ၽွင်းပိၵ်ႉဢိုတ်း ၸူဝ်ႈၶၢဝ်း Local Semi Lockdown ဝႆႉၼႆႉ ၸႄႈဝဵင်းမွၵ်ႇမႆႇ မီးၵူၼ်းတိတ်းၸပ်းၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 ပုင်ႈၶိုၼ်ႈ မႃးၵူႈဝၼ်း မီးၵူၼ်းလူႉတၢႆၵႂႃႇယဝ်ႉ 4 ၵေႃႉ။
တႄႇဢဝ် ဝၼ်းတီႈ 2-15/11/2021 ၼႂ်းၸႄႈဝဵင်းမွၵ်ႇမႆႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း တႄႇပိၵ်ႉဢိုတ်း Semi Lockdown ဝႆႉၸူဝ်ႈၶၢဝ်း မၵ်ႈမၼ်ႈပၼ်ၶဝ်ႈယၢမ်း ဢွၵ်ႇႁိူၼ်းယေး/ ပိုတ်ႇႁၢၼ်ႉၶၢႆၶူဝ်းၵၼ် တႄႇဢဝ်ၵၢင်ၼႂ် 6 မူင်းၸဝ်ႉ ထိုင် 12 မူင်းၵၢင်ဝၼ်း။ သင်ဝႃႈ 12 မူင်းဝၢႆးဝၼ်းၵႂႃႇယဝ်ႉ တေဢမ်ႇလႆႈဢွၵ်ႇႁိူၼ်းၵၼ် ႁၢမ်ႈဝႆႉၸိူင်ႉၼႆသေတႃႉ ၵူၼ်းတိတ်းၸပ်းၸိူဝ်ႉမႅင်း တိုၵ်ႉတိူဝ်းမႃးထႅင်ႈယူႇၵူႈဝၼ်း ၼႆ ယဝ်ႉ။
ၵူၼ်းပိုၼ်ႉတီႈမွၵ်ႇမႆႇ လၢတ်ႈတီႈၽူႈတွႆႇႁွၵ်ႈဝႃႈ – “ၼႂ်းဝူင်ႈၼႆႉ တီႈမွၵ်ႇမႆႇႁဝ်းၶႃႈ ယွၼ်ႉၶူဝ်ႊဝိတ်ႉ 19 ၼႆႉသေ မၼ်းႁၢဝ်ႈႁႅင်းမႃးၼႃႇၶႃႈ။ ၵူၼ်း ပဵၼ်ၵေႃႈမီးၼမ်မႃး။ မိူၼ်ၸိူင်ႉမိူဝ်ႈဝၼ်းသိုၼ်းၼၼ်ႉ ၵူၼ်ပဵၼ် တေမီးမွၵ်ႈ 40 ပၢႆ ၼိုင်ႈဝၼ်းၵူၺ်း မိူဝ်ႈဝႃးသမ်ႉ 20 ၵေႃႉမွၵ်ႈၼႆႉၶႃႈ”- ဝႃႈၼႆ။
ၵူၺ်းၵႃႈ ဝဵင်းမွၵ်ႇမႆႇ လွၵ်ႉတွင်း ၸူဝ်ႈၶၢဝ်းၼႆသေတႃႉ ၵူၼ်းပဵၼ်ၼႆႉ တိုၵ်ႉတိူဝ်းၶိုၼ်ႈယူႇၵူႈဝၼ်းလႄႈ ၵူၼ်းမိူင်းၵမ်ႈၽွင်ႈဝႃႈ ယွၼ်ႉဢမ်ႇဢွၼ် ၵၼ်ႁဵတ်းၸွမ်းပၵ်းပိူင်မၢႆမီႈ ၾၢႆႇပၢႆးယူႇလီၶဝ်တမ်းဝၢင်းဝႆႉပၼ်ၼၼ်ႉ ဝႃႈၼႆ။
“တီႈႁဝ်းၶႃႈၼႆႉ ႁဵတ်းသင်လႄႈ မၼ်းၼမ်ၶိုၼ်ႈၼႆ ယူႇတီႈၶႃႈႁၼ်ထိုင်တႄႉ ၵမ်ႈၽွင်ႈ ၵူၼ်းႁိူၼ်းပဵၼ်ဝႆႉ တၢင်းပဵၼ်ၼႆ ၵူၼ်းၼႂ်းႁိူၼ်းၼၼ်ႉ ဢွၵ်ႇႁိူၼ်းယေးၵၼ် ၸိူင်ႉၼႆၵေႃႈမီး တူဝ်ႁဝ်း ဢမ်ႇပဵၼ်သေတႃႉဝႃႈၼႆ ယွၼ်ႉၵူၼ်းၼႂ်းႁိူၼ်းႁဝ်းၶႃႈပဵၼ်လႄႈ ႁဝ်းၶႃႈ တေလႆႈၵၵ်းတူဝ်ၸွမ်း ၶႃႈဢေႃႈ။ ၼႆႉသမ်ႉ ဢမ်ႇၸႂ်ႈၸိူင်ႉၼႆ သမ်ႉဢွၵ်ႇလေႇတၢင်းၼွၵ်ႈယူႇႁဵတ်းၼႆၶႃႈဢေႃႈၼႆႉ မဵဝ်းၼႆတႄႉ ဢမ်ႇထုၵ်ႇလီပဵၼ် ၶႂ်ႈဝႃႈတႄႉ ၵွပ်ႈႁဝ်းသေ ၽႄႈတၢင်းပဵၼ်ပၼ်ထႅင်ႈတၢင်ႇၵေႃႉၵူၺ်း”- ၵူၼ်းပိုၼ်ႉတီႈ သိုပ်ႇလၢတ်ႈၼႄၼင်ႇၼႆ။
တႄႇဢဝ် ဝၼ်းတီႈ 19/7/2021 ၼၼ်ႉမႃး တေႃႇထိုင် ဝၼ်းတီႈ 10/11/2021 ၼႆႉ ၼႂ်းၸႄႈဝဵင်းမွၵ်ႇမႆႇ ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်း 300 ပၢႆ လူႉတၢႆ 4 ၵေႃႉယဝ်ႉ ယူႇတီႈႁွင်ႈၵၢၼ်ပၢႆးယူႇလီဝဵင်းမွၵ်ႇမႆႇ ပိုၼ်ၽၢဝ်ႇဢွၵ်ႇဝႆႉၼင်ႇၼႆ။
