တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁႅင်း ၼႂ်းၸႄႈဝဵင်းသီႇသႅင်ႇ ၵူၼ်းမိူင်းၸိူဝ်းတိတ်းၸပ်းၸိူဝ်ႉမႅင်း ဢွၼ်ၵၼ်ယူႇႁိူၼ်းယူတ်းယႃတူဝ်ႁၢင်းၵူၺ်း မႆႈၸႂ်ၵူဝ်ယၢပ်ႇၽိုတ်ႇတႃႇယူႇတႃႇၵိၼ်တီႈႁူင်းယႃ။
တႄႇဢဝ် ႁူဝ်လိူၼ်ၵျူႊလၢႆႊမႃး တေႃႇထိုင် ဝၼ်းတီႈ 26/10/2021 ၼႆႉ ၼႂ်းၸႄႈဝဵင်းသီႇသႅင်ႇ ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်းတၢင်း ပဵၼ်ၶူဝ်ႊဝိတ်ႉ 19 မီး 1,088 ၵေႃႉ၊ လူႉတၢႆ 24 ၵေႃႉ ၸွမ်းၼင်ႇလႆႈႁူႉၶေႃႈမုလ်းမႃးတီႈ ၽူႈၵွၼ်း ၸႄႈဝဵင်းဢွၵ်ႇဝႆႉၼင်ႇၼႆ။
ၵူၼ်းၼုမ်ႇ ၸႄႈဝဵင်းသီႇသႅင်ႇ ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းမိူင်းႁဝ်းၶႃႈ ၸိူဝ်းတိတ်းၸပ်းၸိူဝ်ႉမႅင်းသေ ဢမ်ႇၵႂႃႇယူတ်းယႃတူဝ် တီႈႁူင်းယႃၼႆႉ တေမီးၼမ်ၶႃႈဢေႃႈ။ ႁိမ်းႁွမ်း ႁဝ်းၶႃႈယူႇၸိူဝ်းၼႆႉၵေႃႈ မီးၶႃႈ။ ၵူၺ်းၵႃႈ ယူတ်းယႃႁင်းၽႂ်မၼ်း ၵိၼ်ယႃသေ ႁၢႆၵႂႃႇ ၵေႃႈမီးတင်းၼမ်။ ၵွပ်ႈၼႆလႄႈ ဢွၼ်ၵၼ်ယူတ်းယႃတီႈႁိူၼ်းၽႂ်မၼ်းၵေႃႈ မီးၼမ်ၼၼ်ႉၶႃႈယဝ်ႉ”- ဝႃႈၼႆ။
ၵူၼ်းမိူင်း ၸိူဝ်းတိတ်းၸပ်းတၢင်းပဵၼ်သေ ဢမ်ႇၶၢမ်ႇၵႂႃႇယူတ်းယႃတူဝ်တီႈႁူင်းယႃၼၼ်ႉ ယွၼ်ႉပိူဝ်ႈ ၵူဝ်မီးတၢင်းယၢပ်ႇၽိုတ်ႇလၢႆ လွင်ႈ ၊ ပိူင်လူင်မႆႈၸႂ် လွင်ႈၵိၼ်ယႅမ်ႉ တီႈႁူင်းယႃ ၵူဝ်ဢမ်ႇတဵမ်ထူၼ်ႈ ဝႃႈၼႆ။
“ပၼ်ႁႃမၼ်းသမ်ႉ ပဵၼ်ၼႆ ပေႃးၵူၼ်းၼႂ်းႁိူၼ်း ဢမ်ႇယူႇလီ ၵႂႃႇၸႅတ်ႈထူပ်းႁၼ် ၸိူဝ်ႉမႅင်း ။ ၵူၼ်းပဵၼ်ၼၼ်ႉသမ်ႉ တေလႆႈၶိုၼ်ႈႁူင်းယႃ ဢမ်ႇ ၼၼ် တေလႆႈၶဝ်ႈ Quarantine ။ ၵမ်းၼႆႉ တီႈႁိူၼ်းယေးၼၼ်ႉ တေလႆႈထုၵ်ႇ Lockdown ဝႆႉ။ ပေႃးတီႈႁိူၼ်း Lockdown ၼႆၸိုင် တႃႇ ၵူၼ်းဢၼ်မီးဝႆႉတီႈ Quarantine ၼၼ်ႉသမ်ႉ တေယၢပ်ႇတႃႇၵိၼ်ယႅမ်ႉ ။ ၵူၼ်းတီႈႁိူၼ်းၵေႃႈ ဢမ်ႇၸၢင်ႈၵႂႃႇသူင်ႇသေ ၸိူဝ်းမီး ငိုၼ်းတႄႉ သင်ႇသိုဝ်ႉၸွမ်းႁၢၼ်ႉဢဝ်ၵႂႃႇသူင်ႇပၼ် တႃႇလႂ် တႃႇၼၼ်ႉ ၵေႃႈလႆႈ ၸိူဝ်းဢမ်ႇမီးသမ်ႉတေယၢပ်ႇ ။ ၵွပ်ႈၼႆလႄႈ ဢမ်ႇၶၢမ်ႇၵႂႃႇၸႅတ်ႈတၢင်းပဵၼ် ။ တဵတ်ႇတဵတ်ႇယူတ်းယႃယူႇတီႈႁိူၼ်းႁင်းၽႂ်မၼ်း ၵူၺ်းၶႃႈ”- ၵူၼ်းၼုမ်ႇ သီႇသႅင်ႇ သိုပ်ႇလၢတ်ႈၼႄၼင်ၼႆ။
မိူဝ်ႈဝႃး ဝၼ်းတီႈ 26 ၼႂ်းၸႄႈဝဵင်းသီႇသႅင်ႇၼႆႉ ၵူတ်ႇထတ်းႁၼ် ၵူၼ်းတိတ်းၸပ်းၸိူဝ်ႉမႅင်းထႅင်ႈ 8 ၵေႃႉ၊ လူႉတၢႆ 2 ၵေႃႉ။ တႄႇဢဝ် ဝၼ်းတီႈ 8/7/2021 ၼၼ်ႉမႃး တေႃႇထိုင် 26/10/2021 ၼႆႉ မီးၵူၼ်းတိတ်းၸပ်းၸိူဝ်ႉမႅင်းတင်းမူတ်း 1,088 ၵေႃႉ၊ လူႉတၢႆ 24 ၵေႃႉ၊ ယႃၶႅၼ်း 619 ၵေႃႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ