ၵူၼ်းမိူင်းသီႇသႅင်ႇ မၢင်ဝၢၼ်ႈ လၢတ်ႈဝႃႈ ဢမ်ႇမီးလွင်ႈယုမ်ႇယမ်ၼႆသေ ဢမ်ႇယွမ်းၵႂႃႇၵူတ်ႇတၢင်းပဵၼ်ၶူဝ်ႊဝိတ်ႉ 19 တီႈႁူင်းယႃ။
ၵူၼ်းမိူင်းပိုၼ်ႉတီႈ မၢင်ဝၢၼ်ႈ ၼႂ်းၸႄႈဝဵင်းသီႇသႅင်ႇ ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း ၸိူဝ်းဢႆ၊ ၶေႃးၸဵပ်းဝႆႉၼၼ်ႉ ဢမ်ႇယွမ်း ၵႂႃႇပၼ်ၾၢႆႇပၢႆးယူႇလီၵူတ်ႇထတ်းပၼ်တၢင်းပဵၼ်ၶူဝ်ႊဝိတ်ႉ ယွၼ်ႉဢမ်ႇမီးလွင်ႈယုမ်ႇယမ် ၊ ယွၼ်ႉဝႃႈမၼ်းပဵၼ်ၶၢဝ်းရႃႇသီႇဢုတုလႅၵ်ႈလၢႆႈၵူၺ်းၼႆယဝ်ႉ။
ၵူၼ်းသီႇသႅင်ႇ လၢတ်ႈတီႈၽူႈတွႆႇႁွၵ်ႈဝႃႈ -“ၵူၼ်းတၢင်းဝၢၼ်ႈ ဢမ်ႇၶႆႈၵႂႃႇၵူတ်ႇထတ်း တၢင်းပဵၼ် တီႈႁူင်းယႃ ။ ဢမ်ႇယွမ်း ၵႂႃႇ ၵူတ်ႇထတ်းၶႃႈ။ ၶဝ်ဝႃႈၵူႈပီပူၼ်ႉမႃးၵေႃႈ ပေႃးပဵၼ်ၶၢဝ်းၼႆႉၾိင်ႈၾႃႉရႃႇသီႇလႅၵ်ႈလၢႆႈလႄႈ ပဵၼ်ဢႆ ၶေႃးၸဵပ်းယူႇႁင်းၽႂ်မၼ်း ၵူႈပီ။ ယဝ်ႉၵေႃႈ ယၢမ်းလဵဝ် ပဵၼ်ၶၢဝ်းလူဝ်ႇပၢတ်ႇၶဝ်ႈ ဢဝ်ၶဝ်ႈသေ လႆႈယူႇၼႂ်းၼမ်ႉၼႂ်းၼႃး တၢၵ်ႇလႅတ်ႇတင်းဝၼ်းလႄႈ ဢွၼ်ၵၼ်ပဵၼ်ၶေႃးၸဵပ်း၊ ဢႆ မိူၼ်ၵူႈပီၵူၺ်း။ ဢၼ်ၼႆႉသမ်ႉ ပေႃးၾၢႆႇပၢႆး ယူႇလီမႃးၸႅတ်ႈၼႆ သမ်ႉဝႃႈ ပဵၼ် Positive မီးမႅင်းၶူဝ်ႊဝိတ်ႉ ၼႆတိၵ်းတိၵ်းသေ ႁဵတ်းႁႂ်ႈၵူၼ်းဝၢၼ်ႈၵၢတ်ႈ ၵၢၼ်ၵၢတ်ႈငၢၼ်းၵူၺ်း – ဢွၼ်ၵၼ်ဝႃႈၼႆၶႃႈဢေႃႈၼႆႉ။ မၢင်ၵေႃႉသမ်ႉဝႃႈ ႁဝ်းဢမ်ႇလႆႈၵႂႃႇတီႈလႂ်လူး ႁဝ်းသမ်ႉၵႂႃႇၸပ်းၸိူဝ်ႉမႅင်းတီႈလႂ် ဝႃႈၼႆၶႃႈဢေႃႈ”- ဝႃႈၼႆ။
ဢိင်ၼိူဝ် တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်း ၼႂ်းၸႄႈဝဵင်းသီႇသႅင်ႇၼႆႉသေ ယူႇတီႈၽူႈမီးပုၼ်ႈၽွၼ်း လႆႈသင်ႇပိၵ်ႉဢိုတ်းဝဵင်း Semi Lockdown ဝႆႉတႃႇၶၢဝ်းတၢင်း 14 ဝၼ်းတႄႇဢဝ် ဝၼ်းတီႈ 1-14/11/2021 ၼႆႉ။
“ၸႂ်ႈၶႃႈဢေႃႈ တီႈဝဵင်းသီႇသႅင်ႇတႄႉ ပိၵ်ႉမိူင်းဝႆႉတေႃႇထိုင် ဝၼ်းတီႈ 14 ၼႆႉၶႃႈဢေႃႈ။ ၵူၺ်းၵႃႈ ၶၢဝ်းယၢမ်းပိၵ်ႉ ဝဵင်း သမ်ႉတႄႇဢဝ် 11 မူင်းၵၢင်ဝၼ်း ထိုင် 3 မူင်းဝၢႆးဝၼ်းၵူၺ်းၶႃႈ။ ဢၼ်ပိၵ်ႉဢိုတ်းဝႆႉသမ်ႉ တေပဵၼ်ဝၢၼ်ႈၸိူဝ်းယူႇၸွမ်း တၢင်းလူင် မိူၼ်ၼင်ႇ ဝၢၼ်ႈၼွင်ဝွၼ်၊ ဝၢၼ်ႈယဵၼ်ႇ၊ သၢႆးၶၢဝ် ၸိူဝ်းၼႆႉ ။ ၸဵမ်ရူတ်ႉ ၸဵမ်ၵူၼ်း တိုၼ်းဢမ်ႇပၼ်ၵႂႃႇမႃး ၶႃႈ။”- ၵူၼ်းၼွင်ဝွၼ် လၢတ်ႈတီႈၽူႈ တွႆႇႁွၵ်ႈၼင်ႇၼႆ။
ၽွင်းၶၢဝ်းတၢင်းပိၵ်ႉဢိုတ်း ၸူဝ်ႈၶၢဝ်း 10 ဝၼ်းပၢႆၼႆႉၵေႃႈ ၼႂ်းၸႄႈဝဵင်းသီႇသႅင်ႇ ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 ယင်းတိူဝ်းၶိုၼ်ႈ မီးယူႇ ၵူႈဝၼ်း ၵူၼ်းသီႇသႅင်ႇလၢတ်ႈ။
ယွၼ်ႉၼၼ်လႄႈ ၼင်ႇႁိုဝ် တၢင်းပဵၼ်ၶူဝ်ႊဝိတ်ႉ 19 ပေႃးတေဢမ်ႇၽႄႈလၢမ်းႁႅင်း ပေႃးတေလူတ်းယွမ်းလူင်းၵႂႃႇၼၼ်ႉ ၼႂ်းၸႄႈဝဵင်းသီႇသႅင်ႇ ပၼ်ၶႂၢင်ႉဢွၵ်ႇႁိူၼ်းၵႂႃႇၸၢႆႇၵၢတ်ႇ ၼိုင်ႈႁိူၼ်းလႂ် ၼိုင်ႈၵေႃႉ တေလႆႈမီးဝႂ်ၵၢတ်ႇ။ ဝႂ်ၵၢတ်ႇၼၼ်ႉ တိုၵ်ႉႁဵတ်းပၼ်ၶႂၢင်ႉၸႂ်ႉၵၼ်မႃး တိုၵ်ႉမီးဝၼ်းသွင် ဝၼ်းၼႆႉမႃးၵူၺ်း ဝႃႈၼႆ။