ပရႁိတ ၵဵင်းတုင် လႆႈဢဝ်တူဝ်တၢႆ ၵူၼ်းႁိူၼ်း 3 ၵေႃႉၼၼ်ႉ သူင်ႇဝႆႉတီႈႁူင်းယႃၵဵင်းတုင်ယဝ်ႉ။ ယူႇတီႈပလိၵ်ႈမၢၼ်ႈ/ ယေး တိုၵ်ႉၵူတ်ႇထတ်း လွင်ႈပိူင်ပဵၼ်မၼ်းယူႇ ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 30/6/2021 ယၢမ်းၵၢင်ၼႂ်ၸဝ်ႉၼၼ်ႉၵေႃႈ ၼၢင်းပိၼ်းတိပ်ႉ ဢႃယု မွၵ်ႈ 29 ပီ ထုၵ်ႇၸူၼ်သေ ၶႃႈႁႅမ်တၢႆ ၵိုၵ်းႁိူၼ်း မၼ်းၼၢင်း တီႈဝၢၼ်ႈၵုင်းၵျွင်း ပွၵ်ႉ 1 ၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ