ၼႂ်းဝဵင်းတႃႈလိူဝ်ႇ ၸိုင်ႈတႆးပွတ်းဢွၵ်ႇၶူင်း ၵူၼ်းတိတ်းၸပ်းၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 ၼမ် ၵူၼ်းပိုၼ်ႉတီႈ ဢွၼ်ၵၼ်ယူတ်းယႃတူဝ်ယူႇ ႁိူၼ်းယေးႁင်းၽႂ်မၼ်း ။
မိူဝ်ႈဝၼ်းတီႈ 31/10/2021 ပူၼ်ႉမႃးၼႆႉ တီႈဝၢၼ်ႈသႃႇ ဢိူင်ႇၼႃးယၢဝ်း ဝဵင်းတႃႈလိူဝ်ႇ ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ၼႂ်းဝၼ်း လဵဝ် ၵူတ်ႇထတ်းႁၼ် တိတ်းၸပ်းၸိူဝ်ႉမႅင်း 118 ၵေႃႉ ယူႇတီႈႁွင်ႈၵၢၼ်ပၢႆးယူႇလီ/ ၾၢႆႇပွင်ႇၶၢဝ်ႇ လူင်ပွင်ႈၸိုင်ႈ ဝဵင်းတႃႈလိူဝ်ႇဢွၵ်ႇဝႆႉၼင်ႇၼႆ။
ၵူၼ်းၼုမ်ႇ ပိုၼ်ႉတီႈ ဝဵင်းတႃႈလိူဝ်ႇ လၢတ်ႈတီႈၽူႈတွႆႇႁွၵ်ႈဝႃႈ – “တီႈဝၢၼ်ႈသႃႇၼႆႉ ၵူၼ်းတိတ်းၸပ်းတၢင်းပဵၼ် 100 ၶႃႈဢေႃႈ။ ၶႂ်ႈဝႃႈတူၵ်း ၶိုင်ႈဝၢၼ်ႈၵမ်းလဵဝ်ယဝ်ႉ။ ပႆႇပႃးတၢင်းဝၢၼ်ႈတႃႈၸၢင်ႉလႄႈ ထႅင်ႈလၢႆလၢႆဝၢၼ်ႈၶႃႈ။ တီႈဝဵင်းတႃႈလိူဝ်ႇၼႆႉ ၸွမ်းၼင်ႇႁဝ်းၶႃႈ ႁၼ်ပၢႆးယူႇလီၶဝ် ပိုၼ်ၽၢဝ်ႇဢွၵ်ႇတႄႉ ၼပ်ႉပၢၵ်ႇၶႃႈ။ ၵူၺ်းၵႃႈ ၸိူဝ်းပဵၼ်သေ ဢမ်ႇၵႂႃႇပွင်ႇၶၢဝ်ႇၸူးၶဝ်သေ ယူတ်းယႃတူဝ်ၽႂ်မၼ်း ယူႇႁိူၼ်းယေး ၸိူဝ်းၼႆႉ တႄႉ မီးထႅင်ႈတင်းၼမ်ၶႃႈဢေႃႈ”- ဝႃႈၼႆ။
ၵူၼ်းမိူင်းပိုၼ်ႉတီႈ ၸိူဝ်းတိတ်းၸပ်းတၢင်းပဵၼ် ၵမ်ႈၼမ် ဢမ်ႇၶၢမ်ႇၵႂႃႇယူတ်းယႃ တီႈႁူင်းယႃ ယူႇႁိူၼ်းယေးမၼ်းသေ ဢွၼ်ၵၼ်ယူတ်းၵႂႃႇ ၸိူင်ႉၼၼ်ၵေႃႈ မီးတင်းၼမ် ၼႆယဝ်ႉ။
“မၢင်ဝၢၼ်ႈၼႆႉ တိတ်းၸပ်းၼမ်ဝႆႉၶႃႈဢေႃႈ ၵူၺ်းၵႃႈ ပိူၼ်ႈၵေႃႈ ဢမ်ႇလၢတ်ႈၵၼ် ယူႇႁင်းၽႂ်မၼ်း ယူတ်းယႃႁင်းၵူၺ်းၸိူင်ႉၼႆၶႃႈ ပေႃးၵႂႃႇၸႅင်ႈ ပၢႆးယူႇလီသမ်ႉ တေလႆႈသဵင်ႈငိုၼ်းႁဵတ်းၼႆလႄႈ ၶၢမ်ႇၵိၼ်ယႃ ယူတ်းယႃႁင်းၵူၺ်းၵၼ် မီးၼမ်ၶႃႈဢေႃႈ။ မိူၼ်ၼင်ႇ ပေႃးပဵၼ်သေ ပွင်ႇၸူးပၢႆး ယူႇလီ မႃးၵူတ်ႇထတ်းပၼ် ၼိုင်ႈပွၵ်ႈလႂ် သဵင်ႈငိုၼ်း 200 -250 ဝၢတ်ႇ (ငိုၼ်းထႆး)၊ မၢင်ၵေႃႉ လႆႈသဵင်ႈၵႃႈယႃႈယႃ ဢၼ်ယူႇတီႈၾၢႆႇပၢႆးယူႇလီ ၶဝ် ၸတ်းသူင်ႇမႃးပၼ်ၼႆႉ 10,000 ဝၢတ်ႇပၢႆ ၸိူဝ်းၼႆႉၵေႃႈမီးဢေႃႈ။ ၵွပ်ႈၼႆလႄႈ ၵူၼ်းမိူင်းၸိူဝ်းပဵၼ်ၼႆႉ မၢင်ၵေႃႉ ယၢပ်ႇၽိုတ်ႇလွင်ႈငိုၼ်း တွင်းၵေႃႈပိူင်ၼိုင်ႈသေ ဢမ်ႇၸႅင်ႈလၢတ်ႈၼႄၶဝ် ယူတ်းယႃႁင်းၵူၺ်းၵၼ် ၸိူင်ႉၼႆၶႃႈဢေႃႈ”- ၵူၼ်းၼုမ်ႇ သိုပ်ႇလၢတ်ႈၼႄၼင်ႇၼႆ။
တၢင်းပဵၼ်ၶူဝ်ႊဝိတ်ႉ 19 ပွၵ်ႈၵမ်းသၢမ် ၼႂ်းဝဵင်းတႃႈလိူဝ်ႇ တေႃႇထိုင် ဝၼ်းတီႈ 31 /10/2021 ၼႆႉ မီးၵူၼ်းတိတ်းၸပ်း ၸိူဝ်းမႅင်း 500 ပၢႆ လူႉတၢႆ 10 ၵေႃႉ ၼႆယဝ်။
ၼွၵ်ႈလိူဝ်ၼၼ်ႉ တႄႇဢဝ် ဝၼ်းတီႈ 1/11/2021 ၼႆႉၵႂႃႇ ႁူင်းႁဵၼ်းလူင်ပွင်ၸိုင်ႈ တီႈဝဵင်းတႃႈလိူဝ်ႇ တႃႇ 29 လင်ၵေႃႈ လႆႈပိုတ်ႇၶိုၼ်းယဝ်ႉ ၵူၺ်းၵႃႈ လုၵ်ႈဢွၼ်ႇ ၵႂႃႇၶိုၼ်ႈႁူင်းႁဵၼ်းတႄႉ ပႆႇမီး ယွၼ်ႉတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းၼမ်။
ၵူၼ်းပိုၼ်ႉတီႈ တႃႈလိူဝ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ႁူင်းႁဵၼ်းပိုတ်ႇယဝ်ႉ ဝႃႈၼႆသေတႃႉၵေႃႈ ပႆႇႁၼ် လုၵ်ႈဢွၼ်ႇၵႂႃႇၶိုၼ်ႈၵၼ်ၼမ်ၶႃႈ။ ယွၼ်ႉတၢင်းပဵၼ်ၽႄႈလၢမ်းႁဵတ်းၼႆသေ ပေႃႈမႄႈၵေႃႉလႂ် ၽႂ်ၵေႃႈၶႂ်ႈပွႆႇလုၵ်ႈဢွၼ်ႇၵႂႃႇၶိုၼ်ႈႁူင်းႁဵၼ်းၶႃႈ၊ ၵူဝ်တိတ်းၸပ်းတၢင်းပဵၼ်ၵၼ်ၶႃႈ ဢေႃႈ။ ဢၼ်ၵႂႃႇၶိုၼ်ႈတႄႉၵေႃႈ တေပဵၼ်လုၵ်ႈဢွၼ်ႇၼႂ်းမုင်ႉႁေႃႁိူၼ်း ၵူၼ်းသိုၵ်းၶဝ်ၸိူဝ်းၼၼ်ႉၵူၺ်းၶႃႈ”- ဝႃႈၼႆ။
တၢင်းပဵၼ်ၶူဝ်ႊဝိတ်ႉ 19 ဢၼ်ၽႄႈလၢမ်းႁႅင်း ၼႂ်းဝဵင်းတႃႈလိူဝ်ႈၼႆႉ ၵမ်ႈၼမ် ပဵၼ်ၸွမ်းသၢပ်ႇဝဵင်းလႄႈ ပေႃႈမႄႈၵေႃႉလႂ် ပႆႇႁတ်းပွႆႇလုၵ်ႈ ဢွၼ်ႇၵႂႃႇၶိုၼ်ႈႁူင်းႁဵၼ်း မႆႈၸႂ်ၵူဝ်လုၵ်ႈဢွၼ်ႇ တိတ်းၸပ်း တၢင်းပဵၼ်ၵၼ် ၵူၼ်းပိုၼ်ႉတီႈလၢတ်ႈ။
