ၼႂ်းၶၢဝ်းတၢင်းၽၢၵ်ႇလိူၼ်မႃးၼႆႉ ၸႄႈဝဵင်းမိူင်းၼၢႆးၵူတ်ႇထတ်းႁၼ် ၵူၼ်းတိတ်းၸပ်းၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 မီးၵႂႃႇ 110 ပၢႆယဝ်ႉ ဝႃႈၼႆ။
တႄႇဢဝ် ဝၼ်းတီႈ 1-16/11/2021 မႃးၼႆႉ ၼႂ်းၸႄႈဝဵင်းမိူင်းၼၢႆး ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း ယူႇတီႈၽူႈမီးပုၼ်ႈၽွၼ်း လႄႈ ၾၢႆႇပၢႆးယူႇလီ လႆႈၵူတ်ႇထတ်း ၵူၼ်းပိုၼ်ႉတီႈ တင်းမူတ်း 1,430 ၵေႃႉ။ ၼႂ်းၼၼ်ႉ ထူပ်းႁၼ် ၵူၼ်းတိတ်းၸပ်း ၸိူဝ်ႉမႅင်း 119 ၵေႃႉ ၼႆ ယဝ်ႉ။
ၽူႈတူင်ႉၼိုင်ၼႂ်းတူင်ႇဝူင်းၵူၼ်း ဝဵင်းမိူင်းၼၢႆး လၢတ်ႈတီႈၽူႈတွႆႇႁွၵ်ႈဝႃႈ – “ၸွမ်းၼင်ႇ သဵၼ်ႈမၢႆ ႁူဝ်ႁုပ်ႈၼႂ်းပီ 2021 ၼႆႉ ၵူၼ်းလူႉတၢႆ ယွၼ်ႉ တၢင်းပဵၼ်ၶူဝ်ႊဝိတ်ႉ ၽူႈၸၢႆး 2 ၵေႃႉ၊ ၽူႈယိင်း 3 ၵေႃႉလႄႈ သင်ၶၸဝ်ႈ 1 တူၼ်။ ၼႂ်းလိူၼ်ၼႆႉၵူၺ်း ၵူၼ်းၵူတ်ႇထတ်းၸိူဝ်ႉမႅင်း တင်းမူတ်း 1,430 ၵေႃႉ ၼႂ်းၼၼ်ႉ ထူပ်းႁၼ်ၵူၼ်းတိတ်းၸပ်းၸိူဝ်ႉမႅင်း 119 ၵေႃႉ ပေႃးဢဝ်ႁူဝ်ဝၢၵ်ႈမၼ်းဝႃႈၸိုင် 8.32 % ”- ဝႃႈၼႆ။
ဢိင်ၼိူဝ် လွင်ႈတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်းၼႆႉသေ ယူႇတီႈၽူႈမီးပုၼ်ႈၽွၼ်းလႄႈ ၾၢႆႇပၢႆးယူႇလီ ႁူမ်ႈၵၼ် လူင်းပိုၼ်ႉတီႈ ၵူတ်ႇထတ်းၸႅတ်ႈပၼ်ၵူၼ်းမိူင်းပိုၼ်ႉတီႈ ထိုင်တီႈပေႃးလႆႈ ၽိတ်းမေႃးၵၼ် ၸိူဝ်းၼႆၵေႃႈမီး ဝႃႈၼႆ။
ၵူၼ်းၼုမ်ႇ မိူင်းၼၢႆး လၢတ်ႈတီႈၽူႈတွႆႇႁွၵ်ႈဝႃႈ – “ပူၼ်ႉမႃးပႆႇႁိုင်သင် တီႈၼႂ်းဝဵင်းၼႆႉ ယူႇတီႈၽူႈမီးပုၼ်ႈၽွၼ်း ၾၢႆႇပၢႆးယူႇလီၶဝ် လူင်းပိုၼ်ႉတီႈ ၵူတ်ႇထတ်းတၢင်းပဵၼ်ၸီးၶူးၼင်ပၼ်ၵူၼ်းမိူင်း၊ ၵူၼ်းမိူင်းသမ်ႉ ဢမ်ႇၶႂ်ႈၸီးသေ ထိုင်တီႈပေႃးလႆႈ ၽိတ်းမေႃးၵၼ် ၸိူင်ႉၼႆၵေႃႈမီးဢေႃႈ”- ဝႃႈ ၼႆ။
တၢင်းပဵၼ်ၶူဝ်ႊဝိတ်ႉ 19 ပွၵ်ႈၵမ်းသၢမ် ၽႄႈလၢမ်းႁၢဝ်ႈႁႅင်း ၼႂ်းၸႄႈဝဵင်းမိူင်းၼၢႆး ႁၢၼ်ႉတေႃႇထိုင် ဝၼ်းတီႈ 16/11/2021 ၼႆႉ တင်းမူတ်း မီးၵႂႃႇယဝ်ႉ 391 ၵေႃႉ ဝႃႈၼႆ။
ၵဵဝ်ႇလူၺ်ႈလွင်ႈတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းၸိူင်ႉၼႆၼႆႉ သင်ၸႅတ်ႈၼမ်ၵေႃႈ တေထူပ်းႁၼ်ၼမ်လႄႈ မိူဝ်ႈဢွၼ်တၢင်းတႄႉ ဢမ်ႇလူင်း ၸႅတ်ႈၼႂ်းပွၵ်ႉၼႂ်းယွမ်ႇ ၸိူင်ႉၼႆ ၽူႈတူင်ႉၼိုင် ၼႂ်းတူင်ႇဝူင်းၵူၼ်းလၢတ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ