ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းမိူင်းၼၢႆး ၊ မွၵ်ႇမႆႇပိုၼ်ၽၢဝ်ႇဝႃႈ တေဢမ်ႇႁဵတ်းပွႆးယႂ်ႇလၢမ်းလူင်ႁပ်ႉပီမႂ်ႇတႆး

ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းမိူင်းၼၢႆး လႄႈဝဵင်းမွၵ်ႇမႆႇ ဢွၵ်ႇလိၵ်ႈပိုၼ်ၽၢဝ်ႇဝႃႈတေဢမ်ႇႁဵတ်းပွႆးယႂ်ႇလၢမ်းလူင်ႁပ်ႉပီမႂ်ႇတႆး 2118 ၼီႈ ၊ တေႁဵတ်းလွင်ႈလူႇတၢၼ်းသူင်ႇမဵတ်ႉတႃႇ ယွၼ်းသူးပၼ်ပီႈၼွင်ႉၼႂ်းမိူင်းတႆးပွတ်းႁွင်ႇ ၵႂႃႇၵူၺ်းယဝ်ႉဝႃႈၼႆ။

ၵူၼ်းၼုမ်ႇလုၵ်ႈၸုမ်းၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းမိူင်းၼၢႆးၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ လိၵ်ႈတႄႉႁဝ်းၶႃႈပိုၼ်ဢွၵ်ႇ ၸဵမ်မိူဝ်ႈဝၼ်းတီႈ 12/11/2023 ယဝ်ႉ လွင်ႈဝႃႈတေဢမ်ႇႁဵတ်းပွႆးမူၼ်ႈၵျေႃႇၵႃႈဝႅၼ်။ ႁဝ်းၶႃႈတေႁဵတ်းပၢင် ႁေႃးလိၵ်ႈလူင်၊ ၵၢပ်ႈသွမ်းၶဝ်ႈမႂ်ႇ၊ တေႁဵတ်းပၢင်တႅမ်ႈလင်ႇၵႃႇ ၵဵဝ်ႇၵပ်းလွင်ႈ “ၽေးသိုၵ်းသိူဝ်ပၢၼ်တႆးသုမ်းဝၢၼ်ႈမိူင်းယၢမ်းလဵဝ်” ၊ တေထွမ်ႇတြႃးပီမႂ်ႇသေတေဢွၼ်ၵၼ် ၼင်ႈတြႃးၼိမ်တူဝ်ၼိမ်ၸႂ်သူင်ႇမဵတ်ႉတႃႇပၼ်ၵူၼ်းမိူင်းတႆးၸိူဝ်းလႆႈထူပ်းၽေးသိုၵ်းသိူဝ်၊ ၸိူဝ်းလႆႈမၢတ်ႇၸဵပ်းလႄႈလူႉတႆၢယွၼ်ႉၽေးသိုၵ်းသိူဝ်၊ တေႁူမ်ႈၵၼ် ယွၼ်းသူးႁႂ်ႈပၢင်တိုၵ်းၸဵဝ်းယဝ်ႉတူဝ်ႈ၊ ႁႂ်ႈမိူင်းတႆးၸဵဝ်းလႆႈၵတ်းယဵၼ်”- ဝႃႈၼႆ။

လိၵ်ႈပိုၼ်ၽၢဝ်ႇၵေႃလိၵ်ႈလၢႆးလႄႈၾိင်ႈငႄႈတႆးဝဵင်းမိူင်းၼၢႆးၼၼ်ႉ ဢွၵ်ႇမႃးမိူဝ်ႈဝၼ်းတီႈ 12/11/2023 ။ ၼႂ်းၼၼ်ႉၵေႃႈပႃးဝႆႉဝႃႈ – ၵူၼ်းမိူင်းတႆးပွတ်းႁွင်ႇလႆႈပၢႆႈၽေးသိုၵ်းၵူႈဝဵင်း။ ယူႇတီႈၵေႃလိၵ်ႈလၢႆးဝဵင်းမိူင်းၼၢႆးၵေႃႈ သွၼ်ႇတႅၼ်းႁၼ်ထိုင်ၵၢင်ၸႂ် ပီႈၼွင်ႉမိူင်းတႆးပွတ်းႁွင်ႇ ဢၼ်ထူပ်းၽေးၶၢၼ်ၸႂ်ယွၼ်ႉပၢင်တိုၵ်းၼၼ်ႉသေ တေဢမ်ႇႁဵတ်းပွႆးမူၼ်ႈပွႆးသိူဝ်းယဝ်ႉ ဝႃႈၼႆဝႆႉ။

မိူၼ်ၼႆၼင်ႇၵဝ်ႇ ၵေႃလိၵ်ႈလၢႆးလႄႈၾိင်ႈငႄႈတႆးဝဵင်းမွၵ်ႇမႆႇၵေႃႈ ဝၼ်းတီႈ 15/11/2023 ၼႆႉ ဢွၵ်ႇလိၵ်ႈပိုၼ်ၽၢဝ်ႇၽိုၼ်ၼိုင်ႈ ။ ယွၼ်ႉပိူဝ်ႈပၢင်တိုၵ်းၼႂ်းၸိုင်ႈတႆးပွတ်းႁွင်ႇသေ တေဢမ်ႇၸတ်းပွႆးပီမႂ်ႇတႆး လူၺ်ႈပွႆးၵျေႃႇပွႆးမူၼ်ႈယဝ်ႉဝႃႈၼႆ။

ၽူႈၶဝ်ႈၵေႃလိၵ်ႈလၢႆးဝဵင်းမွၵ်ႇမႆႇလၢတ်ႈတီႈၽူႈတွႆႇႁွၵ်ႈဝႃႈ “ႁၼ်ၵူၼ်းမိူင်းတႆးလႆႈပၢႆႈၽေးသိုၵ်းပေႃးပဵၼ်ထၢၼ်ႇၼႆႉ ႁဵတ်းပွႆးၵေႃႈဢမ်ႇမီးတၢင်းၵျေႃႇလႆႈ။ ယွၼ်ႉၼၼ်တေႁဵတ်းပၢင်လူႇတၢၼ်းၵၢပ်ႈသွမ်းၶဝ်ႈမႂ်ႇၼမ်ႉမႂ်ႇသေ ယွၼ်းသူးပၼ်ၵူၼ်းပၢႆႈၽေးသိုၵ်းၵူၺ်းယဝ်ႉ”-ဝႃႈၼႆ။

UNOCHA တႄႉပိုၼ်ၽၢဝ်ႇဝႆႉဝႃႈ ပၢင်တိုၵ်း ၼႂ်းမိူင်းတႆးပွတ်းႁွင်ႇၼႆႉ ၵူၼ်းမိူင်းလႆႈပၢႆႈၽေးသိုၵ်းမီး 4 မိုၼ်ႇပၢႆယဝ်ႉဝႃႈၼႆ။