ၵၢတ်ႇဝဵင်းၼမ်ႉလၼ်ႈ ဢၼ်ပိၵ်ႉဢိုတ်းမႃး ၶၢဝ်းတၢင်း 5 လိူၼ် ၼၼ်ႉ လိူၼ်ၼႃႈ ၼႂ်းလုၵ်ႈလိူၼ်ၻီႊသႅမ်ႊပိူဝ်ႊတေမႃးၼႆႉ တေပိုတ်ႇၶိုၼ်းယဝ်ႉဝႃႈၼႆ။
ပေႃးထိုင်မႃး ဝၼ်းတီႈ 1/12/2021 ၼႆႉ ၵၢတ်ႇလူင် ဝဵင်းၼမ်ႉလၼ်ႈ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇ ဢၼ်လႆႈ ပိၵ်ႉ ဢိုတ်းမႃးၶၢဝ်းတၢင်း 5 လိူၼ်ၼၼ်ႉ တေပိုတ်ႇပၼ်ၶိုၼ်း ၵူၼ်းမိူင်း ႁႂ်ႈပေႃးလႆႈသိုဝ်ႉၸၢႆႇၵၼ် ၶိုၼ်းမိူၼ်ၵဝ်ႇ ၼႆယဝ်ႉ။
ၽူႈတူင်ႉၼိုင် ၼႂ်းတူင်ႇဝူင်းၵူၼ်း ၼမ်ႉလၼ်ႈ လၢတ်ႈတီႈၽူႈတွႆႇႁွၵ်ႈဝႃႈ -“ ယၢမ်းလဵဝ် ၵူၼ်းၸပ်း ၶူဝ်ႊဝိတ်ႉၵေႃႈ ဢမ်ႇပေႃးၼမ်ယဝ်ႉ။ ၵူၼ်းမိူင်းၵေႃႈ သမ်းယႃ ႁႄႉၵင်ႈၵၼ်ၼမ်ယဝ်ႉလႄႈ ၸွင်ႇဝႃႈ တေပိုတ်ႇ ၵၢတ်ႇ ၶိုၼ်းဢေႃႈ”- ဝႃႈၼႆ။
ၾၢႆႇလိူမ်ႈလႆႇ ဝဵင်းၼမ်ႉလၼ်ႈ (နမ့်လန်စည်ပင်သာယာရေးအဖွဲ့) ၵေႃႈ ပိုၼ်ၽၢဝ်ႇဝႃႈ မိူဝ်ႈၽုၵ်ႈ ဝၼ်းတီႈ 30/11/2021 တႄႇဢဝ် ယၢမ်း ၵၢင်ၼႂ် 10 မူင်း တေပိုတ်ႇၽၵ်းတူၵၢတ်ႇပၼ် ႁႂ်ႈၸဝ်ႈၶွင်ႁၢၼ်ႉ လႆႈ မႃးႁဵတ်းလွင်ႈမူတ်းသႂ် ႁၢၼ်ႉၶၢႆၽႂ်မၼ်း(သႅင်ႇၽႂ်သႅင်ႇမၼ်း) ။
ၵၢတ်ႇဝဵင်းၼမ်ႉလၼ်ႈၼႆႉ လႆႈပိၵ်ႉဢိုတ်းမႃး မိူဝ်ႈလိူၼ်ၵျုၼ်ႊ၊ ၸဵမ်မိူဝ်ႈတၢင်းပဵၼ်ၶူဝ်ႊဝိတ်ႉ 19 ၽႄႈပွၵ်ႈၵမ်းသၢမ်။
ၵူၼ်း ၼမ်ႉလၼ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းမိူင်းႁဝ်းၶႃႈ လႆႈပိုင်ႈဢိင် ၸွမ်းၵၢတ်ႇ ၸွမ်းသႃး။ ႁဝ်းၶႃႈတႄႉ မွင်းႁႂ်ႈပိုတ်ႇၼႃႇယဝ်ႉ။ ၵူၺ်းၵႃႈ ထုၵ်ႇလီမီးပၵ်းပိူင်သေ ပိုတ်ႇ။ တိုဝ်းၵမ်ၸွမ်း ပၵ်းပိူင် ၾၢႆႇပၢႆးယူႇလီ ၶဝ်တမ်းဝၢင်းၼၼ်ႉ တေလီဢေႃႈ”- ဝႃႈၼႆ။
တီႈႁူင်းယႃၼမ်ႉလၼ်ႈ ဝၼ်းမိူဝ်ႈၼႆႉ ပိုတ်ႇႁပ်ႉသမ်းယႃ ႁႄႉၵင်ႈ တၢင်းပဵၼ် ၶူဝ်ႊဝိတ်ႉ 19 ၼႂ်းဝၼ်းၸၼ်ထိုင်ဝၼ်းသုၵ်း ၼိုင်ႈဝၼ်းႁပ်ႉသမ်းပၼ် သွင်ပွၵ်ႈ ၵူၼ်းၼမ်ႉလၼ်ႈ လၢတ်ႈၼင်ႇၼႆ။
