ဝဵင်းတႃႈလိူဝ်ႇ ၸိုင်ႈတႆးပွတ်းဢွၵ်ႇၶူင်း ၵူတ်ႇထတ်းႁၼ် ၵူၼ်းတိတ်းၸပ်းၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 မီးၵႂႃႇယဝ်ႉ 700 ပၢႆ ဝႃႈၼႆ။
တၢင်းပဵၼ်ၶူဝ်ႊဝိတ်ႉ 19 ပွၵ်ႈၵမ်းသၢမ် ၽႄႈလၢမ်းႁၢဝ်ႈႁႅင်း ၼႂ်းဝဵင်းတႃႈလိူဝ်ႇ ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း တေႃႇထိုင် ဝၼ်း တီႈ 5/11/2021 ၼႆႉ မီးၵူၼ်းတိတ်းၸပ်းၵႂႃႇ 700 ပၢႆ လူႉတၢႆ 14 ၵေႃႉ ၼႆယဝ်ႉ။
ၵူၼ်း တႃႈလိူဝ်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ၵူၼ်းပဵၼ်ၼႆႉ ၶႂ်ႈဝႃႈမီးၵူႈဝၢၼ်ႈယဝ်ႉ ၼမ်လႄႈဢေႇ။ တီႈဝၢၼ်ႈၼႃးႁႆးလူင် လႄႈ ဝၢၼ်ႈဝဵင်းမၢၵ်ႇၼေႃႇၼၼ်ႉၵူၺ်း တေမီးမွၵ်ႈ 40 ၼႆႉၶႃႈဢေႃႈ။ ၵမ်ႈၼမ် ပဵၼ်ၵူၼ်းဢႃယုယႂ်ႇၶႃႈ။ ယဝ်ႉၵေႃႈ ၵူၼ်းမိူင်းႁဝ်းၶႃႈ ၼႂ်းပိုၼ်ႉ တီႈ မၢင်ၵေႃႉၵေႃႈ ၵူဝ်ဢမ်ႇႁတ်းၵႂႃႇၸႅတ်ႈၵၼ်ၵေႃႈမီးၼမ်ၶႃႈ။ မၢင်ၵေႃႉမီးဢၼ်ၸႅတ်ႈမၼ်းသေ ၸႅတ်ႈတူၺ်းႁူႉဝႃႈ ပဵၼ်ယဝ်ႉၼႆၵေႃႈ သိုဝ်ႉ ၵိၼ်ယႃႁင်းၽႂ်မၼ်း ၸိူဝ်းၼႆႉၵေႃႈ မီးၼမ်ၶႃႈဢေႃႈ”- ဝႃႈၼႆ။
ဢိင်ၼိူဝ် လွင်ႈၼႆႉ ၵူၼ်းမိူင်းပိုၼ်ႉတီႈ ဝဵင်းတႃႈလိူဝ်ႇ ၸိူဝ်းတိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 သေ ဢွၼ်ၵၼ်ယူတ်းယႃတူဝ် ယူႇတီႈ ႁိူၼ်းယေးၽႂ်မၼ်း ၸိူဝ်းၼႆၵေႃႈ မီးတင်းၼမ် ၼႆယဝ်ႉ။
ဝဵင်းတႃႈလိူဝ်ႇ ၼႆႉ တင်းမူတ်းမီး 4 ပွၵ်ႈ 3 ဢိူင်ႇ ႁူဝ်ၵူၼ်းတေမီး 19,200 ပၢႆ ယူႇတီႈသိုဝ်ႇၶၢဝ်ႇ TNA (တႃႈၶီႈလဵၵ်းၼိဝ်းဢေႇၵျႅၼ်ႊသီႊ) ဢွၵ်ႇ ဝႆႉၼင်ႇၼႆ။
ၼႂ်းၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 ပွၵ်ႈၵမ်းသၢမ် ႁၢၼ်ႉတေႃႇထိုင် ဝၼ်းတီႈ 5/11/2021 ၼႆႉ မီးၵႂႃႇယဝ်ႉ ၵူၼ်းပဵၼ် 3,358 ၵေႃႉ၊ ယႃၶႅၼ်း 2,972 ၵေႃႉလႄႈ လူႉတၢႆ 111 ၵေႃႉ ၼႆယဝ်ႉ။
