ၼႂ်းဝၼ်းလဵဝ် ၵူၼ်းၵျွၵ်ႉမႄး ယဵပ်ႇမၢၵ်ႇမႅင်းၾင်လိၼ် 2 ပွၵ်ႈ လူႉတၢႆ 2 ၵေႃႉ မၢတ်ႇၸဵပ်း 3 ၵေႃႉ ဝႃႈၼႆ။
မိူဝ်ႈဝႃး ဝၼ်းတီႈ 7/12/2021 ယၢမ်းဝၢႆးဝၼ်း မွၵ်ႈ 3 မူင်း ၵူၼ်းမၢၼ်ႈပိုၼ်ႉ 4 ၵေႃႉ ၵႂႃႇႁႃဝူဝ်းၼႆႉသေ ယဵပ်ႇၺႃးမၢၵ်ႇၾင်လိၼ် ၼႂ်းသူၼ်ၼဵင်ႈ ယၢၼ်ၵႆဝၢၼ်ႈမွၵ်ႈ 2 လၵ်း ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။ ၼႂ်း 4 ၵေႃႉၼၼ်ႉ လူႉတၢႆ ၵေႃႉၼိုင်ႈ မၢတ်ႇၸဵပ်းႁၢဝ်ႈႁႅင်း ၵေႃႉၼိုင်ႈ လႄႈ တႃႇသွင်ၵေႃႉသမ်ႉ လႆႈတိူဝ်ႉၺႃးမၢတ်ႇၸဵပ်း ဢိတ်းဢွတ်း ၼႆယဝ်ႉ။
ၵူၼ်းပိုၼ်ႉတီႈမၢၼ်ႈပိုၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်ၵႂႃႇႁႃဝူဝ်းၸွမ်းၵၼ် 4 ၵေႃႉ။ တီႈသူၼ်ၼဵင်ႈႁိမ်းဝၢၼ်ႈၼႆႉၵူၺ်း။ ၶဝ်သမ်ႉပႃးမႃၵႂႃႇ မႃၵႂႃႇၽႃႇၺႃးဢွၼ်တၢင်းၶႃႈဢေႃႈ။ တႃႇၵေႃႉၼိုင်ႈတႄႉ လႆႈမၢတ်ႇၸဵပ်းႁႅင်းသေ တေႃႉသူင်ႇႁူင်းယႃ လႆႈလူႉတၢႆ ၸွမ်းတၢင်း။ ထႅင်ႈၵေႃႉၼိုင်ႈ မၢတ်ႇၸဵပ်းႁႅင်းသေ လႆႈသူင်ႇယူတ်းယႃတီႈလႃႈသဵဝ်ႈ။ တႃႇသွင်ၵေႃႉတႄႉ ဢမ်ႇပေႃးမၢတ်ႇၸဵပ်းႁႅင်းၵႃႈႁိုဝ်။ ”- ဝႃႈၼႆ။
ၵူၼ်းမၢၼ်ႈပိုၼ်ႉ 4 ၵေႃႉ ဢၼ်ယဵပ်ႇၺႃးမၢၵ်ႇၼၼ်ႉ လုင်းၸၢႆးၼွင်ႉ လႆႈတိူဝ်ႉၺႃးမၢၵ်ႇ ၸဵပ်းႁၢဝ်ႈႁႅင်း ၽွင်းတိုၵ်ႉတေႃႉသူင်ႇႁူင်းယႃၼၼ်ႉ လႆႈလူႉသဵင်ႈၵႂႃႇၸွမ်းတၢင်း ၼႆယဝ်ႉ။
ၼွၵ်ႈလိူဝ်ၼၼ်ႉ ၵူၼ်းမၢၼ်ႈပိုၼ်ႉ ၽူႈၸၢႆး ဢႃယု 32 ပီ ၵေႃႉမၢတ်ႇၸဵပ်းႁၢဝ်ႈႁႅင်းတီႈၶႃ။ ၼၼ်ႉသမ်ႉ လႆႈဢဝ်ၵႂႃႇၽႃႇ ၸၢၵ်ႇ မၢၵ်ႇဢွၵ်ႇ တီႈဝဵင်းလႃႈသဵဝ်ႈ ဝႃႈၼႆ။
“ၵေႃႉမၢတ်ႇၸဵပ်းႁႅင်းၼၼ်ႉ ၸၢၵ်ႇမၢၵ်ႇ တိူဝ်ႉၺႃးတီႈၶႃလူင်ၾၢႆႇၶႂႃ လႄႈ တီႈပၢႆတိၼ်မၼ်းၸၢႆး ၾၢႆႇသၢႆႉ။ တႃႇဢဝ်ၸၢၵ်ႇ မၢၵ်ႇဢွၵ်ႇ တီႈႁူင်းယႃၵျွၵ်ႉမႄးၼႆႉဢမ်ႇလႆႈလႄႈ လႆႈသူင်ႇၵႂႃႇ ၽႃႇတတ်းတီႈႁူင်းယႃလႃႈသဵဝ်ႈၶႃႈ”- ၵူၼ်းပိုၼ်ႉတီႈ မၢၼ်ႈပိုၼ်ႉ သိုပ်ႇလၢတ်ႈၼႄၼင်ႇ ၼႆ။
မိူၼ်ၼႆၼင်ႇၵဝ် မိူဝ်ႈဝႃး ဝၼ်းတီႈ 7 ၼႆႉၵေႃႈ ၵူၼ်းဝၢၼ်ႈပၢင်ၸၢမ် ၽူႈၸၢႆး ဢႃယု 40 ပီ ၵေႃႉၼိုင်ႈ ၼၼ်ႉၵေႃႈ ယဵပ်ႇၺႃးမၢၵ်ႇ တၢင်းၼွၵ်ႈ ဝၢၼ်ႈသေ မၢတ်ႇၸဵပ်းႁၢဝ်ႈႁႅင်း လႆႈလူႉတၢႆၵႂႃႇ ၼႆယဝ်ႉ။
ၼႂ်းၸႄႈဝဵင်းၵျွၵ်ႉမႄးၼႆႉ ယွၼ်ႉၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၼင်ႇၵၼ် ပိုတ်းယိုဝ်းၵၼ် ႁၢဝ်ႈႁႅင်းၶၢဝ်းတၢင်းႁိုင်သေ ၸွမ်းႁိမ်းႁွမ်းဝၢၼ်ႈ ၸိူဝ်းၼႆႉ ၵူၼ်းမိူင်းယဵပ်ႇၺႃးမၢၵ်ႇၶႂ်ႈဝႃႈ မီးၵူႈလိူၼ် တႄႇဢဝ် ပီၼႆႉမႃး ၵူၼ်းပိုၼ်ႉတီႈလၢတ်ႈ။
ၵွပ်ႈၼႆလႄႈ ၵူၼ်းပၢႆႈၽေးသိုၵ်း ၸိူဝ်းပွၵ်ႈမိူဝ်းၵၼ်ၵမ်ႈၽွင်ႈၼၼ်ႉ ၵူဝ်ယဵပ်ႇၺႃးမၢၵ်ႇၵၼ် ၽွင်းၵႂႃႇတႅပ်းၽိုၼ်း ပိတ်းၼဵင်ႈၸိူဝ်းၼႆႉ မၢင်ၵေႃႉ ယဵပ်ႇၺႃးသေ လႆႈမၢတ်ႇၸဵပ်းၸိူဝ်းၼႆႉၵေႃႈ မီးမႃးယဝ်ႉ ၵူၼ်းဝၢၼ်ႈလွႆၵုင်း ဢႃယု 101 လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။
