ၵူၼ်းလႃႈသဵဝ်ႈ ၸိူဝ်းၸပ်းတၢင်းပဵၼ်ၶူဝ်ႊဝိတ်ႉ 19 ၵမ်ႈၼမ် ဢမ်ႇၵႂႃႇတိတ်းတေႃႇ ႁူင်းယႃ ယူႇႁိူၼ်း သေ ယူတ်းယႃဢဝ်ႁင်းၵူၺ်း ၵမ်ႈၼမ်။
ဝၼ်းမိူဝ်ႈၼႆႉ ၼႂ်းၸႄႈဝဵင်းလႃႈသဵဝ်ႈ ၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 ၼမ်မႃးသေတႃႉ ဢမ်ႇယွမ်းၵႂႃႇၵူတ်ႇထတ်း ယူတ်းယႃ တီႈႁူင်းယႃ ၊ ဢမ်ႇၵႂႃႇၶဝ်ႈၵုမ်းၵၵ်းတူဝ် တီႈသုၼ်ၵုမ်းတူၺ်း Quarantine Center ယူႇႁိူၼ်းၽႂ် ႁိူၼ်းမၼ်းသေ ယူတ်းယႃဢဝ်ႁင်းၵူၺ်းၵမ်ၼမ်။
ၽူႈၶဝ်ႈၸုမ်းပရႁိတ Operation Team ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် တၢင်းပဵၼ်ၽႄႈႁႅင်း ၶႃႈဢေႃႈ။ ႁဝ်းၶႃႈႁၼ် ၵူၼ်းၸိူဝ်းမႃးႁိမ် ဢွမ်ဢွၵ်ႊသျီႊၵျိၼ်ႊၵႂႃႇၸႂ်ႉၵၼ်ၼၼ်ႉ ပဵၼ်ၵူၼ်းပိုၼ်ႉတီႈၼႂ်းပွၵ်ႉ ၵမ်ႈၼမ် ၶႃႈဢေႃႈ”– ဝႃႈၼႆ။
ၼႂ်းၸႄႈဝဵင်းလႃႈသဵဝ်ႈ ႁၢၼ်ႉတေႃႇထိုင် ဝၼ်းတီႈ 3 ၼႆႉ မီးၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ် 3,855 ၵေႃႉ၊ လူႉတၢႆ 207 ၵေႃႉ ယႃၶႅၼ်း 3,452 ၵေႃႉ ၼႆယဝ်ႉ။
“မိူဝ်ႈဝႃးၼႆႉ ထူပ်းႁၼ် 9 ၵေႃႉ၊ မိူဝ်ႈၼႆႉသမ်ႉ ထူပ်း ႁၼ်ထႅင်ႈ တီႈၵၢတ်ႇလူင်လႄႈ ၵၢတ်ႇဝၢၼ်ႈသူႈထႅင်ႈ 9 ၵေႃႉ။ မႃးႁိမ်ဢွမ် ဢွၵ်ႊသျီႊၵျိၼ်ႊၵႂႃႇၸႂ်ႉ မီးယူႇ 2-3 ၵေႃႉ ၵူႈဝၼ်းၶႃႈ”- ၽူႈၶဝ်ႈၸုမ်း ပရႁိတ သိုပ်ႇလၢတ်ႈၼႄၼင်ႇၼႆ။
ၵူၼ်းတိတ်းၸပ်းတၢင်းပဵၼ် ဢၼ်ပၢႆးယူႇလီ ႁပ်ႉႁူႉသၢႆမၢႆ ၼႂ်းႁူင်းယႃလူင် လႃႈသဵဝ်ႈမီး 76 ၵေႃႉ၊ ႁူင်းယႃသိုၵ်း (ကုတင်-၁၀၀) သမ်ႉမီး 16 ၵေႃႉ၊ ၼႂ်းၶွၵ်ႈၵေႃႈ မီးၵူၼ်းၸပ်း16 ၵေႃႉ၊ သုၼ်ပႂ်ႉတူၺ်းၶူဝ်းဝိတ်ႉ တီႈဝၢင်းၸၼ်ႉၸွမ် ၼၼ်ႉသမ်ႉ မီးၵူၼ်းပဵၼ် 93 ၵေႃႉ ၵူၺ်းၼႆယဝ်ႉ။
ယွၼ်ႉတၢင်းပဵၼ်ၽႄႈသေ ၼႂ်းၸေႈဝဵင်းလႃႈသဵဝ်ႇ ယၢမ်းလဵဝ် ပၼ်ၶႂၢင်ႉ ပိုတ်ႇႁၢၼ်ႉၶၢႆၼမ်ႉၼဵင်ႈၸဵမ်း၊ ႁၢၼ်ႉၶဝ်ႈသွႆး၊ ႁၢၼ်ႉၶဝ်ႈၽၵ်း ၸိူဝ်းၼႆႉသေတႃႉ ဢမ်ႇပၼ်ၼင်ႈၵိၼ်။ ၵၢတ်ႇၽၵ်းၶဵဝ် ၵေႃႈ ပိၵ်ႉႁပ်းမႃး မီး2 ဝူင်ႈ ယဝ်ႉဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ