သိုဝ်ႇၶၢဝ်ႇ ၼႂ်းပိုၼ်ႉတီႈ ပိုၼ်ၽၢဝ်ႇဝႃႈၶၢဝ်းတၢင်းၸမ် 5 လိူၼ်မႃးၼႆႉ ၼႂ်းၸႄႈဝဵင်းၵဵင်းတုင် ၵူတ်ႇထတ်းႁၼ် ၵူၼ်းတိတ်းၸပ်းၶူဝ်ႊဝိတ်ႉ 19 မီး 5,513 ၵေႃႉ လူႉတၢႆယဝ်ႉ 92 ၵေႃႉ ဝႃႈၼႆ။
ၼႂ်းၸႄႈဝဵင်းၵဵင်းတုင်ၼႆႉ တႄႇဢဝ် ဝၼ်းတီႈ 29/6/2021 တေႃႇထိုင် ဝၼ်းတီႈ 25/11/2021 ၶၢဝ်းတၢင်းၸမ် 5 လိူၼ်ၼႆႉ ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 တင်းမူတ်း 5,513 ၵေႃႉ၊ လူႉတၢႆ 92 ၵေႃႉ၊ ယႃၶႅၼ်း 5,354 ၵေႃႉလႄႈ ယူတ်းယႃ 68 ၵေႃႉ ။
မိူဝ်ႈၼႆႉ ဝၼ်းတီႈ 25/11/2021 ၾၢႆႇပၢႆးယူႇလီ ၸႄႈဝဵင်းၵဵင်းတုင် ထတ်းတူၺ်းတၢင်းပဵၼ် ၵူၼ်းမိူင်း 939 ၵေႃႉ ၼႂ်းၼၼ်ႉ ၸပ်းတၢင်းပဵၼ်ၶူဝ်ႊဝိတ်ႉ 19 ထႅင်ႈ 17 ၵေႃႉ ။
ၼွၵ်ႈလိူဝ်ၼၼ်ႉ ၼႂ်းဝဵင်းတႃႈလိူဝ်ႇ ၸႄႈဝဵင်းတႃႈၶီႈလဵၵ်း ၵေႃႈ ၶၢဝ်းတၢင်း 5-6 လိူၼ်ၼႆႉ မီးၵူၼ်းၸပ်းတၢင်းပဵၼ် 700 တၢႆ 20 ၵေႃႉဝႃႈၼႆ။
ၶၢဝ်း တၢင်း5-6 လိူၼ်မႃး ၼႆႉ ၵူၼ်းၸပ်းတၢင်းပဵၼ် ထိုင်ႁူဝ် ပၢၵ်ႇ ႁူဝ်ႁဵင်သေတႃႉ ယၢမ်းလဵဝ် ၵူၼ်းၸပ်း ဢမ်ႇပေႃး ၽႄႈၼမ် ယဝ်ႉလႄႈ ၵူၼ်းမိူင်းၵေႃႈ လိုၼ်ႈတၢင်းပဵၼ်သေ ၵႂႃႇမႃး ၶဝ်ႈဢွၵ်ႇၵၼ်ၶိုၼ်း၊ ၵမ်ႈၽွင်ႈ ပေႃးဢမ်ႇသႂ်ႇၽႃႈပူၵ်ႉပၢၵ်ႇ၊ ဢမ်ႇသူႈလၢင်ႉမိုဝ်းၵေႃႈမီးမႃး။ ၵူၼ်းၸိူဝ်းမႆႈၸႂ်တႄႉ တိုၵ်ႉၾၢင်ႉယူႇ ၾၢင်ႉၵိၼ်ၵၼ် သေ ၵႂႃႇမႃးယူႇ လႆႈႁူႉၼင်ႇၼႆ။