ၵၢတ်ႇလူင် ဝဵင်းသီႇပေႃႉ ဢၼ်လႆႈပိၵ်ႉဢိုတ်းမႃးၶၢဝ်းတၢင်းႁိုင် 5 လိူၼ် ယွၼ်ႉတၢင်းပဵၼ်ၶူဝ်ႊဝိတ်ႉၼၼ်ႉ တေပိုတ်ႇပၼ် ၵူၼ်းမိူင်းသိုဝ်ႉၸၢႆႇ/ ၶၢႆတေႃႇၵၼ်ၶိုၼ်း ၼႂ်းဝၼ်းတီႈ 1/12/2021 ။
လုင်းၸၢႆးသႃႇဢွင်ႇ ၵေႃႇမတီႇၵၢတ်ႇ ဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈလဵဝ် တီႈသီႇပေႃႉတႄႉ တၢင်းပဵၼ် ၶူဝ်ႊဝိတ်ႉ မၢင်လူင်းၵႂႃႇ ယဝ်ႉသေ တေပိုတ်ႇၵၢတ်ႇၶႃႈ။ တႃႇၵူၼ်းမႃးၶၢႆမႃးသိုဝ်ႉ တေလႆႈႁဵတ်းၸွမ်းမၢႆမီႈၶူဝ်ႊဝိတ်ႉ။ ႁႂ်ႈသႂ်ႇၽႃႈတူမ်းသူပ်းၵၼ်။ တၢင်းၶဝ်ႈ ဢွၵ်ႇၵေႃႈ ၸတ်းႁဵတ်းဝႆႉ ၶဝ်ႈတၢင်းၼိုင်ႈ ဢွၵ်ႇတၢင်းၼိုင်ႈ ၸိူင်ႉၼႆၶႃႈ။ လွင်ႈမႆႈၸႂ် တၢင်းပဵၼ်တႄႉၵေႃႈ မီးယူႇႁင်းၽႂ်ႁင်းမၼ်း။ ၵူၺ်းၵႃႈ ၵၢၼ်ႁႃၵိၼ်လဵင်ႉတွင်ႉၵေႃႈ မၢင်ၵေႃႉ ဢမ်ႇလႆႈၶၢႆလႃးလႃး တႃႇတေၵိၼ်ၵႂႃႇၵူႈဝၼ်းသမ်ႉယၢပ်ႇ။ ၵၢတ်ႇၼႆႉၵေႃႈ သမ်ႉပိၵ်ႉဢိုတ်းမႃးႁိုင်ယဝ်ႉလႄႈ မၢင်ၵေႃႉၵေႃႈ ဢမ်ႇမီးတီႈၶၢႆ ၸႂ်ယႂ်ႇၶၢႆတီႈၵၢတ်ႇၼႆႉၵူၺ်း ၵွပ်ႈၼႆ ၵူၼ်းမိူင်းတႄႉ တုၵ်းယွၼ်းႁႂ်ႈပိုတ်ႇပၼ်ၵၢတ်ႇ ၸိူင်ႉၼႆၵေႃႈမီးဢေႃႈ”- ဝႃႈၼႆ။
ယွၼ်ႉတၢင်းပဵၼ်ၶူဝ်ႊဝိတ်ႉ 19 လူတ်းယွမ်းလူင်းၼမ်ယဝ်ႉလႄႈ တေၶိုၼ်းပိုတ်ႇၵၢတ်ႇၼႆသေတႃႉ ၾၢႆႇၸွႆႈထႅမ်တီႈၵၢတ်ႇတႄႉ ႁၼ်ထိုင်ဝႃႈ လွင်ႈ တၢင်းပဵၼ်ၼႆႉ ယႃႇဝႆႉမဝ်မၢင် ႁႂ်ႈဢွၼ်ၵၼ်သႂ်ႇၽႃႈတူမ်းသူပ်း ပႃးၼမ်ႉယႃႈလၢင်ႉမိုဝ်း ၸိူဝ်းၼႆႉၵၼ် ႁႂ်ႈၾၢင်ႉသတိပၢႆးယူႇလီၵၼ် ၼႆယဝ်ႉ။
ၼၢင်းမွၼ်းမွၼ်းပဝ်း ၽူႈဢွင်ႇပေႉပၢင်လိူၵ်ႈတင်ႈ ပီ 2020 ဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “သင်ၸိူဝ်ႉဝႃႈ ပိုတ်ႇၵၢတ်ႇမႃးၼႆ ၵူၼ်းမိူင်း ႁဝ်းၶႃႈ လူဝ်ႇႁႄႉၵင်ႈတွၼ်ႈပၢႆးယူႇလီၸဝ်ႈၵဝ်ႇ။ ၶူဝ်ႊဝိတ်ႉယွမ်းလူင်းယဝ်ႉသေတႃႉၵေႃႈ လူဝ်ႇလႆႈသႂ်ႇၽႃႈတူမ်းသူပ်း လူဝ်ႇလႆႈမီးၼမ်ႉယႃလၢင်ႉ မိုဝ်း ၸပ်းတူဝ်ဝႆႉတႃႇသေႇ။ ယဝ်ႉၵေႃႈ ပေႃးမႃးသိုဝ်ႉၸၢႆႇ ၼႆ ႁႂ်ႈယူႇႁၢင်ႇၵႆၵၼ် ၸွမ်းမၢႆမီးတမ်းဝၢင်းဝႆႉ။ ပေႃးၸိူင်ႉၼႆ ႁဝ်းၵေႃႈ တေလွတ်ႈ ၽေးတၢင်းပဵၼ်။ ႁဝ်းသမ်းၶဵမ်ယဝ်ႉသေတႃႉၵေႃႈ မၼ်းၸၢင်ႈတိတ်းၸပ်းၵၼ်ယူႇ။ ၼႂ်းၵမ်ႇၽႃႇၼႆႉ ၶိုၼ်းဢွၵ်ႇမႃးထႅင်ႈ တၢင်းပဵၼ်မႂ်ႇမႂ်ႇထႅင်ႈ ဢၼ်ၼိုင်ႈလႄႈ ၵွပ်ႈၼႆ ၵူဝ်ႁဝ်းၶႃႈ ပဵၼ်မႃးထႅင်ႈ လုမ်းလႃးပၢႆးယူႇလီၵၼ်ၽွင်ႈ ႁဵတ်းၸွမ်းမၢႆမီႈဢၼ်မေႃယႃၶဝ်တမ်းဝၢင်းဝႆႉ”- ဝႃႈၼႆ။
ၼွၵ်ႈလိူဝ်ၼၼ်ႉ ၵၢတ်ႇဝဵင်းၼမ်ႉလၼ်ႈဢၼ်ပိၵ်ႉဢိုတ်းမႃးၶၢဝ်းတၢင်း 5 လိူၼ်ပၢႆၼၼ်ႉၵေႃႈ တေပိုတ်ႇၶိုၼ်းမိူဝ်ႈၽုၵ်ႈ ၼင်ႇၵဝ်ႇ။
တၢင်းပဵၼ်ၶူဝ်ႊဝိတ်ႉ 19 ၼႂ်းၸႄႈဝဵင်းသီႇပေႃႉ ပွၵ်ႈၵမ်းသၢမ် တေႃႇထိုင်လိူၼ်ၵျုႊလၢႆႊ ဝၼ်းတီႈ 28 ၼၼ်ႉ မီးၵူၼ်းတိတ်းၸပ်းတၢင်းပဵၼ် 700 ပၢႆ လူႉတၢႆ 30 ပၢႆ။ တႄႇဢဝ်လိူၼ်ၵျူႊလၢႆႊ တေႃႇထိုင် လိူၼ်ၼူဝ်ႊဝႅမ်ႊပိူဝ်ႊ 2021 ၼႆႉ ၵူၼ်းတိတ်းၸပ်း ၸိူဝ်ႉမႅင်းလူတ်းယွမ်း လူင်းမႃးၼမ် ၽူႈၸွႆႈထႅမ် ၸုမ်းပရႁိတ သီႇပေႃႉလၢတ်ႈ။
