တင်ႈတႄႇၶၢဝ်းမႆႈမႃး တေႃႇထိုင် ၶၢဝ်းဢွၵ်ႇဝႃႇၼႆႉ ၵူၼ်းမိူင်းသူႈ လၢတ်ႈဝႃႈ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP ႁွမ်ႁႅင်းၵဵပ်းသိုၵ်းမႂ်ႇ 100 ၵေႃႉပၢႆ – လွင်ႈၼႆႉ ၾၢႆႇ SSPP လၢတ်ႈဝႃႈ -“တႃႇၸိူဝ်ႉၸၢတ်ႈၸၢဝ်းၶိူဝ်းတႆးႁဝ်း တေ ၸုၵ်း မၼ်ႈၵႂႃႇလႆႈၼၼ်ႉ — ၵႃႈတေလႆႈမီးဢဵၼ်ႁႅင်းယဝ်ႉ”- ဝႃႈၼႆ။
ဝၼ်းတီႈ 27/10/2021 ၼၼ်ႉ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ၶဝ်ႈၵဵပ်းသိုၵ်း ထိုင်ၼႂ်းဝဵင်း မိူင်းသူႈ၊ ႁိမ်းႁွမ်းသၢပ်ႇဝဵင်း ဝၢၼ်ႈၼႃးၸၢမ် ပၢင်ႇၸွႆး ပဵင်းသႃႇ ၸိူဝ်းၼႆႉၵေႃႈပႃး။ မိူင်းၼွင်၊ မိူင်းၼၢင်း၊ ၵေးသီး၊ မိူင်းၵိုင် ၸိူဝ်းၼႆႉၵေႃႈ ၵဵပ်းၼင်ႇၵဝ်ႇ။
ၵူၼ်းမိူင်းသူႈ ၵေႃႉၼိုင်ႈလၢတ်ႈတီႈ ၽူႈတွႆႇႁွၵ်ႈဝႃႈ – “ပေႃးပႃးၵမ်းၼႆႉ SSPP မႃးၵဵပ်းသိုၵ်းပဵၼ်ၵမ်းထူၼ်ႈ 4 ယဝ်ႉၶႃႈ။ ၶဝ်ဢဝ်သဵၼ်ႈမၢႆ မၼ်းသေမႃးၵဵပ်း။ ၸိူဝ်းမႃး ယူႇၼႂ်းဝဵင်းၵေႃႈ မႃးၸွမ်းႁွင်ႉထိုင်ၼႂ်းဝဵင်းၶႃႈဢေႃႈ။ ၶဝ်ၵေႃႈႁွင်ႉ ဢၼ် မီးလုၵ်ႈၸၢႆး 2 လုၵ်ႈၸၢႆး 3 ၼၼ်ႉၶႃႈဢေႃႈ ပေႃးဢမ်ႇလႆႈလုၵ်ႈၸၢႆး သမ်ႉဢဝ်ပေႃႈမၼ်းၵႂႃႇတႅၼ်းၵေႃႈမီးဢေႃႈ” – ဝႃႈၼႆ။
ဢၼ်ၵဵပ်းသိုၵ်းယၢမ်းလဵဝ်ၼႆႉ ၼႂ်းၸိုင်ႈတႆး ပွတ်းႁွင်ႇလၢႆလၢႆဝဵင်း ဢမ်ႇၵွမ်ႉၵႃႈ SSPP – သိုၵ်းလွႆ ၵေႃႈၵဵပ်းၵူၼ်းလွႆ၊ သိုၵ်ၶႄႇၵေႃႈ ၵဵပ်းၵူၼ်းၶႄႇ၊ သိုၵ်းၶၢင်ၵေႃႈ ၵဵပ်းၶၢင် – ႁွမ်ႁႅင်းသိုၵ်းမႂ်ႇမႃးၶိူဝ်းယႂ်း။
ဢၼ် SSPP ၵဵပ်းသိုၵ်း ဢမ်ႇၵွမ်ႉၵႃႈၼႂ်းၸေႈဝဵင်းမိူင်းသူႈၵူၺ်း – တၢင်း ၸႄႈဝဵင်းမိူင်းယႆ၊ တၢင်ႉယၢၼ်း၊ လႃႈသဵဝ်ႈ၊ သႅၼ်ဝီ၊ သီႇပေႃႉ၊ ၵျွၵ်ႉမႄး၊ ၼမ်ႉတူႈ၊ မိူင်းလူင်း မိူင်းမိတ်ႈ ၼမ်ႉၶမ်း မူႇၸေႊ ပၢင်ႇသၢႆး ၸိူဝ်းၼႆႉၵေႃႈၵဵပ်း။
ၽူႈၶၢၼ်ပၢၵ်ႇ SSSPP/SSA ၸဝ်ႈႁၢၼ်ၽူင်းႁၢၼ် လၢတ်ႈတီႈ ၽူႈတွႆႇႁွၵ်ႈဝႃႈ – “ဢမ်ႇၸႂ်ႈၼႂ်းဝဵင်းမိူင်းသူႈၵူၺ်း ဢၼ်ႁဝ်းၶႃႈၵဵပ်းၼႆႉ ။ တၢင်ႇတီႈတၢင်ႇဝဵင်းတီႈဢၼ်ဢမ်ႇၸႂ်ႈၼႃႈတီႈႁဝ်းၶႃႈၵုမ်းၵမ် ၼၼ်ႉၵေႃႈ ၵႂႃႇၵဵပ်းဢေႃႈ။ ပေႃးၵုမ်ႇပၢႆႈယူႇတိၵ်းတိၵ်း ၊ ပိူၼ်ႈတေမႃးယူႇတႅၼ်းတီႈယူႇႁဝ်းယဝ်ႉ။ တေႃႈလဵဝ် ႁဝ်းလူဝ်ႇ ၵူၼ်းၼုမ်ႇၸိူဝ်းမီး ပၢႆးဝူၼ်ႉလီ ၸိူဝ်းမီးပိင်ႇၺႃႇတၢင်းႁူႉ၊ ယုမ်ႇယမ်ၼိူဝ်တူဝ်ၸဝ်ႈၵဝ်ႇသေ ႁႂ်ႈမႃးၸွႆႈၶိုင်ပွင်ၸိုင် ၵၢၼ်လုၵ်ႉၽိုၼ်ႉႁဝ်း တေဢွင်ႇမၢၼ်ဢေႃႈ” – ဝႃႈၼႆ။
ၵႃႈၵွၼ်ႇပူၼ်ႉမႃး ၸုမ်းသိုၵ်း ၸိူဝ်းလုၵ်ႉၽိုၼ်ႉ ဢမ်ႇသူႈလူင်းၵဵပ်းသိုၵ်း ထိုင်ၼႂ်းၶူး ၼႂ်းဝဵင်း၊ ယၢမ်းလဵဝ်တႄႉ လိူဝ်သေဝဵင်းလူင် ၵမ်ႈၽွင်ႈ ၵူၼ်းၼႂ်းၶူး ၼႂ်းဝဵင်းၵေႃႈ ပေႃးမီးသဵၼ်ႈသၢႆ မၢႆ ဝႆႉ ၽႂ်သေ ဢမ်ႇဝႃႈ ပေႃး ဢႃႇတဵမ် 18 တၵ်းတေလႆႈၶဝ်ႈႁၢပ်ႇၵၢၼ်ၸိူဝ်ႉၸၢတ်ႈ လုၵ်ႉၽိုၼ်ႉ – ၽူႈၸွႆႈၵၢၼ် SSPP ယူႇၼႂ်းဝဵင်း လႃႈသဵဝ်ႈၵေႃႉၼိုင်ႈလၢတ်ႈ။
တင်ႈတႄႇ 1/2/2021 ၸုမ်းသိုၵ်းမၢၼ်ႈ ႁိမ်ၸိင်းယိုတ်းဢဝ်ဢႃႇၼႃႇ ဝၢၼ်ႈမိူင်းမႃး ၵူၼ်းၼုမ်ႇ ၸိူဝ်းယူႇၼႂ်းၶူး ၼႂ်းဝဵင်းၵေႃႈၶဝ်ႈထိူၼ်ႈ၊ ႁႃၵွင်ႈ ႁႃႈၵၢင်သေ ၶိုင်လုၵ်ႉၽိုၼ်ႉသိုၵ်းမၢၼ်ႈ။ တၢင်းမိူင်းတႆး ပွတ်းၸၢၼ်း ၵူၼ်းၼုမ်ႇ ၸၢဝ်းၶိူဝ်း ပၢတ်ႈတွင်း တႄႇၵၢၼ်လုၵ်ႉၽိုၼ်ႉ ၼႂ်းၸႄႈဝဵင်းၾၢႆၶုၼ်၊ မိူင်းပၢႆး။
“တေႃႈလဵဝ် ႁဝ်းၶႃႈ ၶႂ်ႈလႆႈၵွင်ႈ ၶႂ်ႈယိုဝ်းသိုၵ်းမၢၼ်ႈ ပေႃးၸုမ်းလႂ် ယိုဝ်းသိုၵ်းမၢၼ်ႈ ဢမ်ႇတၢပ်ႈလူဝ်ႇ ႁႃတီႉလိပ်းလေႃႇ ႁႅင်းၵူၼ်းႁဝ်းတေမႃးႁင်းၵူၺ်း”- ၵူၼ်းၼုမ်ႇတူၼ်ႈတီး ဢၼ်ၽှိုၵ်းၵၢၼ်သိုၵ်းသေ တိုၵ်ႉႁႃႁွမ်ၵွင်ႇတႃႈယိုဝ်း သိုၵ်းမၢၼ်ႈၵေႃႉၼိုင်ႈလၢတ်ႈ။
ၽွင်းယၢမ်းၼင်ႇၼႆ သိုၵ်း SSPP – RCSS သမ်ႉ ႁႅၼ်းသိုၵ်းလေႃႇတိုၵ်းၵၼ်၊ ၽႂ်ၵေႃႈ သမ်ႉ ဢမ်ႇလိုပ်ႈတိုၵ်း ၸုမ်းသိုၵ်းမၢၼ်ႈ ယိုတ်းဢႃႇၼႃႇ တႄႉတႄႉဝႃႈဝႃႈ လႄႈ ပေႃးၵဵဝ်ႇၵပ်း ၵၢၼ်လုၵ်ႉၽိုၼ်ႉမႃး ၵူၼ်းမိူင်းၵမ်ႈၼမ် ဢမ်ႇပေႃး ၶႂ်ႈတူၵ်ႇလၢတ်ႈၸွမ်း။
