ၵူၼ်းမိူင်း သီႇသႅင်ႇ ၵႂႃႇမႃး ၵႃႉၶၢႆယၢပ်ႇ ၶၢင်းပွင်ႉ တႃႇႁႃၵိၼ်လဵင်ႉတွင်ႉ၊ ၽွင်းတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်း၊ ၾၢႆႇၽွင်းငမ်းဝဵင်းသမ်ႉ ပိုၼ်ၽၢဝ်ႇ သိုပ်ႇႁပ်းဝဵင်းၵႂႃႇထႅင်ႈ 7 ဝဵင်း။
ၾၢႆႇၽွင်းငမ်းဝဵင်းသီႇသႅင်ႇ၊ ၶွမ်ႊမတီႊ ၾၢႆႇၵုမ်းၵမ်တၢင်းပဵၼ်ၶူဝ်ႊဝိတ်ႉ ပိုၼ်ၽၢဝ်ႇဝႃႈ တႄႇဢဝ် ဝၼ်းတီႈ 16-22/2021 တႃႇၶၢဝ်းတၢင်းထႅင်ႈ 7 ဝၼ်း တေသိုပ်ႇႁဵတ်း Local Semi – Lockdown ထႅင်ႈ၊ ယွၼ်ႉ ဝႃႈ တၢင်း ပဵၼ်ၶူဝ်ႊဝိတ်ႉ 19 တိုၵ်ႉၽႄႈလၢမ်းႁႅင်းလႄႈ ၼင်ႇႁိုဝ် ပေႃးတေၵုမ်းၵမ်လႆႈတၢင်းပဵၼ် ယႃႇႁႂ်ႈၸပ်းၽႄႈၵၼ်။
“တွၼ်ႈတႃႇၵူၼ်းမိူင်းၼႂ်းပိုၼ်ႉတီႈတႄႉ ယၢပ်ႇၽိုတ်ႇၵၢၼ်ႁႃၵိၼ် လဵင်ႉတွင်ႉတႄႉတႄႉဢေႃႈ။ ႁဵတ်းသင် ၶၢႆသင်ၵေႃႈ ယၢပ်ႇ။ ဢၼ်ၶဝ်ပိုတ်ႇပၼ်သမ်ႉ ယၢမ်းၵၢင်ၼႂ် 5 မူင်းထိုင် 2 မူင်းဝၢႆးဝၼ်း။ ၸိူဝ်းႁႃၵိၼ်ယၢမ်းႁူဝ်ၶမ်ႈ ၵူၼ်း ၶၢႆၼိူဝ်ႉ ယၢင်ႈ ႁၢၼ်ႉၶဝ်ႈၽၵ်း ၸိူဝ်းၼႆႉ တေႁဵတ်းႁိုဝ်။ ယၢပ်ႇၽိုတ်ႇၵူၼ်းၸိူဝ်းႁႃၵိၼ်လဵင်ႉတွင်ႉထႅင်ႈၶႃႈဢေႃႈ”- ၵူၼ်း ၼုမ်ႇပိုၼ်ႉတီႈသိုပ်ႇလၢတ်ႈထႅင်ႈ။
ၽူႈမီးပုၼ်ႈၽွၼ်း ၾၢႆႇပၢႆးယူႇလီၸႄႈဝဵင်း လူင်းပိုၼ်ႉတီႈ ၵူတ်ႇထတ်း တၢင်းပဵၼ်ၶူဝ်ႊဝိတ်ႉ ထိုင် ပိၵ်ႇထိူၼ်ႇ ႁၢၼ်ၶိူဝ်း၊ ၼႂ်းၸႄႈဝဵင်းသီႇသႅင်ႇ လၢႆဝၢၼ်ႈ လၢႆဢိူင်ႇ။
ၼႂ်းၸႄႈဝဵင်းသီႇသႅင်ႇ မီးၵူၼ်းတိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 1,000 ပၢႆ တၢႆ 20 ပၢႆ။ ဢၼ်တိုၵ်ႉ ယူတ်းယႃ ဝႆႉယူႇၵေႃႈမီး။
ၵူၼ်းၼုမ်ႇ သီႇသႅင် လၢတ်ႈတီႈၽူႈတွႆႇႁွၵ်ႈဝႃႈ – “ဝဵင်းသီႇသႅင်ႇႁဝ်းၶႃႈၼႆႉသမ်ႉ ၸမ်ဝႆႉဝဵင်းၾၢႆၶုၼ် ၸပ်ႈဝႆႉၸႄႈ မိူင်းယၢင်းလႅင်လႄႈ ၶဝ်ၵူဝ်ပၼ်ႁႃၾႆးတၢင်းပုၼ်ႉလၢမ်းမႃးတၢင်းၼႆႉ ဢမ်ႇၼၼ်ၵေႃႈ ၵူဝ်ၵူၼ်းပၢႆႈၽေးတၢင်းၼၼ်ႉ မႃးႁိုဝ်ဢမ်ႇႁူႉ ပဵၼ်ၵွပ်ႈၸိူင်ႉၼၼ်ၵွႆးၶႃႈယူဝ်ႉ”- ဝႃႈၼႆ။
ၾၢႆၶုၼ် မိူင်းပၢႆး ၼႆႉ ၵူၼ်းမိူင်း ယိပ်းၵွင်ႈၵၢင်ႇ လုၵ်ႉႁိုၼ်သၢၼ်ႇၶတ်း ၸုမ်းသိုၵ်းမၢၼ်ႈယိုတ်းဢႃႇၼႃႇ။ ၶွင်ႇသီႇသိုၵ်းမၢၼ်ႈ ၵေႃႈ ထႅမ်ႁႅင်းသိုၵ်းၵႂၢတ်ႇလၢင်ႉ ၸုမ်း ၵႅတ်ႇၵင်ႈၵူၼ်းမိူင်း PDF။ ဝဵင်း တေႃႇ ဝဵင်း ၾၢႆၶုၼ် တင်း သီႇသႅင်ႇ ၵႆၵၼ် မွၵ်ႈ 80 ၵီႇလူဝ်ႇ၊ ပေႃးႁေႃႈၵႃး မွၵ်ႈ 2 ၸူဝ်ႈမူင်း။
ၸႄႈဝဵင်းႁူဝ်ပူင်း၊ သီႇသႅင်ႇ လႄႈ ပၢင်လွင်း ၼႆႉ (ပိူင်ပိုင်းလၵ်းမိူင်း 2008 သိုၵ်းမၢၼ်ႈ မၵ်းမၢႆပဵၼ် ၼႃႈလိၼ်ၽွင်းငမ်း တူဝ်ၵဝ်ႇပဢူဝ်း) ၾၢႆႇၽွင်းငမ်း ၶဝ် ပိၵ်ႉႁပ်း Local Semi – Lockdown ဝႆႉ တင်း 3 ၸႄႈဝဵင်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ