တေႃႇထိုင် ဝၼ်း တီႈ 12/11/2021 ၼႆႉ ၵူၼ်းဝဵင်းတႃႈလိူဝ်ႇ ၸိုင်ႈတႆးပွတ်းဢွၵ်ႇၶူင်း ၵူတ်ႇထတ်းႁၼ် ၵူၼ်းတိတ်းၸပ်းၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 မီးၵႂႃႇယဝ်ႉ 700 ပၢႆ လူႉတၢႆ 15 ၵေႃႉယဝ်ႉ ဝႃႈၼႆ။
ၵူၼ်းၼုမ်ႇ တႃႇလိူဝ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ်ၼႆႉ ၼႂ်းဝဵင်းတႃႈလိူဝ်ႇ ယဵၼ်တင်းမူတ်းယဝ်ႉၶႃႈ။ တၢင်းပဵၼ်ၼႆႉ လၢမ်း ၵႂႃႇႁႅင်း ၶႂ်ႈဝႃႈပဵၼ်ၵူႈဝၢၼ်ႈယဝ်ႉ။ ၼိုင်ႈဝၢၼ်ႈလႂ် 2-3 ၵေႃႉၼႆႉ တီႈဢေႇမၼ်းယဝ်ႉၶႃႈ။ ဢၼ်ၽိူမ်ႉၶိုၼ်ႈမႃးၼႆႉ ၸိူဝ်းဢမ်ႇယူႇလီသေ ၵႂႃႇၵူတ်ႇ ထတ်းႁၼ် ၸိူဝ်းၼႆႉၵေႃႈမီး၊ ၸိူဝ်းၵႂႃႇသိုဝ်ႉၶိူင်ႈမႃးသေ ၵူတ်ႇႁၼ် ၸိူဝ်းၼႆႉၵေႃႈမီး။ ယဝ်ႉၵေႃႈ ဢၼ်ႁူႉတူဝ်ဝႃႈပဵၼ်ၼႆသေ ယူႇ ႁိူၼ်းႁင်းၵူၼ်း ယူတ်းယႃ ၸိူဝ်းၼၼ်ၵေႃႈမီးတင်းၼမ်ၶႃႈဢေႃႈ။ လိူဝ်ၼၼ်ႉ သိုဝ်ႉယႃႈယႃမႃးၵိၼ်သေ ႁၢႆၵႂႃႇၸိူဝ်းၼႆႉၵေႃႈမီးၵၼ် တင်း ၼမ်ၶႃႈယဝ်ႉ။ ၾၢႆႇလူင် ပွင်ၸိုင်ႈၵေႃႈ ဢမ်ႇၸွႆႈသင် လႆႈသိုဝ်ႉၵိၼ်ႁင်းၵူၺ်းမူတ်းယႃႈယႃၼႆႉ”- ဝႃႈၼႆ။
မိူဝ်ႈဝႃး ဝၼ်းတီႈ 11/11/2021 ၼႆႉ တီႈဢိူင်ႇၼႃးယၢဝ်း ဝဵင်းတႃႈလိူဝ်ႇ ၵူတ်ႇထတ်းႁၼ် ၵူၼ်းတိတ်းၸပ်းထႅင်ႈ 23 ၵေႃႉ၊ ၸၢႆး 8 ၵေႃႉ ယိင်း 15 ၵေႃႉ ယူႇတီႈၾၢႆႇပွင်ႇၶၢဝ်ႇ/ ၾၢႆႇပၢႆးယူႇလီ ဝဵင်းတႃႈလိူဝ်ႇဢွၵ်ႇဝႆႉၼင်ႇၼႆ။
ဝဵင်းတႃႈလိူဝ်ႇ ၼႆႉ တင်းမူတ်းမီး 4 ပွၵ်ႈ 3 ဢိူင်ႇ ႁူဝ်ၵူၼ်းတေမီး 19,200 ပၢႆ ယူႇတီႈသိုဝ်ႇၶၢဝ်ႇ TNA (တႃႈၶီႈလဵၵ်းၼိဝ်းဢေႇၵျႅၼ်ႊသီႊ) ဢွၵ်ႇဝႆႉၼင်ႇၼႆ။
