ၵူၼ်းမိူင်းပိုၼ်ႉတီႈလႄႈ ၸုမ်းတူင်ႉၼိုင်တူင်ႇဝူင်း ပရႁိတ ၸႄႈဝဵင်းပၢင်လွင်း ဢွၼ်ၵၼ်မႆႈ လွင်ႈတေပိုတ်ႇၶိုၼ်ႈႁူင်းႁဵၼ်း ၵူဝ်တၢင်းပဵၼ်ၶူဝ်ႊ ဝိတ်ႉ 19 ၽႄႈလၢမ်းႁႅင်းထႅင်ႈ။
မိူဝ်ႈၼႆႉ ဝၼ်းတီႈ 30/11/201 ၶူးသွၼ်/ မေႃသွၼ် ၼႂ်းႁူင်းႁဵၼ်း လူင်ပွင်ၸိုင်ႈ တႂ်ႈၶွင်ႇသီႇသိုၵ်းမၢၼ်ႈ ၵုမ်းၵမ် ၼႂ်းၸႄႈဝဵင်းပၢင်လွင်း ၸႄႈ တွၼ်ႈတူၼ်ႈတီး ၸိုင်ႈတႆးပွတ်းၸၢၼ်း ဢွၼ်ၵၼ်ၵႂႃႇႁူင်းႁဵၼ်း ဢုပ်ႇဢူဝ်းၵၼ်သေ ႁၢင်ႈႁႅၼ်းတႃႇတေပိုတ်ႇႁူင်းႁဵၼ်း ၼႆယဝ်ႉ။
ၵူၼ်းပိုၼ်ႉတီႈ ပၢင်လွင်း လၢတ်ႈတီႈၽူႈတွႆႇႁွၵ်ႈဝႃႈ – “တေပိုတ်ႇႁူင်းႁဵၼ်းယဝ်ႉၼႆၶႃႈဢေႃႈၼႆႉ။ မိူဝ်ႈၼႆႉ ၶူးသွၼ်မေႃသွၼ်ၶဝ် ဢွၼ်ၵၼ် ၵႂႃႇႁူင်း ႁဵၼ်း ။ တေပိုတ်ႇဝၼ်းလႂ် ဢၼ်ဝႃႈၼၼ်ႉ ဢမ်ႇပႆႇႁူႉၶႃႈ။ သင်ပိုတ်ႇႁူင်းႁဵၼ်းတႄႉ မႆႈၸႂ်တၢင်းပဵၼ်ၶူဝ်ႊဝိတ်ႉ တေၽႄႈၸူးလုၵ်ႈဢွၼ်ႇႁူင်းႁဵၼ်းၵူၺ်းယဝ်ႉၶႃႈ”- ဝႃႈၼႆ။
ယၢမ်းလဵဝ် ၼႂ်းၸႄႈဝဵင်းပၢင်လွင်း ၼႂ်းသဵၼ်ႈသၢႆမၢႆ ၾၢႆႇပၢႆးယူႇလီၶဝ်ဝႃႈ ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 လူတ်းယွမ်းလူင်းယဝ်ႉ ဝႃႈၼႆသေတႃႉ ၵူၼ်းမိူင်းဢၼ်တိတ်းၸပ်းတၢင်းပဵၼ်သေဢမ်ႇၵႂႃႇႁူင်းယႃ ၊ ဢၼ်လၵ်ႉယူတ်းယႃတူဝ်တီႈႁိူၼ်းၽႂ်မၼ်း ၸိူဝ်းၼႆႉၵေႃႈ တိုၵ်ႉမီးယူႇ ဝႃႈၼႆ။
“လႆႈမႆႈၸႂ်ၶႃႈဢေႃႈ ၼႂ်းဝဵင်းၼႆႉ ဢမ်ႇထူပ်းႁၼ် ၵူၼ်းတိတ်းၸပ်းၸိူဝ်ႉမႅင်းယဝ်ႉ၊ ဢၼ်ယူတ်းယႃတူဝ်တီႈႁူင်းယႃ ၵိုတ်းဝႆႉၵေႃႉလဵဝ်ၵူၺ်းယဝ်ႉဝႃႈၼႆသေတႃႉ ဢၼ်လၵ်ႉယႃယူႇႁင်းၽႂ်မၼ်းတီႈႁိူၼ်းၵေႃႈသမ်ႉတိုၵ်ႉလႆႈငိၼ်းၶၢဝ်ႇမၼ်းယူႇဢေႃႈ။ သင်ဝႃႈ ပိုတ်ႇႁူင်းႁဵၼ်းၸိုင် လုၵ်ႈလၢၼ်ၸိူဝ်းၵူၼ်းတိတ်းၸပ်း ၸိူဝ်ႉမႅင်းသေယူတ်းယႃတူဝ်ပႆႇႁၢႆၸိူဝ်းၼႆႉ တေၸၢင်ႈတေႃႉမႃးၽႄႈတီႈႁူင်းႁဵၼ်း၊ ပေႃးၸိူင်ႉၼႆ လီၵူဝ်မၼ်းၽႄႈၶိုၼ်းႁႅင်းဢေႃႈ”- ၸုမ်းတူင်ႉၼိုင်ပရႁိတ ပၢင်လွင်း လၢတ်ႈတီႈၽူႈတွႆႇႁွၵ်ႈၼင်ႇၼႆ။
မိူဝ်ႈဝႃး ဝၼ်းတီႈ 29/11/2021 ယူႇတီႈႁွင်ႈၵၢၼ်ၾၢႆႇပၢႆးပၺ်ႇၺႃႇ တႂ်ႈၶွင်ႇသီႇသိုၵ်းမၢၼ်ႈ ယိုတ်းမိူင်း ၵုမ်းၵမ်ၼႆႉ ပိုၼ်ၽၢဝ်ႇဢွၵ်ႇမႃးဝႃႈ ၼႂ်းၸႄႈမိူင်းတႆး 14 ၸႄႈဝဵင်း တိုၵ်ႉႁၢင်ႈႁႅၼ်းတႃႇပိုတ်ႇႁူင်းႁဵၼ်းဝႆႉယူႇ။ ၼႂ်း 14 ၸႄႈဝဵင်းၼၼ်ႉ ပႃးၸႄႈဝဵင်းပၢင်လွင်း ဝဵင်းၼိုင်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ