ၼႂ်းၸႄႈဝဵင်းမိူင်းၵိုင် ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ၸမ် 400 လူႉတၢႆ 9 ၵေႃႉယဝ်ႉ ဝႃႈၼႆ။
တၢင်းပဵၼ်ၶူဝ်ႊဝိတ်ႉ 19 ပွၵ်ႈၵမ်းသၢမ် ၼႂ်းၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ႁၢၼ်ႉတေႃႇထိုင် ဝၼ်းတီႈ 1/12/2021 ၼႆႉ ၵူတ်ႇထတ်းႁၼ် ၵူၼ်းတိတ်းၸပ်းၸိူဝ်ႉမႅင်းမီးၵႂႃႇ 393 ၵေႃႉ၊ လူႉတၢႆ 9 ၵေႃႉ၊ ယႃၶႅၼ်း 384 ၵေႃႉလႄႈ တိုၵ်ႉယူတ်း ယႃ 9 ၵေႃႉ ၸွမ်းၼင်ႇ ၾၢႆႇပွင်ႇၶၢဝ်ႇ လူင်ပွင်ၸိုင်ႈ ၸၼ်ႉၸႄႈဝဵင်း ဢွၵ်ႇဝႆႉၼင်ႇၼႆ။
ၵူၼ်း မိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ – “တီႈမိူင်းၵိုင်ႁဝ်းၶႃႈၼႆႉ ၶႂ်ႈဝႃႈ ၵူတ်ႇထတ်းႁၼ် ၵူႈဝၼ်းၶႃႈယဝ်ႉ ၵူၼ်းတိတ်းၸပ်းၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 ၼႆႉ မီးယူႇ ဝၼ်းၵေႃႉသွင်ၵေႃႉ၊ သၢမ်သီႇၵေႃႉ ၸိူဝ်းၼႆၶႃႈဢေႃႈ၊ ၼႂ်းဝူင်ႈဝၢင်ႈၼႆႉ ဢမ်ႇလႆႈႁၼ် ၾၢႆႇပၢႆးယူႇလီ၊ ၾၢႆႇပွင်ႇ ၶၢဝ်ႇၶဝ် တၢင်ႇၶိုၼ်ႈမႃးယဝ်ႉၶႃႈ ပဵၼ်သင်ၵေႃႈ ဢမ်ႇႁူႉ”- ဝႃႈၼႆ။
ၵူၼ်းဝၢၼ်ႈတႄႉလၢတ်ႈဝႃႈ ပေႃးၾၢႆႇပၢႆးယူႇလီၶဝ်မႃးထတ်းၺႃး ပဵၼ်ဢႆပဵၼ်ဝတ်းၵူၺ်းၵေႃႈ ဝႃႈပဵၼ်ၶူဝ်ႊဝိတ်ႉၼႆတိၵ်းတိၵ်းလႄႈ ဢမ်ႇၶႂ်ႈၵႂႃႇၵူတ်ႇထတ်း ဝႃႈၼႆၵေႃႈမီး။
“ႁူင်းႁဵၼ်းတႄႉ ပိုတ်ႇယူႇ ။ တီႈႁူင်းႁဵၼ်းၸၼ်ႉသုင် မိူင်းၵိုင်ၵေႃႈၵူတ်ႇထတ်းပၼ်ပႃး လုၵ်ႈႁဵၼ်းတင်း ၽူႈၵွၼ်းႁူင်းႁဵၼ်း ။ ႁၼ်ၵူၼ်းၸပ်း ၶူဝ်ႊဝိတ်ႉ 19 ထႅင်ႈဝႃႈၼႆၼင်ႇၵဝ်ႇ။ ၵူၺ်းၵႃႈ ႁူင်းႁဵၼ်းယင်းဢမ်ႇပိၵ်ႉ၊ သိုပ်ႇပိုတ်ႇတေႃႇထိုင် ယၢမ်းလဵဝ် ”- ဝႃႈၼႆ။
ဢိင်ၼိူဝ် တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းၼႆႉသေ တီႈႁူင်းႁဵၼ်းၸၼ်ႉသုင် မိူင်းၵိုင် တင်ႈတႄႇဝၼ်းတီႈ 8 /12/2021 ၼႆႉၵႂႃႇ တေၸႅၵ်ႇလုၵ်ႈႁဵၼ်းပဵၼ် 2 ၸုပ်ႈ သေ တေပၼ်ႇပုတ်ႈၵၼ်ႁဵၼ်း/သွၼ်ပၼ်ၵႂႃႇ ၼႆ တူင်ႇဝူင်းၶူးသွၼ်ၼႂ်းဝဵင်းမိူင်းၵိုင်ၵေႃႈလၢတ်ႈၼင်ႇၼႆ။
ႁူင်းႁဵၼ်းဢၼ်ပိၵ်ႉမႃးၶၢဝ်းတၢင်း 2-3 လိူၼ်ၼႆႉ သိုၵ်းမၢၼ်ႈသင်ႇပိုတ်ႇၶိုၼ်းမိူဝ်ႈႁူဝ်လိူၼ် ၼူဝ်ႊဝႅမ်ႊပိူဝ်ႊၸုပ်ႈၼိုင်ႈ လႄႈ ႁူဝ်လိူၼ်တီႊသႅမ်ႊပိူဝ်ႊ ၸုပ်ႈၼိုင်ႈ ။ ဢၼ်ပႆႇလႆႈပိုတ်ႇၵိုတ်း 12 ၸႄႈဝဵင်း။ ၼၼ်ႉၵေႃႈ တေပိုတ်ႇၵႂႃႇတူၺ်းၵမ်းဢိတ်းဢိတ်းလႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ