တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်းသေ ၵၢတ်ႇလူင် မိူင်းၼၢႆး ဢၼ်ပိၵ်ႉဢိုတ်းဝႆႉၼၼ်ႉ ႁူဝ်လိူၼ်ၼႆႉ ၶိုၼ်းပိုတ်ႇၶိုၼ်းသေတႃႉ ၵူၼ်းသိုဝ်ႉၶၢႆၵၢတ်ႇ ၸိူဝ်းဢမ်ႇပႆႇလႆႈသမ်းယႃႁႄႉ ၶူဝ်ႊဝိတ်ႉ တႄႉ ဢမ်ႇပႆႇပၼ်ၶဝ်ႈသိုဝ်ႉၶၢႆ ၼႂ်းၵၢတ်ႇ ဝႃႈၼႆ။

ဝၼ်းတီႈ 4/12/2021 ၵၢတ်ႇလူင်မိူင်းၼၢႆး ၸႄႈဝဵင်းမိူင်းၼၢႆး ၸႄႈတွၼ်ႈလၢင်းၶိူဝ်း မိူင်းတႆးပွတ်းၸၢၼ်း ၼၼ်ႉ ပိုတ်ႇပၼ်ၵူၼ်းမိူင်း ၶဝ်ႈဢွၵ်ႇသိုဝ်ႉၶၢႆ။ ၵူၺ်းၵႃႈ ၵူၼ်းပႃးႁၢပ်ႇၶၢႆ၊ ၵူၼ်းမီးႁၢၼ်ႉၶၢႆ ႁွင်ႈၶၢႆ ၼႂ်းၵၢတ်ႇ ပႃးၸဵမ် ၵူၼ်းတင်ႈၽိူၼ်ၶၢႆ ၸိူဝ်းၼၼ်ႉ ပေႃးဢမ်ႇပႆႇသမ်းယႃႁႄႉၶူဝ်းဝိတ်ႉ ၾၢႆႇလိူမ်ႈလႆႇ (သီႇပိၼ်ႇ) ဝဵင်း ဢမ်ႇပႆႇပၼ်ၶဝ်ႈၶၢႆ ၊ ၵူၼ်းသိုဝ်ႉၸၢႆႇၵေႃႈမိူၼ်ၼၼ် ႁႂ်ႈသမ်းယႃ ႁႄႉ ၶူဝ်းဝိတ်ႉယဝ်ႉၵွၼ်ႇ ၸင်ႈတေ လႆႈၶဝ်ႈဢွၵ်ႇသိုဝ်ႉၶၢႆ။

ၵူၼ်း မိူင်းၼၢႆး ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “တီႈၵၢတ်ႇမိူင်းၼၢႆးၼႆႉ တေပိုတ်ႇၽၵ်းတူၵၢတ်ႇဝႆႉ သွင်ႁူး ၾၢႆႇတူၵ်းလႄႈ ၾၢႆႇ ၸၢၼ်း။ ယဝ်ႉၵေႃႈ ၽူႈမီးပုၼ်ႈၽွၼ်းၶဝ် ပႂ်ႉၵူတ်ႇထတ်းတၢင်းပဵၼ်ဝႆႉ။ သင်ဝႃႈ ၽႂ်ပႆႇလႆႈသမ်းယႃၼႆ ပႆႇပၼ်ၶဝ်ႈ သိုဝ်ႉၶၢႆၶူဝ်းၼႂ်းၵၢတ်ႇၶႃႈ” – ဝႃႈၼႆ။

ၾၢႆႇပၢႆးယူႇလီ ပႂ်ႉၵူတ်ႇထတ်းပၼ်တၢင်းပဵၼ်ၶူဝ်ႊဝိတ်ႉ 19 ၊ ပႂ်ႉသမ်းပၼ်ယႃ ႁႄႉၵင်ႈတၢင်းပဵၼ် ၶူဝ်ႊဝိတ်ႉ 19  ၾၢႆႇၸၢၼ်းၵၢတ်ႇ၊ ၽႂ်ၶႂ်ႈၵႂႃႇသမ်းၵေႃႈလႆႈ ၊ သမ်းပၼ်လၢႆလၢႆၵူၺ်းၼႆ ၵူၼ်းမိူင်းၼၢႆး လၢတ်ႈၼင်ႇၼႆ။

ၼႂ်းဝဵင်းမိူင်းၼၢႆး မီးၵူၼ်းသမ်းယႃ ႁႄႉၶူဝ်ႊဝိတ်ႉ ၼမ်ယူႇသေတႃႉ ၸိူဝ်းပႆႇသမ်းၵေႃႈတိုၵ်ႉမီးၼမ်။  

ဝၢၼ်ႈလႂ် မိူင်းလႂ်ၵေႃႈယဝ်ႉ ၽႂ်ၵေႃႈယႃႇ ပေႃးတေၵႂႃႇတႂ်ႈမိူဝ်းၼိူဝ် တေၶဝ်ႈၵၢတ်ႇၶဝ်ႈသႃး ၶဝ်ႈဢွၵ်ႇဝၢၼ်ႈ ဢွၵ်ႇဝဵင်း ၸိူဝ်းၼႆႉ ပေႃးဢမ်ႇမီးဝႂ် သမ်းၶဵမ်ႁႄႉၶူဝ်ႊဝိတ်ႉယဝ်ႉ တေၵႂႃႇမႃးယၢပ်ႇ၊ ဝဵင်းလႂ်ၵေႃႈ တႄႇႁၢမ်ႈမႃး ၸိူင်ႉၼႆ ၵူႈဝဵင်းဝဵင်း။