မိူဝ်ႈၼႆႉ ဝၼ်းတီႈ 1/11/2021 ယၢမ်းၵၢင်ၼႂ် 9 မူင်းပၢႆ သိုၵ်းဢူၺ်းလီလႄႈ RCSS ပိုတ်းယိုဝ်းၵၼ် သဵင်ၵွင်ႈလူင်/ ၵွင်ႈၸၢၵ်ႈ တႅၵ်ႇႁၢဝ်ႈႁႅင်း ႁိမ်းဝၢၼ်ႈလွႆယွႆး ဢိူင်ႇပၢင်ႇၵေႇတု ၸႄႈဝဵင်း မိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ။
ၵူၼ်း ဢိူင်ႇပၢင်ႇၵေႇတု လၢတ်ႈတီႈၽူႈတွႆႇႁွၵ်ႈဝႃႈ – “တေႃႇထိုင်ယၢမ်းလဵဝ်ၼႆႉ တိုၵ်ႉလႆႈငိၼ်းသဵင်ၵွင်ႈတႅၵ်ႇယူႇၶိူဝ်းယႂ်းၶႃႈ။ ပၢင်တိုၵ်း ဢၼ်ပဵၼ်ယူႇ ပိုတ်းယိုဝ်းၵၼ်ယူႇၼႆႉ ပဵၼ်တီႈလွႆၵုင်းပဝ်းတင်း လွႆယွႆးၶႃႈဢေႃႈ”- ဝႃႈၼႆ။
တေႃႇထိုင် ယၢမ်းလဵဝ် သဵင်ႈၵွင်ႈလူင်/ ၵွင်ႈၸၢၵ်ႈ တႅၵ်ႇႁႅင်းသေ ၵူၼ်းမိူင်းပိုၼ်ႉတီႈ ပွတ်းတွၼ်ႈၼၼ်ႉ ဢွၼ်ၵၼ်တိုၼ်ႇသၢၼ်ႈ တူၵ်းၸႂ်ၵူဝ် ။
“ႁဝ်းၶႃႈ ဢမ်ႇႁူႉဝႃႈ တေလႆႈပၢႆႈတၢင်းလႂ်ၶႃႈၼႆႉ ဢွၼ်ၵၼ်တူၵ်းၸႂ်ၵူဝ်ႁႅင်းၶႃႈဢေႃႈ။ သဵင်ၵွင်ႈၼႆႉၵေႃႈ တႅၵ်ႇႁႅင်းၼႃႇၶႃႈ၊ ႁဝ်းၶႃႈ ၵူၼ်းဝၢၼ်ႈလွႆ ယွႆးတႄႉ ယၢမ်းလဵဝ် ပၢႆႈယူႇဝႆႉတႂ်ႈလၢင်ႈၵျွင်း/ ဝတ်ႉလွႆယွႆးၶႃႈ”- ၵူၼ်းပိုၼ်ႉတီႈ သိုပ်ႇ လၢတ်ႈၼႄၼင်ႇၼႆ။
ၵူၼ်းပၢႆႈၽေးသိုၵ်း တၢင်းႁၢမ်းငၢႆး ဢွၼ်ၵၼ်ပွၵ်ႈႁိူၼ်းၶိုၼ်းလႆႈ 2-3 ဝၼ်းယဝ်ႉသေတႃႉ ၼႂ်းဢိူင်ႇပၢင်ႇၵေႇတု ၵိုတ်း 674 ၵေႃႉ တႄႉ ပႆႇၸၢင်ႈပွၵ်ႈၶိုၼ်းႁိူၼ်းယေး။ ယၢမ်းလဵဝ်သမ်ႉသဵင်ၵွင်ႈတႅၵ်ႇထႅင်ႈၸိူင်ႉၼႆ ယိင်ႈၶႅၼ်းႁဵတ်းႁႂ်ႈၵူၼ်းဝၢၼ်ႈဢမ်ႇႁတ်းပွၵ်ႈၶိုၼ်းႁိူၼ်း။
“မိူဝ်ႈၵၢင်ၼႂ်ၼႆႉ သဵင်ၵွင်ႈလူင် ၵွင်ႈၸၢၵ်ႈၼႆႉယိုဝ်းၵၼ် ႁႅင်းၼႃႇၶႃႈဢေႃႈ။ ႁဝ်းၶႃႈ ယူႇတၢင်းႁၢမ်းငၢႆးၼႆႉ လႆႈငိၼ်းသဵင်ၵွင်ႈတႅၵ်ႇၶိူဝ်းယႂ်း ၶႃႈ”- ၵူၼ်းႁၢမ်းငၢႆး ၵေႃႉၼိုင်ႈ လၢတ်ႈၼႄၽူႈတွႆႇႁွၵ်ႈၼင်ႇၼႆ။
ပၢင်တိုၵ်း ၼႂ်းၵႄႈ RCSS လႄႈ ၸုမ်းဢူၺ်းလီပွတ်းႁွင်ႇၼႆပိုတ်းယိုဝ်းၵၼ်ၼႂ်းၸႄႈဝဵင်းမိူင်းၵိုင် တႄႇဢဝ် ဝၼ်းတီႈ 14/9/2021 မႃး တေႃႇထိုင်ယၢမ်းလဵဝ်။ သွင်ၾၢႆႇပိုတ်းယိုဝ်းၵၼ် ႁၢဝ်ႈႁႅင်း ၼႂ်းဢိူင်ႇႁူဝ်ၶၢႆး ၽႄးလၢမ်ႈၵႂႃႇ တၢင်းဢိူင်ႇပၢင်ႇၵေႇတုလႄႈႁၢမ်းငၢႆး ၸိူဝ်းၼႆႉ ၵူၼ်းမိူင်း ႁူဝ် ၵူၼ်း ၼပ်ႉႁူဝ်ႁဵင် လႆႈပၢႆႈယၢၼ်ၽေးသိုၵ်း တီႈယူႇတၼ်းသဝ် ၵမ်ႈၽွင်ႈယင်း ပႆႇၸၢင်ႈပွၵ်ႈၶိုၼ်းႁိူၼ်းယေး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ