ၼႂ်းၸႄႈဝဵင်းမိူင်းၵူဝ်းလႄႈ သႅၼ်ဝီ ၼႂ်းၸိုင်ႈတႆးပွတ်းႁွင်ႇ ရူတ်ႉၵႃး ထႅမ်ႁႅင်းသိုၵ်းမၢၼ်ႈ ထုၵ်ႇသိုၵ်းၵဝ်ႈၵၢင်ႉ/ ၵူဝ်းၵၢင်ႉ လူမ်ႇယိုဝ်းၵွႆ ၼႂ်းဝၼ်း လဵဝ် 9 လမ်း သိုဝ်ႇၶၢဝ်ႇ ၵူဝ်းၵၢင်ႉ The Kokang ဢွၵ်ႇ ဝႆႉၼင်ႇၼႆ။
ဝၼ်းတီႈ 11/11/2021 ယၢမ်းၵၢင်ၼႂ် ရူတ်ႉၵႃး ထႅမ်ႁႅင်းသိုၵ်း သိုၵ်းမၢၼ်ႈ ယိုတ်း မိူင်း 28 လမ်း ဢၼ်လုၵ်ႉ ၸႄႈဝဵင်းသႅၼ်ဝီၵႂႃႇမုင်ႈၸူး ၸႄႈဝဵင်းၵုၼ်လူင်ၼၼ်ႉ ထုၵ်ႇသိုၵ်းၵဝ်ႈ ၵၢင်ႉ မူၵ်းယိုဝ်းၸွမ်းတၢင်း ၼႂ်းၵႄႈၼမ်ႉၸလၢပ်ႈ ၸႄႈဝဵင်းသႅၼ်ဝီ လႄႈ ၵုၼ်လူင် လူႉၵွႆ 2 လမ်း။ ထိုင်မႃး ယၢမ်းဝၢႆးဝၼ်းမွၵ်ႈ 3 မူင်း ထုၵ်ႇယိုဝ်းထႅင်ႈ တီႈမၢႆလၵ်း 37-38 ၵွႆထႅင်ႈ 5 လမ်း ႁူမ်ႈၵၼ် တင်းမူတ်း 7 လမ်း ၼႆယဝ်ႉ။
မိူဝ်ႈဝႃး ဝၼ်းတီႈ 11/11/2021 ယၢမ်းဝၢႆးဝၼ်း မွၵ်ႈ 3 မူင်းၶိုင်ႈပၢႆ ၶွင်ႇသီႇသိုၵ်းမၢၼ်ႈ ထႅမ်ႁႅင်း သိုၵ်းမုင်ႈၸူး တပ်ႉပၢင်သဝ်း သိုၵ်းၵဝ်ႈၵၢင်ႉ ဢၼ်ပၵ်းဝႆႉတီႈမိူင်းၵူဝ်းၼၼ်ႉ လႆႈပဵၼ်ပၢင်တိုၵ်းၵၼ် သေ တင်းသွင်ၾၢႆႇ မီးလွင်ႈမၢတ်ႇၸဵပ်းလူႉတၢႆၼင်ႇၵၼ် ၵူၺ်းသဵၼ်ႈမၢႆတႅတ်ႈတေႃးတႄႉ ပႆႇႁူႉ ဝႃႈၼႆ။
ၼႂ်းၸႄႈဝဵင်းမိူင်းၵူဝ်းၼႆႉ ႁၢၼ်ႉတေႃႇထိုင်ယၢမ်းလဵဝ် ၶွင်ႇသီႇသိုၵ်းမၢၼ်ႈ ယိုတ်းမိူင်းတင်း သိုၵ်း ၵဝ်ႈၵၢင်ႉ တိုၵ်ႉၶဵင်ႈၶႅင်ၵၼ်ဝႆႉႁၢဝ်ႈႁႅင်း ပၢင်တိုၵ်း တႄႉ တေၵိူတ်ႇၶိုၼ်ႈပဵၼ်လႆႈၵူႈၶၢဝ်း ၼႆယဝ်ႉ။
ၸွမ်းလႅၼ်လိၼ် တႆး – ၶႄႇ ၸႄႈဝဵင်းပၢင်ႇသၢႆးၼႆႉ ယွၼ်ႉၶွင်ႇသီႇသိုၵ်းမၢၼ်ႈ ယိုတ်းမိူင်းလႄႈ သိုၵ်းၵဝ်ႈၵၢင်ႉ ပဵၼ်ပၢင်တိုၵ်းၵၼ်မႃးႁၢဝ်ႈႁႅင်းသေ တုမ်ႉတိူဝ်ႉၵူၼ်းမိူင်းၼႂ်းပိုၼ်ႉတီႈ လႆႈပၢႆႈယၢၼ် ႁိူၼ်းယေးၵၼ် ၼပ်ႉႁူဝ်ႁဵင် ၼႆယဝ်ႉ။
