ဝၼ်းတီႈ 17/1/2026 ယၢမ်းၵၢင်ၼႂ် သိုၵ်းဝႃႉ ႁဵတ်းပၢင်ၵုမ်ႁူဝ်ပီ တီႈဢိူင်ႇမိူင်းၵႅတ်ႈ ၸႄႈဝဵင်း လႃႈသဵဝ်ႈ ႁွင်ႉပႃးၵၢင်ႉၵႄႇဝၢၼ်ႈဢိူင်ႇသေ ၶၢၼ်းၼုမ်ႇၸၢႆး 100 ပၢႆႁႂ်ႈမႃးၾိုၵ်းၵၢၼ်သိုၵ်း – မၢင်ၵေႃႉဢမ်ႇမီးတၢင်းလိူၵ်ႈ ထိုင်တီႈၵိၼ်ယႃႈမိူဝ်ႇတၢႆၵေႃႈမီး ဝႃႈၼႆ။

သိုၵ်းဝႃႉႁွင်ႉပၢင်ၵုမ်ႇၵၢင်ႉၵႄႇ ၼႂ်းဢိူင်ႇဝၢၼ်ႈမၢၵ်ႇ ၊ ဢိူင်ႇၼမ်ႉမ ၊ ဢိူင်ႇၼမ်ႉပွင်ႈ လႄႈ ဢိူင်ႇမိူင်းၵႅတ်ႈ ၵူႈဝၢၼ်ႈ ႁႂ်ႈၶဝ်ႈႁူမ်ႈပၢင်ၵုမ်ၸွမ်း။  သိုၵ်းဝႃႉ ထတ်းသၢင်ၼႄ ၵၢၼ်ၽွင်းငၢမ်း  လႄႈ ၶေႃႈယိူင်းမၢႆၶဝ် သေဢမ်ႇၵႃး သပ်းလႅင်းၼႄပႃး ၵၢၼ်ဝၢင်းၽႅၼ်မိူဝ်းၼႃႈသေ သင်ႇၵဵပ်းသိုၵ်းပႃး ဝႃႈၼႆ ။

ၼႂ်းပၢင်ၵုမ်ၼၼ်ႉသိုၵ်းဝႃႉၶၼ်းၵၢင်ႉၵႄႇ ႁႂ်ႈႁႃပၼ် ၵူၼ်းဝၢၼ်ႈၼႂ်းဢိူင်ႇမိူင်းၵႅတ်ႈ  ယႃႇႁႂ်ႈယွမ်း 100 ၵေႃႉ သူင်ႇပၼ်ၶဝ် တႃႇၾိုၵ်းၵၢၼ်သိုၵ်း  ။  ဝၢႆးပၢင်ၵုမ်ၼၼ်ႉယဝ်ႉ ၵၢင်ႉၵႄႇပွၵ်ႈမႃး ၸႂ်ႉၼုမ်ႇၸၢႆးၼႂ်းဝၢၼ်ႈ  ႁႂ်ႈၵဵပ်းၶူဝ်းလဵင်း တႃႇၵႂႃႇၾိုၵ်းၵၢၼ်သိုၵ်းၵမ်းလဵဝ် ၼႆလႄႈ ႁဵတ်းႁႂ်ႈ ၵူၼ်းပိုၼ်ႉတီႈတိုၼ်ႇသၢၼ်ႈတူၵ်းၸႂ် ၵမ်ႈၽွင်ႈႁႃတၢင်းငိူင်ႉပၢႆႈ ၵမ်ႈၽွင်ႈဝူၼ်ႉၵႂင် ဢမ်ႇႁူႉတေလႆႈႁဵတ်းသင်။  

ၵူၼ်းၸၢႆးၼုမ်ႇၼႂ်းထုင်ႉလႃႈသဵဝ်ႈ ဢၼ်ႁူႉႁၼ်ၸွမ်းလွင်ႈပၢင်ၵုမ်ၼႆႉ   လၢတ်ႈၽူႈတွႆႇႁွၵ်ႈဝႃႈ -“ ၵမ်ႈၽွင်ႈၵေႃႈႁႅၼ်းၶူဝ်းလၵ်ႉပၢႆႈဝၼ်းၼၼ်ႉ ၵမ်းလဵဝ် ၵမ်ႈၽွင်ႈတႄႉဢမ်ႇမီးငိုၼ်းလႄႈ တေလႆႈ ပၢႆႈၵႂႃႇလႂ်ဢမ်ႇႁူႉ၊ ၵၢၼ်ႁႃၵိၼ်လဵင်ႉတွင်ႉတၢင်းႁိူၼ်းၵေႃႈသမ်ႉမီးပုၼ်ႈၽွၼ်း။  ”- ဝႃႈၼႆ ။  

 ဢိင်ၼိူဝ်လွင်ႈသိုၵ်းဝႃႉၵဵပ်းသိုၵ်းမႂ်ႇသေ ၼႂ်းဝၼ်းတီႈ 19/1/2026 ၵၢင်ႉၵႄႇဝၢၼ်ႈႁူဝ်လဵင်း ႁွင်ႉ ပၢင်ၵုမ်  ၶၢၼ်းၵူၼ်းဝၢၼ်ႈၵႂႃႇၾိုၵ်းၵၢၼ်သိုၵ်း ႁဵတ်းႁႂ်ႈၵူၼ်းၸၢႆး ၸိုဝ်ႈ ၸၢႆးလွတ်ႈ- ဢႃယု 40 ပီ ၵေႃႉၼိုင်ႈ ၵိၼ်ယႃႈမိူဝ်ႇတၢႆ ၼႂ်းဝၼ်းတီႈ 20 /1/2026  – ဝႃႈၼႆ ။ 

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၸၢႆးလွတ်ႈၵေႃႉၵိၼ်ယႃႈမိူဝ်ႇတၢႆၼၼ်ႉ ပဵၼ်ၵူၼ်း ဝၢၼ်ႈၼွင်ငိုၼ်းတၢင်း တၢင်ႉယၢၼ်းၼႆႉ မႃးၶိုၼ်ႈၶူၺ် တီႈဝၢၼ်ႈႁူဝ်လဵင်းဢေႃႈ ၊ မၼ်းလႆႈ ဝူၼ်ႉၼမ်လၢႆလွင်ႈၸဵမ်လွင်ႈၼႃႈႁိူၼ်း ၸဵမ်လွင်ႈႁႃၵိၼ်လဵင်ႉတွင်ႉ သမ်ႉမႃးၸႂ်ႉၵၼ်ၵႂႃႇၾိုၵ်းၵၢၼ်သိုၵ်းထႅင်ႈၼႆသေ ၵိၼ်ယႃႈမိူဝ်ႇတၢႆၵႂႃႇဢေႃႈ ”- ဝႃႈၼႆ ။

မိူဝ်ႈပီၵၢႆ 2025 သိုၵ်းဝႃႉတဵၵ်းႁွင်ႉပျီႇတူႉၸိတ်ႉၵူၼ်းမိူင်း ၵႂႃႇၾိုၵ်းၵၢၼ်သိုၵ်းပွၵ်ႈၼိုင်ႈ ။ ၽွင်းၼၼ်ႉ  ၼႂ်းပၢင်သွၼ်ၾိုၵ်းၵၢၼ်သိုၵ်း သွၼ်ႁၢဝ်ႈႁႅင်းၵေႃႈပိူင်ၼိုင်ႈ ဢမ်ႇပွင်ႇၵႂၢမ်းၵၼ်ၵေႃႈ ပိူင်ၼိုင်ႈ ၵူၼ်းၵႂႃႇၾိုၵ်းသွၼ်ၵၢၼ်သိုၵ်း ယၢပ်ႇၽိုတ်ႇတင်း ပၢႆးတူဝ် ပၢႆးၸႂ် ၊ ဝၢႆးပွၵ်ႈၶိုၼ်းႁိူၼ်း ၼၼ်ႉ ဢွၼ်ၵၼ် ၸုၼ်ႉပႅတ်ႈႁိူၼ်းယေးသူၼ်ႁႆးၼႃးသေ ပၢႆႈၵႂႃႇယူႇတၢင်ႇတီႈ တၢင်ႇမိူင်းတၢင်းၼမ် ဝႃႈၼႆ ။ 

ယွၼ်ႉၵူၼ်းၼုမ်ႇၼႂ်းဝၢၼ်ႈ ဢမ်ႇၶႂ်ႈႁဵတ်းသိုၵ်း ပၢႆႈဢွၵ်ႇဝၢၼ်ႈတင်းၼမ်လႄႈ ၵူၼ်းၵႂႃႇႁဵတ်း ပျီႇတူႉၸိတ်ႉၵူၼ်းမိူင်းၼႆႉ မီးၵူၼ်းသႅၼ်းပၢၼ်ၶၢဝ်ႉ ၵမ်ႈၼမ် ၊ မၢင်ပွၵ်ႈ ၵူၼ်းတင်းၼိူဝ် တဵၵ်းၸႂ်ႉ ပျီႇတူႉၸိတ်ႉၵူၼ်းမိူင်း ႁႃပႃလဵင်ႉထႅင်ႈၵွၼ်ႇ – ၵူၼ်းပိုၼ်ႉတီႈလၢတ်ႈ။ 

ၵူၼ်းၸၢႆးပိုၼ်ႉတီႈသိုပ်ႇလၢတ်ႈထႅင်ႈဝႃႈ -“ ၵူၼ်းႁဵတ်းပျီႇတူႉၸိတ်ႉၵူၼ်းမိူင်း ၼႂ်းဢိူင်ႇမိူင်းၵႅတ်ႈ ၼႆႉ ၵူၼ်းၼုမ်ႇဢမ်ႇပေႃးမီး ၵူဝ်ႇလႆႈႁဵတ်းသိုၵ်းလႄႈ ပၢႆႈဢွၵ်ႇဝၢၼ်ႈတင်းၼမ် ၵူၼ်းႁဵတ်း ပျီႇတူႉၸိတ်ႉၵူၼ်းမိူင်းၼႆႉ ပဵၼ်သႅၼ်းၵူၼ်းထဝ်ႈ ၵမ်သိၼ်ၼွၼ်းၵျွင်းၸိူဝ်းၼႆႉၵူၺ်း ၊ မၢင်ပွၵ်ႈ ၵူၼ်းတင်းၼိူဝ်ၸႂ်ႉပျီႇတူႉၸိတ်ႉႁႂ်ႈၵႂႃႇယိုမ် ၶိူင်ႈသွတ်ႉပႃ ၼႂ်းဝၢၼ်ႈသေ ႁႂ်ႈသွတ်ႉပႃမႃးလဵင်ႉၶဝ်ၵေႃႈမီး။ ၾၢႆႇၼိုင်ႈသိုၵ်းဝႃႉၸိူဝ်းၼႆႉ  ဢမ်ႇမေႃၼပ်ႉယမ် ၵူၼ်းထဝ်ႈၵူၼ်းၵႄႇ ”- ဝႃႈၼႆ ။

ၵဵဝ်ၵပ်းလွင်ႈ သိုၵ်းဝႃႉ ပေႉၵိၼ် ၵူၼ်းမိူင်းလႄႈၵူၼ်းၵႂႃႇၾိုၵ်းၵၢၼ်သိုၵ်း ၸိူဝ်းၼႆႉ ၵူၼ်းလူင်တၢင်းၼိူဝ်ၶဝ်ဢမ်ႇႁူႉၶိုတ်းတၼ်းၸွမ်းၵေႃႈမီး ၊ ယွၼ်ႉၵူၼ်းလူင် တၢင်းၼိူဝ် ဢမ်ႇထတ်းထွင်ႇၸွမ်းလႄႈ ၸၼ်ႉပႃႈတႂ်ႈၵေႃႈလႆႈႁဵတ်းပေႉၵိၼ် ။ လိူဝ်ၼၼ်ႉ ၵူၼ်းဝၢၼ်ႈၸိူဝ်းၺႃးတဵၵ်းၶၢၼ်းႁဵတ်းပျီႇတူႉၸိတ်ႉသိုၵ်းဝႃႉ ၼႆႉ ၵူၼ်းဢမ်ႇၶႂ်ႈၵႂႃႇႁဵတ်းမၼ်းၼႆႉ ယူႇယၢပ်ႇၵိၼ်းၸႂ်ဝႆႉ – ၵူၼ်းပိုၼ်ႉတီႈလၢတ်ႈ ။

“တီႈတႄႉမၼ်း ဢၼ်ပိူၼ်ႈမႃးပေႉၵိၼ်ၵူၼ်းဝၢၼ်ႈႁဝ်းယူႇၸိူင်ႉၼႆၼႆႉ ၵေႃႈယူႇတီႈၵၢင်ႉၵႄႇႁဝ်း ၸၢႆးထုၼ်းယီႇ ပႃးဢေႃႈ ။ မၼ်းၸၢႆးၼႆႉ ဢမ်ႇတွၼ်ႉယူႇၾၢႆႇၵူၼ်းမိူင်း ဢမ်ႇတွၼ်ႉႁႄႉၵင်ႈပၼ်ၵူၼ်းမိူင်းသေပွၵ်ႈ”– ၵူၼ်းမိူင်းၵႅတ်ႈ လၢတ်ႈၼင်ႇၼႆ။

သိုၵ်းဝႃႉၸိူဝ်းၼႆႉ ၸဵမ်မိူဝ်ႈသိုၵ်းဢူၺ်းလီ 3 ၸုမ်းတိုၵ်းယိုတ်းဢဝ်မိူင်းၵႅတ်ႈလႆႈ မိူဝ်ႈပီ 2023 ၼၼ်ႉ ၶဝ်ႈမႃးၵုမ်းမိူင်းၵႅတ်ႈ  ။ တေႃႇထိုင်ၶိုင်ႈပီ 2024 ၼႆႉ ဢမ်ႇမီးလွင်ႈတဵၵ်းတဵင်ၵူၼ်းမိူင်းသင်သေဢိတ်း။ ထိုင်မႃး ႁၢင်ပီ 2024 တေႃႇထိုင် ယၢမ်းလဵဝ်တႄႉ ၵဵပ်းၵူၼ်းဝၢၼ်ႈၾိုၵ်းၵၢၼ်သိုၵ်း 2 ပွၵ်ႈပႃးၼႆႉယဝ်ႉ- ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ယူႇတီႈၽူႈတွႆႇႁွၵ်ႈ သေၶတ်းၸႂ်တိတ်းတေႃႇၸူးသိုၵ်းဝႃႉ ဢမ်ႇလႆႈ။ ၽူႈၼင်ႈလုမ်းသိုၵ်းဝႃႉတီႈဝဵင်းလႃႈသဵဝ်ႈတႄႉယၢမ်ႈတွပ်ႇလၢတ်ႈဝႃႈ – ဢမ်ႇမီးလွင်ႈတဵၵ်းငႅၼ်းၵူၼ်းမိူင်းႁဵတ်းသိုၵ်း။ ၽူႈမီးပုၼ်ႈၽွၼ်းၼႂ်းပိုၼ်ႉတီႈႁဵတ်းၸွမ်းၼႃႈၵၢၼ်ဢၼ်ထုၵ်ႇႁဵတ်းၵူၺ်းဝႃႈၼႆ။

ဢိူင်ႇမိူင်းၵႅတ်ႈၼႆႉ မီးၾၢႆႇဢွၵ်ႇဢိူင်ႇမိူင်းယေႃ မွၵ်ႈ 20 လၵ်း။ မီးၾၢႆႇဢွၵ်ႇလႃႈသဵဝ်ႈမွၵ်ႈ 60 လၵ်း။ ဢိူင်ႇ မိူင်းၵႅတ်ႈၼႆႉ မီး 13 ဝၢၼ်ႈ။ ပဵၼ်လႅၼ်လိၼ် ဢၼ်တိတ်းၸပ်းၵၼ်တၢင်း သႅၼ်ဝီ – ၵုၼ်လူင် ။ ဢၼ်လုၵ်ႉမိူင်းၵႅတ်ႈ လူင်းၵႂႃႇ တႃႈ ၶူင်း – တႃႈတိုင်းတၼ်။ သင်ဝႃႈ ၶၢမ်ႈၶူင်းယဝ်ႉ ၵႂႃႇပွင်ႇထိုင်တၢင်း ၵုၼ်လူင် – ႁူဝ်ပၢင်ႇ – ဝဵင်းၼမ်ႉၽႃႈ (ၶျိၼ်ႊသူၺ်ႊႁေႃႇ) ၵမ်းသိုဝ်ႈ။

သိုၵ်းဢၼ်တူင်ႉၼိုင် ၼႂ်းမိူင်းၵႅတ်ႈ ယၢမ်းလဵဝ်ၼႆႉသမ်ႉ – သိုၵ်းတဢၢင်း ၊ သိုၵ်းၵဝ်ႈၵၢင်ႉ ၊ သိုၵ်းဝႃႉ ၸိူဝ်းၼႆႉ။ တႄႇလိူၼ်မၢတ်ႊၶျ် 2024 ၼႆႉ ယူႇတီႈ ၸုမ်းဢူၺ်းလီ ပွတ်းႁွင်ႇ 3 ၸုမ်း မိူၼ်ၼင်ႇ – သိုၵ်းတဢၢင်း TNLA ၊ သိုၵ်းၵဝ်ႈၵၢင်ႉ MNDAA လႄႈ သိုၵ်းရၶႅင်ႇ AA တူၵ်းလူင်းမွပ်ႈပၼ် သိုၵ်းဝႃႉ UWSA ၶဝ်ႈၵုမ်းၵမ် ပူၵ်းပွင် ပၼ်ၵူၼ်းမိူင်း ၼႂ်းဢိူင်ႇမိူင်းၵႅတ်ႈ သေ သိုၵ်းဝႃႉ ပၼ်ၵၢၼ်ၽွင်းငၢမ်းဝႆႉ တေႃႇထိုင်ဝၼ်းမိူဝ်ႈၼႆႉ – လႆႈႁူႉၼင်ႇၼႆ ။