မိူဝ်ႈဝႃး ဝၼ်းတီႈ 2/10/2025 ယၢမ်းၵၢင်ၶမ်ႈ 10 မူင်းပၢႆ သိုၵ်းမၢၼ်ႈယိုတ်းမိူင်း ၸႂ်ႉတိုဝ်းႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ႁိမ်းတူဝ်းၵဵၵ်ႉ ၾၢႆႇတူၵ်းဝဵင်းသီႇပေႃႉ ၸိုင်ႈတႆးပွတ်းႁွင်ႇ။
မၢၵ်ႇႁိူဝ်းမိၼ်တိုၵ်း သိုၵ်းမၢၼ်ႈယိုတ်းမိူင်းၵႂႃႇတူၵ်းတိူဝ်ႉသႂ်ႇ ႁူင်းႁႅမ်း ၵုမုတြႃႇ ၼႂ်းပွၵ်ႉၸၢမ်ၽိူၵ်ႇ ႁိမ်းႁွမ်းၼၼ်ႉ ဢမ်ႇမီးႁိူၼ်းယေး ၵူၼ်းမိူင်း ယူႇသဝ်းဝႆႉၼႆ ၵူၼ်းမိူင်းပိုၼ်ႉတီႈဝဵင်းသီႇပေႃႉ လၢတ်ႈၼႄၼင်ႇၼႆ။
“တၢင်းၼၼ်ႉဢမ်ႇမီးႁိူၼ်းၵူၼ်းယူႇဝႆႉလႄႈ ဢမ်ႇမီးၵူၼ်းတိူဝ်ႉမၢတ်ႇၸဵပ်းၸွမ်းသေၵေႃႉၼင်ႇၵဝ်ႇ။ ၼႂ်းဝဵင်းၼႆႉ ယဵၼ်သီႇသီႇဝႆႉ။ ဢမ်ႇပေႃးမီးၵူၼ်းသင်ယဝ်ႉ။ ၵူၺ်းၵႃႈၵူၼ်းၵႂႃႇၵူၼ်းမႃးတႄႉ ဢမ်ႇပႆႇၶၢတ်ႇၼင်ႇၵဝ်ႇ။”
မိူဝ်ႈဝႃးဝၼ်းတီႈ 2/10/2025 ယၢမ်းၵၢင်ၼႂ်ၸဝ်ႉ သိုၵ်းမၢၼ်ႈယိုတ်းမိူင်း ၸႂ်ႉႁိူဝ်းမိၼ်တိုၵ်းပွႆႇမၢၵ်ႇသႂ်ႇ ၼႂ်းဝဵင်းၼမ်ႉ တူႈ လႄႈ မၢၼ်ႈတူင်ႈသေ ၵူၼ်းလူႉတၢႆ ပႃးလုၵ်ႈဢွၼ်ႇၵူၼ်းထဝ်ႈ ၼၢင်းယိင်း တင်းမူတ်း မီးၵႂႃႇ 4 ၵေႃႉ မၢတ်ႇၸဵပ်းၵႂႃႇ 5 ၵေႃႉ ၼႆယဝ်ႉ။
တႄႇႁၢင်လိူၼ်သႅပ်ႊထႅမ်ႊပိူဝ်ႊမႃး သိုၵ်းမၢၼ်ႈ တႄႇၶဝ်ႈဢဝ်တီႈယူႇထိုင်လႆႈၼႂ်းဝဵင်းၵျွၵ်ႉမႄးသေ သိုၵ်းတဢၢင်း (TNLA) လႆႈသုတ်ႉ ႁူၼ်ထွႆႁႅင်းသိုၵ်း ဢွၵ်ႇၵႂႃႇတၢင်းၸႄႈဝဵင်းသီႇပေႃႉဝႆႉ။ ယၢမ်းလဵဝ် သိုၵ်းမၢၼ်ႈ တင်း သိုၵ်းတဢၢင်း သိုပ်ႇၶဵင်ႈၶႅင်ၵၢၼ်သိုၵ်းၵၼ်ဝႆႉ ၼႂ်းၵႄႈၵၢင် ဝဵင်းၵျွၵ်ႉမႄး လႄႈ ဝဵင်းသီႇပေႃႉ ၼႆယဝ်ႉ။
ၶေႃႈတူၵ်းလူင်း ၵျီႊတီႊဝႃႊ ၶွၼ်ႊဝႅၼ်ႊသျိၼ်ႊ မတ်ႉတႃ 14 ၶေႃႈတူၵ်းလူင်းၽိူမ်ႉထႅမ် 2 ၼၼ်ႉပႃးဝႆႉဝႃႈ – သိုၵ်းၼႆႉ ႁၢမ်ႈယႃႉၶူဝ်းၶွင်လမ်ႇလွင်ႈၵူၼ်းမိူင်း ဢၼ်ဢမ်ႇမီးဢမ်ႇပဵၼ် မိူၼ်ၼင်ႇ လိၼ်သူၼ်ႁႆႈၼႃး ဢၼ်ၽုၵ်ႈသွမ်ႈဝႆႉမၢၵ်ႇၶဝ်ႈတဝ်ႈၼမ်ႉ၊ သူၼ်-ၶွၵ်ႈလဵင်ႉသတ်း ၊ ႁူဝ်ၼမ်ႉၵိၼ်ၼမ်ႉၸႂ်ႉ၊ ၵၢၼ်တေႃႉသူင်ႇၶူဝ်းၶွင်ၵူၼ်းမိူင်း ၸိူဝ်းၼႆႉလႃးလႃး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ