ၵူၼ်းမိူင်းသီႇသႅင်ႇတိတ်းၸပ်းတၢင်းပဵၼ်ၶူဝ်ႊဝိတ်ႉ 19 ၼမ်ႁႅင်းလႄႈ ႁၢမ်ႈၵူၼ်းဢွၵ်ႇႁိူၼ်း ဢွၵ်ႇဝဵင်းဝႆႉတႃႇၶၢဝ်းတၢင်း 7 ဝၼ်း ယၢမ်းလဵဝ်တိုၵ်ႉလႆႈ 3 ဝၼ်းၵူၺ်းၶၼ်ၵုၼ်ႇၵိၼ်ယမ်ႉပုင်ႈသုင် ၵူၼ်းမိူင်းထူပ်းတၢင်းယၢပ်ႇၽိုတ်ႇ။
![](https://shannews.org/wp-content/uploads/2021/11/Hsihseng-lockdown.jpg)
ၾၢႆႇပၢႆးယူႇလီ သင်ႇပိၵ်ႉ Local Semi – Lockdown ဝဵင်းသီႇသႅင်ႇ ၸႄႈတွၼ်ႈတူၼ်ႈတီး တင်ႈတႄႇဝၼ်းတီႈ 1 ထိုင် 7/11/2021 ။ ႁၢမ်ႈဢွၵ်ႇႁိူၼ်းၶၢဝ်းယၢမ်းၵၢင်ဝၼ်း 11 မူင်းထိုင်ဝၢႆးဝၼ်း 3 မူင်း ။ၽႂ်ပူၼ်ႉပႅၼ်သမ်ႉၺႃးတူတ်ႈတၢမ်ႇထႅင်ႈ ၼႆလႄႈ တႃႇဢွၵ်ႇသိုဝ်ႉဢွၵ်ႇၶၢႆၶူဝ်းၵိၼ်ယမ်ႉ ယၢပ်ႇၽိုတ်ႇ။ ၵူၼ်းၶၢႆၽၵ်းသမ်ႉတၢင်ႇၵႃႈၶၼ်သုင်လႄႈ ၵူၼ်းမိူင်းၶၢင်းပွၵ်ႉၵၼ်။
ၵူၼ်းသီႇသႅင်ႇၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ – “သင်ဝႃႈၵူတ်ႇထတ်းႁၼ်ၵူၼ်းဢွၵ်ႇၼွၵ်ႈႁိူၼ်းၶၢဝ်းယၢမ်းဢၼ်ႁၢမ်ႈဝႆႉၼႆသမ်ႉၺႃးတၢမ်ႇ ၼင်ႈလုၵ်ႉဢေႃႈ။ ဢမ်ႇပၼ်ဢွၵ်ႇႁိူၼ်းတႄႉလီယူႇ တၢင်းပဵၼ်တေဢမ်ႇၸပ်းၵၼ်။ ၵူၺ်းၵႃႈပေႃးမီးၵၢၼ် ဢမ်ႇၸၢင်ႈၵႂႃႇႁဵတ်းၵမ်းလဵဝ်ၼၼ်ႉၵူၺ်းယဝ်ႉၶႃႈ ”- ဝႃႈၼႆ။
တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်း ၼႂ်းၸႄႈဝဵင်းသီႇသႅင်ႇမႃး ပွၵ်ႈၵမ်းသၢမ်ၼႆႉ တုမ်ႉတိူဝ်ႉၵၢၼ်ႁႃၵိၼ်လဵင်ႉတွင်ႉ ၵူၼ်းမိူင်း ယၢပ်ႇၽိုတ်ႇၵိၼ်းၸႂ်မႃး ႁၢဝ်ႈႁႅင်း ။
“ယၢမ်းလဵဝ်ၼႆႉ ၵူၼ်းမိူင်းထူပ်းတၢင်းယၢပ်ႇၽိုတ်ႇၵၼ်ႁႅင်းၶႃႈဢေႃႈ ။ ၶူဝ်းၵုၼ်ႇ ၶွင်ၵိၼ်ယႅမ်ႉ ၸိူဝ်းၼႆႉ ၶိုၼ်ႈၵူႈမဵဝ်းၶႃႈ။ ၶိုၼ်ႈပဵၼ် 2 ပုၼ်ႈပၢႆၶႃႈဢေႃႈ။ မိူၼ်ၼင်ႇ ၼမ်ႉမၼ်း 1,000 ၼႆ ပဵၼ်ၵႂႃႇ 2 ႁဵင် 3 ႁဵင်။ ၵိူဝ်ၶဝ်ႈသၢၼ် ၸိူဝ်းၼႆႉ ၶိုၼ်ႈၵူႈမဵဝ်းၶႃႈ ။ ႁဵတ်းႁိုဝ်လႄႈ ၵူၼ်းမိူင်းႁဝ်းၶႃႈတေဢမ်ႇတုၵ်ႉၶ ။ ပၢႆလိူဝ်ႁႃငိုၼ်းယၢပ်ႇ ၶူဝ်းၵုၼ်ႇၵေႃႈသမ်ႉၶိုၼ်ႈထႅင်ႈ”- ၵူၼ်းၼုမ်ႇပိုၼ်ႉတီႈ သိုပ်ႇလၢတ်ႈၼႄထႅင်ႈၼင်ႇၼႆ။
ၼႂ်းၸႄႈဝဵင်းသီႇသႅင်ႇၼႆႉ ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 မီး 1,000 ပၢႆ လူႉတၢႆ 20 ပၢႆယဝ်ႉ။ ဢၼ်မီးလွင်ႈတိတ်းၸပ်း တၢင်းပဵၼ်ၼမ်ၸိူင်ႉၼႆၼႆႉ ပဵၼ်ယွၼ်ႉၵူၼ်းမိူင်းဝႆႉမဝ်မၢင် ပေႃးဢွၵ်ႇႁိူၼ်း ဢမ်ႇသႂ်ႇၽႃႈတူမ်းသူပ်း ၵၼ် ဢိင်ၼိူဝ်ၾၢႆႇပၢႆးယူႇလီပိုၼ်ၽၢဝ်ႇသေ ၵူၼ်းၼုမ်ႇသီႇသႅင်ႇလၢတ်ႈၼင်ႇၼႆ။