ၵူၼ်းၼုမ်ႇတႆးတင်း ၽူႈပွင်ၵၢၼ်ၼႃႈဝၢၼ်ႈ ၼမ်ႉပွင်ႈ ၸႄႈဝဵင်းလႃႈသဵဝ်ႈ ႁူမ်ႈၵၼ် တီႉၺွပ်းၵူၼ်းၵဵဝ်ႇၶွင်ႈ ယႃႈမဝ်းၵမ်။
ဝၼ်းတီႈ 06/03/2018 ယၢမ်းၵၢင်ၶမ်ႈ 9 မူင်း ၵူၼ်းၼုမ်ႇတႆး တင်း ၽူႈပွင်ၵၢၼ်ၼႃႈဝၢၼ်ႈ သၢၼ်မိုဝ်းၵၼ်သေ ၵူတ်ႇထတ်း တီႈတူဝ်လုင်းၸၢႆးသၢင်ႇလႃႉ ၵူၼ်းမိူင်းယႆ ထူပ်းႁၼ် ယႃႈမႃႉ(WY) တီႈၼႂ်းထူင်မၼ်းၸၢႆး ၼႂ်း လင်ႁၢၼ်ႉၶၢႆၶဝ်ႈသွႆး တီႈဝၢၼ်ႈၼမ်ႉပွင်ႈ ဢိူင်ႇၼမ်ႉပွင်ႈ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။ လိူဝ်ၼၼ်ႉ တီႈႁိူၼ်းလုင်းမွင်ႇဢေး(ၵေႃႉၵဵဝ်ႇၵပ်းလုင်းသၢင်ႇလႃႉ) ဝၢၼ်ႈၼမ်ႉပွင်ႈ ၵူၺ်းၼင်ႇၵဝ်ႇ လႆႈၵႂႃႇၵူတ်ႇထတ်း ထူပ်းႁၼ်ထႅင်ႈ ယႃႈမႃႉ သႂ်ႇဝႆႉၼႂ်းပုင်းၶဝ်ႈ သၢၼ် တင်းၼမ်လၢႆ ဝႃႈၼႆ။
ၸၢႆးသၢင်ႇလူႇ ၵူၼ်းၼုမ်ႇတႆး ၼႂ်းဝၢၼ်ႈၼမ်ႉပွင်ႈ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ လုင်းသၢင်ႇလႃႉၼႆႉ ပဵၼ်ၵူၼ်းၸႃတိ မိူင်းယႆ မၼ်းမႃးႁိူၼ်းပီႈၼွင်ႉၶဝ် တီႈဝၢၼ်ႈၼမ်ႉပွင်ႈသေ တီႈၼၼ်ႉသမ်ႉ ပိုတ်ႇႁၢၼ်ႉၶၢႆၶဝ်ႈ သွႆးဝႆႉ။ ၵူၼ်းႁိမ်းႁွမ်း ႁူႉသေမႃးၸႅင်ႈ ၸင်ႇၵႂႃႇထတ်းတူၺ်း ႁဝ်းၶႃႈၵူတ်ႇႁၼ်ယႃႈမႃႉ ဢၼ်မၼ်းပႃးမႃး။ ဝၢႆးၼၼ်ႉလႆႈႁွင်ႉပႃးပလိၵ်ႈမၢၼ်ႈသေ သိုပ်ႇၵႂႃႇထတ်းႁိူၼ်း လုင်းမွင်ႇဢေး လႆႈႁၼ်ထႅင်ႈယႃႈမႃႉ ၼႂ်းပုင်းၶဝ်ႈ သၢၼ်ထႅင်ႈတင်းၼမ်” ဝႃႈၼႆ။
ပလိၵ်ႈမၢၼ်ႈလႆႈသူင်ႇတူဝ် လုင်းသၢင်ႇလႃႉတင်း လုင်းမွင်ႇဢေးၵႂႃႇ ဝႆႉတီႈႁူင်းပလိၵ်ႈၸႄႈဝဵင်းလႃႈသဵဝ်ႈသေ ၸႅင်ႈၵႂၢမ်း(ၸွႆႈတြႃး) ဝႆႉယဝ်ႉ ဝႃႈၼႆ။
ၸၢႆးသၢင်ႇလူႇ လၢတ်ႈဝႃႈ တေႃႈၼင်ႇ ဢမ်ႇမီးၸၢၵ်ႈယႃႈ ၼႂ်းမူႇဝၢၼ်ႈယႃႈမဝ်းၵမ် ပေႃးလိူင်ႇၼမ်ၵႃႈ ၼႆႉယဝ်ႉ။ သင်ၵူၼ်းၼုမ်ႇႁဝ်း ဢမ်ႇၾၢင်ႉဢွၼ်ၵၼ် လဵၼ်ႈယူႇၸိုင်။ ၵမ်းလိုၼ်းမႃး ၵူဝ်ပဵၼ်ၵူၼ်းပႅတ်ႈလၢႆ၊ ၵွပ်ႈၼၼ် ၵူၼ်းၼုမ်ႇ ႁဝ်းၶႃႈတင်း ၽူႈပွင်ၵၢၼ် ၼႃႈဝၢၼ်ႈ ႁူမ်ႈၵၼ်သေ သၢၼ်မိုဝ်း ၽဵဝ်ႈလၢင်ႉၵူၼ်းၵဵဝ်ႇၶွင်ႈယႃႈမဝ်းၵမ်ယဝ်ႉ ဝႃႈၼႆ။
ၾၢႆႇပၵ်းတႃတူၺ်းယႃႈမဝ်းၵမ် ၸိုင်ႈတႆးလၢတ်ႈဝႃႈ တေႃႈလဵဝ် ၼႂ်းမိူင်းတႆး ပွတ်းႁွင်ႇ၊ ပွတ်းၸၢၼ်းလႄႈ ပွတ်းဢွၵ်ႇ ယႃႈမဝ်းၵမ် လိူင်ႇၼမ် ၵူႈတီႈ မၢင်ဝဵင်းလုၵ်ႈဢွၼ်ႇဢႃယု 12 ၶူပ်ႇၵေႃႈၵိၼ်၊ ၶၼ်ယႃႈမႃႉၵေႃႈတူၵ်း သိုဝ်ႉလႆႈၵူႈ တီႈသႅၼ်း 1 ႁဵင် 2 မဵတ်ႉ၊ 3 မဵတ်ႉ ဢၼ်ထုၵ်ႇသုတ်း 1 မဵတ်ႉ 1 ပၢၵ်ႇၵေႃႈမီး ဝႃႈၼႆ။
