ၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 ၼႂ်းၸႄႈဝဵင်းသီႇသႅင် ၸိုင်ႈတႆးပွတ်းၸၢၼ်း မီး 1,000 ပၢႆ လူႉတၢႆ 20 ပၢႆယဝ်ႉ ဝႃႈၼႆ။
ၼႂ်းၸႄႈဝဵင်းသီႇသႅင်ႇ ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း ၵူတ်ႇထတ်း ႁၼ်ၵူၼ်းတိတ်း ၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 တေႃႇ ထိုင် ႁၢင်လိူၼ်ဢွၵ်ႊထိူဝ်ႊပိူဝ်ႊ 2021 ၼႆႉ မီး 1,000 ပၢႆ လူႉတၢႆ 20 ပၢႆ ၼႆယဝ်ႉ။
ၽူႈတူင်ႉၼိုင် ၼႂ်းၸုမ်းပရႁိတ သီႇသႅင်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸွမ်းၼင်ႇ ႁဝ်းၶႃႈ လႆႈႁပ်ႉႁူႉဝႆႉတႄႉ တေႃႇထိုင် ယၢမ်းလဵဝ် ၵူၼ်းတိတ်းၸပ်း ၸိူဝ်ႉမႅင်းၶူဝ်ႊဝိတ်ႉ မီးၵႂႃႇ ႁဵင်ပၢႆယဝ်ႉ လူႉတၢႆ 20 ပၢႆယဝ်ႉၶႃႈ။ ယွၼ်ႉၵူၼ်းမိူင်းႁဝ်းၶႃႈ ၵမ်ႈၼမ် ဢမ်ႇပေႃးသႂ်ႇၽႃႈတူမ်း သူပ်း ၵၼ် ၸိူဝ်းၼႆၵေႃႈ တေပႃးၶႃႈဢေႃႈ။ ယဝ်ႉၵေႃႈ ၶွၼ်ႈတုမ်ၵၼ်ၼမ် ၽွင်းၵႂႃႇသိုဝ်ႉၸၢႆႇၵၢတ်ႇ ၸိူဝ်းၼႆႉ ၵေႃႈပႃးၶႃႈဢေႃႈ”- ဝႃႈၼႆ။
ၵၢတ်ႇလူင် ဝဵင်းသီႇသႅင်ႇသမ်ႉ တႄႇပိုတ်ႇၵၢင်ၼႂ် ထိုင် 11 မူင်းၵၢင်ဝၼ်းသေ မီးၶၢဝ်းယၢမ်းႁိုင် ၶိုင်ႈဝၼ်းၵူၺ်းလႄႈ ၵူၼ်းမိူင်းၼႂ်းပိုၼ်ႉတီႈ ႁိပ်ႈ သိုဝ်ႉၸၢႆႇၵၼ် ၵူၼ်းၵိုၼ်းၶွၼ်ႈၵူႈဝၼ်း ဝႃႈၼႆ။
“မိူဝ်ႈၵူႈပွၵ်ႈတႄႉ ၵၢတ်ႇၼႆႉ ပိုတ်ႇတင်းဝၼ်းၶႃႈၼႃႇၼေႃ။ ယၢမ်းလဵဝ်သမ်ႉ တႄႇၵၢင်ၼႂ် ထိုင် 11 မူင်းၵၢင်ဝၼ်းၵူၺ်းလႄႈ ၵူၼ်းမိူင်းၼႆႉ ႁိမ် ၵၼ်ၵႂႃႇသိုဝ်ႉၵႂႃႇၸၢႆႇ ၵူဝ်ပိူၼ်ႈပိၵ်ႉဢိုတ်းၵၢတ်ႇ ။ ၵႂႃႇၶွၼ်ႈၵၼ်ၼမ် ၼႂ်းၵၢတ်ႇ တၢင်းပဵၼ်ၼႆႉ ၽႄႈလၢမ်းမႃးၼမ် တီႈၼၼ်ႈၵေႃႈ တေပႃးၶႃႈဢေႃႈ။ သင်ဝႃႈ ပိုတ်ႇတင်းဝၼ်းၼႆၸိုင် ၵူၼ်းသိုဝ်ႉၸၢႆႇ တေဢမ်ႇႁိမ်ၵၼ်သေ ၵူၼ်းၵေႃႈ တေႁၢင်ႇၵၼ် တၢင်းပဵၼ်ၵေႃႈ တေဢမ်ႇ တိတ်းၸပ်းၵၼ်လႆႈငၢႆႈၶႃႈ”- ၵူၼ်းပိုၼ်ႉတီႈ သီႇသႅင်ႇ လၢတ်ႈတီႈ ၽူႈတွႆႇႁွၵ်ႈၼင်ႇၼႆ။
ၼွၵ်ႈလိူဝ်ၼၼ်ႉ ၵူၼ်းမိူင်း ၼႂ်းပိုၼ်ႉတီႈ မၢင်ၸိူဝ်း တိတ်းၸပ်းတၢင်းပဵၼ်ၶူဝ်ႊဝိတ်ႉ 19 သေ ဢမ်ႇၶၢမ်ႇၵႂႃႇယူတ်းယႃ တီႈႁူင်းယႃ ယူႇတီႈ ႁိူၼ်းယေးၽႂ်မၼ်းသေ ယူတ်းယႃၵႂႃႇ ၸိူင်ႉၼၼ်ၵေႃႈ မီးထႅင်ႈတင်းၼမ် ၼႂ်းၸႄႈဝဵင်းသီႇသႅင် ၵူၼ်းပိုၼ်ႉတီႈလၢတ်ႈ။
