ႁူဝ်လိူၼ်ၼူဝ်ႊဝႅမ်ႊပိူဝ်ႊၼႆႉ ၾၢႆႇမိူင်းၶႄႇ ပိုတ်ႇပၼ်ၽၵ်းတူၶၢမ်ႈလႅၼ်လိၼ် မိူင်းတႆး- မိူင်းၶႄႇ တီႈဝၢၼ်ႈၼွင်တဝ်း ၸႄႈဝဵင်းၼမ်ႉၶမ်း မိူင်းတႆးပွတ်းႁွင်ႇၼႆသေတႃႉ ၶူဝ်းၵုၼ်ႇတႄႉပႆႇပၼ်တေႃႉၶၢမ်ႈ ၸဝ်ႈၼႃႈတီႈၾၢႆႇမိူင်းၶႄႇၶဝ် တိုၵ်ႉႁၢမ်ႈဝႆႉယူႇ ၼႆယဝ်ႉ။

ၽၵ်းတူၶၢမ်ႈလႅၼ်လိၼ် မိူင်းတႆး – မိူင်းၶႄႇ တီႈဝၢၼ်ႈၼွင်တဝ်းၼႆႉ ၵိုင်ႉၵၢင်ႉလႆႈဢိုတ်းႁပ်းၵႂႃႇပႅတ်ႈ ၽွင်းၸုမ်းသိုၵ်းၸၢဝ်းၶိူဝ်းသၢမ်ၸုမ်းတင်းသိုၵ်းမၢၼ်ႈယိုဝ်းၵၼ် မိူဝ်ႈပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 မိူဝ်ႈဝၼ်းတီႈ 18 လိူၼ်ၵျူႊလၢႆႊ ပီ 2024 ၼၼ်ႉၼႆ ၵူၼ်းမိူင်းၵေႃႉယူႇဝႆႉ ၼႂ်းၸႄႈဝဵင်းၼမ်ႉၶမ်း လၢတ်ႈၼႄၼင်ႇၼႆ။

“ၽၵ်းတူၼႆႉ ၶဝ်ဢိုတ်းဝႆႉႁိုင်ၶၢဝ်းတၢင်းပီပၢႆယဝ်ႉ။ တိုၵ်ႉပိုတ်ႇပၼ်ၶိုၼ်း မိူဝ်ႈႁၢင်လိူၼ်ဢွၵ်ႉထူဝ်ႊပိူဝ်ႊ ဝၢႆး သိုၵ်းမၢၼ်ႈ တင်း သိုၵ်းလွႆ (တဢၢင်း) တူၵ်းလူင်းၵိုတ်းယိုဝ်းၵၼ်ယဝ်ႉ ၼႆႉၵူၺ်း။ ၶူဝ်းၵုၼ်ႇတႄႉဢမ်ႇပႆႇတေႃႉၶၢမ်ႈလႆႈၵူႈမဵဝ်း။ ပေႃးတေႃႉပႃးမႃး ၶိူင်ႈၾႆးၾႃႉၸိူဝ်းၼႆႉၼႆ ၶႄႇၶဝ် တိုၼ်းဢမ်ႇပၼ်ၶၢမ်ႈမႃး။ တီႈၽၵ်းတူၼၼ်ႉတေႃႉတႄႉ တေႃႉၶူဝ်းၶၢမ်ႈ လႆႈဢိတ်းဢွတ်းၵူၺ်း။”

မိူင်းၶႄႇ ပိုတ်ႇပၼ်ၽၵ်းတူၶၢမ်ႈလႅၼ်လိၼ်ပွၵ်ႈၼႆႉ ၵၢၼ်တေႃႉသူင်ႇၶူဝ်းၵုၼ်ႇ မိူၼ်ၼင်ႇ ၶဝ်ႈၵၢပ်ႇ (ၶဝ်ႈၶႄႇ)၊ ၶဝ်ႈပိူၵ်ႇ၊ ၶဝ်ႈသၢၼ်၊ ထၢၼ်ႇ လႄႈ ႁိၼ်သီႊလီႊၵုၼ်ႊ၊ ၶူဝ်းၵုၼ်ႇ ၵိၼ်ယႅမ်ႉ၊ ၼမ်ႉမၼ်းၸၢၵ်ႈ လႄႈ ၶိူင်ႈၶူဝ်းလဵၵ်းဢၼ်ၸႂ်ႉ တိုဝ်းၼႂ်းၵၢၼ်ၵေႃႇသၢင်ႈၸိူဝ်းၼႆႉ ပႆႇတေႃႉၶၢမ်ႈလႆႈလွတ်ႈလႅဝ်း လႆႈတေႃႉၶၢမ်ႈၵႂႃႇပဵၼ်ၶၵ်ႉပဵၼ်တွၼ်ႈ ၸွမ်းၼင်ႇၸဝ်ႈ ၼႃႈတီႈၶဝ် မၵ်းမၼ်ႈဝႆႉၼၼ်ႉၵူၺ်း ၼႆယဝ်ႉ။

လိူဝ်ၼၼ်ႉ ၶိူင်ႈၸၢၵ်ႈ လႄႈ ၶိူင်ႈၾႆးၾႃႉ ၵူႈသႅၼ်းသႅၼ်းၵေႃႈ ယင်းပႆႇၸၢင်ႈတေႃႉၶၢမ်ႈၽၵ်းတူလႅၼ်လိၼ် လႆႈၼႆ – လႆႈႁူႉမႃးၼင်ႇၼႆ။

ယွၼ်ႉၽၵ်းတူၶၢမ်ႈလႅၼ်လိၼ် ၼႂ်းမိူင်းတႆးပွတ်းႁွင်ႇ ပိၵ်ႉဢိုတ်းသေ ၵူၼ်းမိူင်းၼႂ်းပိုၼ်ႉတီႈဢမ်ႇၸၢင်ႈတေႃႉဢဝ်ၶူဝ်းၵုၼ်ႇ ဢၼ်ႁဵတ်းဢွၵ်ႇၼႂ်းပိုၼ်ႉတီႈ သူင်ႇဢွၵ်ႇၶၢႆတၢင်းမိူင်း ၶႄႇလႄႈ ႁဵတ်းႁႂ်ႈတုမ်ႉတိူဝ်ႉ ၵၢၼ်မၢၵ်ႈမီးၵႂႃႇတေႉတေႉ ၼႆယဝ်ႉ။

သၢင်ႇၸၢႆး ၵူၼ်းမိူင်းၼမ်ႉၶမ်း လၢတ်ႈၼႄတီႈၽူႈတွႆႇႁွၵ်ႈဝႃႈ “တၢင်းႁဝ်းၼႆႉ ပိူၼ်ႈၽုၵ်ႇၶဝ်ႈၵၢပ်ႇ၊ သွမ်ႈၶဝ်ႈ ၸိူဝ်းၼႆႉႁႄ သူင်ႇၶၢႆၸူးမိူင်းၶႄႇ။ မိူဝ်ႈလဵဝ်တႄႉ ၽၵ်းတူၵေႃႈဢမ်ႇ ၽုၺ်ႇတေႉတေႉၼႆလႄႈ ၶဝ်ႈၵေႃႈဢမ်ႇ သွမ်ႈၼမ်လႆႈတေႉတေႉယဝ်ႉ” ဝႃႈၼႆ။

ၵွၼ်ႇၼႃႈသိုၵ်းမၢၼ်ႈပႆႇယိုတ်းဢဝ်ဢႃႇၼႃႇၸိုင်ႈမိူင်း မိူဝ်ႈပီ 2021 ၼႆႉ ၵူၼ်းမိူင်းပိုၼ်ႉတီႈ ၼႂ်းၸႄႈဝဵင်း ၼမ်ႉၶမ်းတေႃႉသူင်ႇၶူဝ်းၵုၼ်ႇ လတ်းၽၢၼ်ႇၽၵ်းတူ ၶၢမ်ႈလႅၼ်လိၼ်လႆႈငၢႆႈသေတႃႉ တင်ႈတႄႇပဵၼ် ပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 မႃး ၾၢႆႇမိူင်းၶႄႇ လွမ်ႉႁူဝ်ႉပႅတ်ႈၸွမ်းလႅၼ်လိၼ် ၵူၺ်းဢမ်ႇၵႃး ဢိုတ်းပႃးၽၵ်းတူၶၢမ်ႈလႅၼ်လိၼ်ၸိူဝ်းပိုတ်ႇဝႆႉပဵၼ်တၢင်းၵၢၼ်ထႅင်ႈ ၼႆယဝ်ႉ။