ၶၢဝ်းတၢင်းပိၵ်ႉႁၢမ်ႈၵူၼ်းဢွၵ်ႇႁိူၼ်းၶိုင်ႈဝၼ်း ၼႂ်းၸႄႈဝဵင်းပၢင်လွင်း ၶၢဝ်းတၢင်း 15 ဝၼ်းၼႆႉ ၵူၼ်းၸပ်းတၢင်းပဵၼ်ၶူဝ်ႊဝိတ်ႉယွမ်းလူင်းသေတႃႉ ဢၼ်တၢႆသမ်ႉမီးၵေႃႉၼိုင်ႈ လႄႈ ၵူၼ်းမိူင်းသိုပ်ႇလႆႈၸႂ်ၵၼ်ႁဵတ်း Local Semi – Lockdown ပိၵ်ႉဝဵင်း ၵႂႃႇထႅင်ႈ တႃႇၶၢဝ်းတၢင်း 7 ဝၼ်း  ။

တႄႇဢဝ် ဝၼ်းတီႈ 15-21/11/2021 ယူႇတီႈၾၢႆႇၽူႈမီးပုၼ်ႈၽွၼ်း ၼႂ်းၸႄႈဝဵင်းပၢင်လွင်း (ၼႃႈလိၼ်ၽွင်းငမ်းတူဝ်ၵဝ်ႇ ပဢူဝ်းၼႂ်းပိူင်ငဝ်ႈပိုင်းမိူင်း 2008 ) ၸႄႈ တွၼ်ႈတူၼ်ႈတီး ၸိုင်ႈတႆးပွတ်းၸၢၼ်း ပိုၼ်ၽၢဝ်ႇ သိုပ်ႇ Semi – Lockdown ၵႂႃႇထႅင်ႈ 7 ဝၼ်း  တႃႇႁႂ်ႈတၢင်းပဵၼ်ၶူဝ်ႊဝိတ်ႉ 19 တေဢမ်ႇၽႄႈလၢမ်းႁႅင်းထႅင်ႈ   ဝႃႈၼႆ။

ၵူၼ်းၼုမ်ႇ ပိုၼ်ႉတီႈ ပၢင်လွင်း လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ သိုပ်ႇပိၵ်ႉဢိုတ်းထႅင်ႈ တႃႇၶၢဝ်းတၢင်း 7 ဝၼ်း တေႃႇထိုင် ဝၼ်းတီႈ 21 ၼႆႉၶႃႈ။ ၸူဝ်ႈပိၵ်ႉဢိုတ်းမႃးၼႆႉ တေလႆႈဝႃႈ တၢင်းပဵၼ်ၼႆႉ လူတ်းယွမ်းလူင်းမႃးၶႃႈယဝ်ႉ တႄႇဢဝ် ဝၼ်းတီႈ 1 ၼၼ်ႉမႃး။ ဢၼ်သိုပ်ႇ ပိၵ်ႉ ဢိုတ်း ၵႂႃႇထႅင်ႈၼႆႉ ၼင်ႇႁိုဝ် ပေႃးတေၵုမ်းၵမ်လႆႈ တၢင်းပဵၼ် ႁႂ်ႈပေႃးလူတ်းယွမ်းလူင်းထႅင်ႈၶႃႈဢေႃႈ။ ၸူဝ်ႈလွၵ်ႉတွင်းၼႆႉ  ၵူၼ်းပဵၼ်ၶူဝ်ႊ ဝိတ်ႉ 19 လူႉတၢႆၵႂႃႇ ၵေႃႉ 1 ၶႃႈ”- ဝႃႈၼႆ။

ၸႄႈဝဵင်းပၢင်လွင်းၼႆႉ  ပိၵ်ႉဢိုတ်းဝႆႉ ၸူဝ်ႈၶၢဝ်း Local Semi – Lockdown မႃး တင်ႈတႄႇ ဝၼ်းတီႈ 1-14/11/2021  ႁွပ်ႈၼိုင်ႈသေ တေပိၵ်ႉထႅင်ႈ တႄႇဢဝ် ဝၼ်းတီႈ 15-21/11/2021 ထႅင်ႈႁွပ်ႈၼိုင်ႈ ဝႃႈၼႆ။

ၵူၼ်း  ပၢင်လွင်း လၢတ်ႈတီႈၽူႈတွႆႇႁွၵ်ႈဝႃႈ – “ၵၢတ်ႇလူင်တႄႉ ပိုတ်ႇပၼ်ၵူၼ်းမိူင်းသိုဝ်ႉၸၢႆႇ တႄႇဢဝ် ၵၢင်ၼႂ် 6 မူင်းထိုင် 1 မူင်းဝၢႆး ဝၼ်း ႁဵတ်းၼႆၶႃႈဢေႃႈ။ ၵူၺ်းၵႃႈ ၶၼ်ၵုၼ်ႇတႄႉ ယင်းပႆႇယွမ်းလူင်းၶိုၼ်းၶႃႈ။ ဢၼ်ယၢပ်ႇၽိုတ်ႇတႄႉ ယွၼ်ႉၶၼ်ၵုၼ်ႇၶိုၼ်ႈၼႆႉၶႃႈဢေႃႈ ၵူၼ်း မိူင်းတႄႉ။ ၶိုၼ်ႈၵူႈမဵဝ်း ပေႃးၶိုၼ်ႈၼႆၵေႃႈ ၶိုၼ်ႈပဵၼ်ၶိုင်ႈ ႁဵတ်းၼႆၶႃႈဢေႃႈ”- ဝႃႈၼႆ။

တၢင်းပဵၼ်ၶူဝ်ႊဝိတ်ႉ 19 ၼႂ်းၸႄႈဝဵင်းပၢင်လွင်း ပွၵ်ႈၵမ်းသၢမ် ႁၢၼ်ႉတေႃႇထိုင် ဝၼ်းတီႈ 17/11/2021 ၼႆႉ တင်းမူတ်းၵူတ်ႇထတ်းႁၼ် 2,335 ၵေႃႉ၊ လူႉတၢႆ 23 ၵေႃႉ၊ တိုၵ်းယူတ်းယႃဝႆႉ 49 ၵေႃႉ ႁွင်ႈၵၢၼ်ပၢႆးယူႇလီ ဝဵင်းပၢင်လွင်း ဢွၵ်ႇဝႆႉၼင်ႇၼႆ။