ႁွင်ႈၵၢၼ်ၾၢႆႇပၢႆးယူႇလီ လူင်ပွင်ၸိုင်ႈမိူင်းထႆး တေၵူတ်ႇထတ်းလႄႈ သမ်းယႃႁႄႉၵင်ႈ တၢင်းပဵၼ် ၶူဝ်ႊဝိတ်ႉ 19 ပၼ်ၵူၼ်းၵူႈၵေႃႉဢၼ်ယူႇၼႂ်းၽႅၼ်ႇလိၼ်မိူင်းထႆး။

မိူဝ်ႈဝၼ်းတီႈ 30/10/2021 ႁွင်ႈၵၢၼ်ၾၢႆႇပၢႆးယူႇလီ၊ ၾၢႆႇၽွင်းငမ်း ႁူမ်ႈလူၺ်ႈ ၶူင်းၵၢၼ်ပၢႆးယူႇလီလႄႈ ပၼ်တၢင်းႁူႉ ႁႅင်းၵၢၼ်ၸၢဝ်းၶိူဝ်း MAP Foundation လူင်းပိုၼ်ႉတီႈၵူတ်ႇထတ်းလႄႈ သမ်းယႃႁႄႉၵင်ႈ ပၼ် ၵူၼ်းၼႂ်းပိုၼ်ႉတီႈလႄႈ ႁႅင်းၵၢၼ်ယၢၼ်မိူင်း တီႈႁူင်းႁဵၼ်းပႃႇၽႅင်ႉ ဝဵင်းၵဵင်းမႆႇ ၸိုင်ႈထႆး။

ၸၢႆးသႅင်မိူင်း မင်းၵွၼ်း ႁူဝ်ပဝ်ႈသိုဝ်ႇၶၢဝ်ႇၸၢဝ်းၶိူဝ်း မိူင်းထႆးတွၼ်ႈၼိူဝ်/ ၽူႈၸတ်းၵၢၼ်လူင် ႁူင်းပွႆႇသဵင် FM 99 ၵဵင်းမႆႇ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈလဵဝ်ၼႆႉ တႃႇတေႁႄႉၵင်ႈတၢင်းပဵၼ်ၶူဝ်ႊဝိတ်ႉ-19ၼႆသေ ၾၢႆႇပၢႆးယူႇလီၶဝ် တေၶတ်းၸႂ်သမ်းပၼ်ၵူႈၵေႃႉ မီးဝတ်းၵေႃႈလီ – ဢမ်ႇမီးၵေႃႈယဝ်ႉ ၊ သင်ဝႃႈပိုၼ်ႉတီႈလႂ် မီးႁႅင်းၵၢၼ်ယူႇၼမ်ၼႆ လၢတ်ႈမႃးလႆႈ ႁဝ်းၶႃႈတေၵပ်းသၢၼ်တင်းၾၢႆႇပၢႆးယူႇလီၶဝ်သေ လူင်းပိုၼ်ႉတီႈၵႂႃႇသမ်းပၼ်တီႈၼၼ်ႈ – သင်ဝႃႈပီႈၼွင်ႉႁဝ်းၵေႃႉလႂ်သေဢမ်ႇဝႃႈ ဢမ်ႇမီးဝတ်းဝႂ် ယၢပ်ႇၸႂ်တႃႇတေၶဝ်ႈထိုင်ယႃႁႄႉၵင်ႈၼႆၸိုင်ႈ ၵပ်းသိုပ်ႇမႃးလႆႈတီႈ 053-328 134 / 053 328 130 ဢမ်ႇၼၼ်တီႈႁူင်းပွႆႇသဵင် MAP Radio ၵေႃႈလႆႈ ” ဝႃႈၼႆ။

ၸၢႆးၸၢႆး ႁႅင်းၵၢၼ်ၼႂ်းၵဵင်းမႆႇ လၢတ်ႈဝႃႈ “မီးမုလ်ၼိထိ ၸုမ်းတႆးႁဝ်းၸွႆႈထႅမ်ၸိူင်ႉၼႆၼႆႉ လီတႄႉၶႃႈဢေႃႈ ယွၼ်ႉဝႃႈၵူၼ်းတႆးႁဝ်းမၢင်ၸိူဝ်း ဢမ်ႇႁူႉၵႂၢမ်းပိူၼ်ႈလီ ဢမ်ႇႁူႉဝႃႈတေၵႂႃႇတီႈလႂ် ၸိူင်ႉႁိုဝ် မၢင်ၸိူဝ်းဢမ်ႇ မီးဝတ်းၶႅၼ်းၼႃႇ တႃႇတေၵႂႃႇၵပ်းႁႃပိူၼ်ႈၵေႃႈၵူဝ် မေႃယႃမၢင်ၵေႃႉပၢႆလွၵ်ႇငိုတ်ႈလူးၵွၼ်ႇ တၢင်းပဵၼ်ၼႆႉသမ်ႉ မၼ်းဢမ်ႇလိူၵ်ႈဝႃႈတေၸပ်းၵူၼ်းမီးဝႂ်ၵူၺ်းလူးၼေႃႈ -” ဝႃႈၼႆ။

တီႈမိူင်းထႆးၼႆႉ တင်ႈဢဝ်ဝၼ်းတီႈ 1/11/2021 ၵႂႃႇ တႄႇပိုတ်ႇႁပ်ႉၵူၼ်းၶဝ်ႈဢႅဝ်ႇလႄႇတႃႇ 60 မိူင်းပၢႆ ၼႂ်းၼၼ်ႉပႃးတင်းမိူင်းႁူမ်ႈတုမ်- ၵူၺ်းတေလႆႈၶဝ်ႈမိူင်းတင်းႁိူဝ်းမိၼ်ၵူၺ်း ၵွပ်ႈၼၼ်လူင်ပွင်ၸိုင်ႈ ၸင်ႇၼႅတ်ႈသမ်းပၼ်ယႃႁႄႉၵင်ႈတၢင်းပဵၼ်ၵူႈၵေႃႉ ဢၼ်ယူႇၼိူဝ်ၽႅၼ်ႇလိၼ်ထႆး။

တေႃႇထိုင်မိူဝ်ႈၼႆႉ 1/11/2021 မိူင်းထႆးမီးၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ – 19 – 1,920,189 ၵေႃႉ ဢၼ်တိုၵ်ႉယူတ်းယႃမီး 99,227 ဢၼ်ယႃၶႅၼ်းမီး 1,801,702 ဢၼ်လူႉတၢႆမီး 19,260 ၵေႃႉ ၼႆယဝ်ႉ။