မိူင်းတႆးပွတ်းႁွင်ႇ ၸႄႈဝဵင်းၼမ်ႉၶမ်း ၵူတ်ႇထတ်းၵူၼ်းၶဝ်ႈဢွၵ်ႇဝဵင်း ႁၢဝ်ႈႁႅင်း သင်ၽူႈလႂ် ၽႂ်ဢမ်ႇမီးဝႂ်သမ်းယႃ ႁႄႉၵင်ႈၶူဝ်ႊဝိတ်ႉ 19 ၸိုင် ဢမ်ႇပၼ်ၵႂႃႇမႃး ၶဝ်ႈဢွၵ်ႇၵၼ်ယဝ်ႉ လႆႈႁူႉၼင်ႇၼႆ။
ဝၼ်းတီႈ 5/11/2021 မိူဝ်ႈၼႆႉ တၢင်းၶဝ်ႈဢွၵ်ႇဝဵင်းၼမ်ႉၶမ်း တီႈဝၢၼ်ႈၶမ်း သဵၼ်ႈတၢင်း ၼမ်ႉၶမ်း – မူႇၸေႊ တီႈၼိုင်ႈ၊ တီႈၶူဝ်လူင် သဵၼ်ႈ တၢင်း ၼမ်ႉၶမ်း – ထုင်ႉလွႆႁူဝ်သိူဝ် တီႈၼိုင်ႈ ယူႇတီႈၽူႈမီးပုၼ်ႈၽွၼ်း ၾၢႆႇယူႇလီ ၾၢႆႇၽွင်းငမ်းဝဵင်း တင်ႈၵဵတ်ႉလၢၼ်ႇ ၵူတ်ႇထတ်း ၽႂ်ဢမ်ႇမီး ဝႂ်သမ်းယႃ ဢမ်ႇပၼ်လတ်းၽၢၼ်ႇ ၶဝ်ႈဢွၵ်ႇၵႂႃႇမႃး။
ၵူၼ်းၼုမ်ႇ ပိုၼ်ႉတီႈ ၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “တႄႇမႃး ၸဵမ်မိူဝ်ႈဝၼ်းတီႈ 3 ဢေႃႈ။ သင်ၽႂ် ဢမ်ႇမီးဝႂ်သမ်းယႃ ႁႄႉၵင်ႈၶူဝ်ႊဝိတ်ႉၸိုင် ဢမ်ႇပၼ်ၶဝ်ႈဢွၵ်ႇၵႂႃႇမႃးယဝ်ႉ။ တေလႆႈသမ်း ယႃၵၼ်ၵူႈၵေႃႉ မီးဝႂ်သမ်းယႃၵၼ်ၵူႈ ၵေႃႉၵွၼ်ႇ ၸင်ႇတေလႆႈၶႂၢင်ႉၵႂႃႇမႃးလႆႈ” – ဝႃႈၼႆ။
ဢိင်ၼိူဝ် လွင်ႈၼႆႉသေ မိူဝ်ႈၼႆႉ ဝၼ်းတီႈ 5/11/2021 ၵူၼ်းၼမ်ႉၶမ်း ႁႄႇၵၼ်ၵႂႃႇ သမ်းယႃႁႄႉၵင်ႈတၢင်းပဵၼ် ၶူဝ်ႊဝိတ်ႉ 19 ၊ ၵူၼ်းၵိုၼ်းၶွၼ်ႈ ၼမ်လိူဝ်ၵူႈပွၵ်ႈ။ ၵူႈပွၵ်ႈတႄႉ ၽႂ်ၵေႃႈ ဢမ်ႇၶႂ်ႈသမ်းယႃၼႆႉ။
“သင်ဝႃႈ ႁဝ်းသမ်းယႃႈယႃယဝ်ႉ ယႃၼၼ်ႉ မၼ်းတေႁႄႉ ၵင်ႈပၼ်ႁဝ်းလႆႈယူႇ။ ၶႅၼ်းလိူဝ်ဢမ်ႇသမ်း။ သင်တိတ်း ၸပ်းၵႂႃႇ ၼႆ တေဢမ်ႇထိုင်တီႈပဵၼ်ႁႅင်းၶႃႈ။ လႆႈၶိုၼ်ႈႁူင်းယႃ မွၵ်ႈဝူင်ႈၼိုင်ႈသေ လူင်းႁူင်းယႃ ၵိၼ် ယႃႈယႃ ၸိူင်ႉၼႆၵေႃႈ မၼ်းႁၢႆၵႂႃႇယဝ်ႉ။ ၵွပ်ႈၼၼ် လီဢွၼ်ၵၼ်ၵႂႃႇသမ်းဢေႃႈ ”- ၵူၼ်းၼုမ်ႇ ၼမ်ႉၶမ်းၵေႃႉၼိုင်ႈ လၢတ်ႈၼင်ႇၼႆ။
ဝၼ်းတီႈ 4/11/2021 ၼႆႉ ၾၢႆႇၽွင်းငမ်း ၸႄႈဝဵင်းၼမ်ႉၶမ်း ပိုၼ်ၽၢဝ်ႇဢွၵ်ႇဝႆႉဝႃႈ ၵၢတ်ႇၵၢင်ၶမ်း ၼႂ်းဝဵင်းၼမ်ႉၶမ်းၼႆႉ တေပိၵ်ႉဢိုတ်း တေႃႇၼူဝ်ႊဝႅမ်ႊပိူဝ်ႊၼႆႉသဵင်ႈ။ ၵၢတ်ႇလူင်ၵေႃႈ ႁႂ်ႈပိုတ်ႇ ၵၢင်ၼႂ် 6 မူင်း တေႃႇ 12 မူင်း ၵၢင်ဝၼ်း။
ၸွမ်းၼင်ႇ ၶေႃႈမုလ်း ၸုမ်းပရႁိတ ၼမ်ႉၶမ်း ဢွၵ်ႇဝႆႉတႄႉ တေႃႇထိုင် ဝၼ်းတီႈ 12/10/2021 ပူၼ်ႉမႃးၼႆႉ ၼႂ်းၸႄႈဝဵင်းၼမ်ႉၶမ်း မီးၵူၼ်း တိတ်းၸပ်းၶူဝ်ႊဝိတ်ႉ 2,022 ၵေႃႉ၊ လူႉတၢႆ 86 ၵေႃႉ ဝႃႈၼႆ။
