ၵူၼ်းၵေးသီး ၽူႈၸၢႆး ဢႃယု 50 ပီ ၵေႃႉၼိုင်ႈ ၵႂႃႇႁႃဝူဝ်းသေ ယဵပ်ႇၺႃးမၢၵ်ႇမႅင်းၾင်လိၼ် လႆႈမၢတ်ႇၸဵပ်းႁၢဝ်ႈႁႅင်း လူႉသဵင်ႈ/ တၢႆ တီႈႁူင်းယႃ ။
မိူဝ်ႈဝႃး ဝၼ်းတီႈ 24/10/2021 ယၢမ်းၵၢင်ၼႂ် မွၵ်ႈ 9 မူင်းၼၼ်ႉ လုင်းၸၢႆးသၢမ် ဢႃယု 50 ပီ ၵူၼ်းဝၢၼ်ႈၵုင်းၵေႃႇ ဢိူင်ႇဝၢၼ်ႈၶႅမ် ၸႄႈဝဵင်း ၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ၵႂႃႇႁႃဝူဝ်းသေ ယဵပ်ႇၺႃးမၢၵ်ႇမႅင်းၼႂ်းထိူၼ်ႇ ၼႂ်းၵႄႈဝၢၼ်ႈၵုင်းပႅၵ်ႇ – ဝၢၼ်ႈပၢင်ႇၵၢတ်ႇ လႆႈမၢတ်ႇၸဵပ်းႁၢဝ်ႈႁႅင်း ၶႃၾၢႆႇၼိုင်ႈ ပုတ်းၶၢတ်ႇ ၾၢႆႇၼိုင်ႈၾႆးမႆႈလွၵ်ႈလၢၼ်ႉ၊ လႆႈလူႉသဵင်ႈၵႂႃႇ တီႈႁူင်းယႃၵေးသီး ၼႆယဝ်ႉ။
ၽူႈတူင်ႉၼိုင် ၼႂ်းတူင်ႇဝူင်းၵူၼ်း ၵေးသီး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၶဝ်ၵႂႃႇၸွမ်းၵၼ် 3 ၵေႃႉ ၽူႈၸၢႆး 2 ၵေႃႉလႄႈ ယိင်း 1 ၵေႃႉ။ လုင်းသၢမ်ၼႆႉသမ်ႉၸွမ်းလင်ၶဝ်ၵႂႃႇ ပဵၼ်ၵေႃႉလိုၼ်းသုတ်းသေ ယဵပ်ႇၺႃးမၢၵ်ႇမႅင်းၾင်လိၼ် လႆႈသူင်ႇယူတ်းယႃတူဝ် တီႈႁူင်းယႃၵေးသီး။ လႆႈလူႉ တၢႆၵႂႃႇ တီႈႁူင်းယႃၶႃႈ”- ဝႃႈၼႆ။
လုင်းသၢမ် ဢႃယု 50 ပီၼႆႉ ပဵၼ်လုၵ်ႈၸၢႆး လုင်းၵမ်ႇ – ပႃႈမၢႆ ၵူၼ်းဝၢၼ်ႈၵုင်းၵေႃႇ ဢိူင်ႇဝၢၼ်ႈၶႅမ် ၸႄႈဝဵင်းၵေးသီး လႆႈလူႉသဵင်ႈၵႂႃႇ တီႈႁူင်း ယႃ မိူဝ်ႈဝႃး ၽွင်းၶၢဝ်းယၢမ်းၵၢင်ဝၼ်း 11 မူင်းၶိုင်ႈ ။
မၢၵ်ႇမႅင်းၾင်လိၼ် ဢၼ်ၵူၼ်းမိူင်းယဵပ်ႇသႂ်ႇၼၼ်ႉ ပဵၼ်မၢၵ်ႇၽႂ် ၸုမ်းလႂ် ႁၢင်ႈၵၢင်ဝႆႉ ဢၼ်ဝႃႈၼၼ်ႉ ဢမ်ႇလႆႈႁူႉၸွမ်း ဝႃႈၼႆ။
“မဵဝ်းသိုၵ်းၼႃႇၼေႃ ၶဝ်ၵႂႃႇတၢင်းလႂ်ၵေႃႈ ၶဝ်ၾင်ဝႆႉႁဵတ်းၼၼ်ၶႃႈယူဝ်ႉ ၸွမ်းႁႆႈၸွမ်းသူၼ် ၸွမ်းသဵၼ်ႈတႃႈသၢႆတၢင်း ၵူၼ်းပႆ ၸိူဝ်းၼႆႉ ပဵၼ် ၽႅၼ်ၵၢၼ်သိုၵ်းၶႃႈယူဝ်ႉ။ မၢၵ်ႇႁၢင်ႈၵၢင်ၼၼ်ႉ ပဵၼ်မၢၵ်ႇၽႂ် ၸုမ်းလႂ်ၵေႃႈဢမ်ႇႁူႉၶႃႈ”- ၽူႈတူင်ႉၼိုင်ၼႂ်းတူင်ႇဝူင်းၵူၼ်း ၵေးသီး သိုပ်ႇလၢတ်ႈ ၼႄၼင်ႇၼႆ။
ဢိင်ၼိူဝ် ပၼ်ႁႃ လွင်ႈႁၢင်ႈၵၢင်မၢၵ်ႇမႅင်း ၸွမ်းၼႂ်းႁႆႈသူၼ်ၼႃး ၸွမ်းသဵၼ်ႈတႃႈသၢႆတၢင်း ၸိူဝ်းၼႆႉ ႁဵတ်းႁႂ်ႈ ၵူၼ်းမိူင်းၼႂ်းပိုၼ်ႉတီႈ ထူပ်းတၢင်း ယၢပ်ႇၽိုတ်ႇၵိၼ်းၸႂ်ၵၼ် ၼႆယဝ်ႉ။
ၵူၼ်းမိူင်းပိုၼ်ႉတီႈ ၵေးသီး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“တႃႇတေၵႂႃႇသူႇၸႂ်းႁႆႈသူၼ်တႄႉ ပေႃးၶဝ်ၾင်ဝႆႉ မၢၵ်ႇၸိူင်ႉၼႆ ၵူၼ်းဝၢၼ်ႈ ၵူၼ်းသူၼ်ၵေႃႈ တႃႇတေၵႂႃႇႁဵတ်းၵၢၼ်ၵၼ် ၶႂ်ႈယၢပ်ႇယဝ်ႉ ၽႂ်ၵေႃႈ တေဢမ်ႇႁတ်းဢွၵ်ႇဝၢၼ်ႈယဝ်ႉ မႆႈၸႂ်ၵၼ်ၶႃႈဢေႃႈ ပေႃးပဵၼ်ၸိူင်ႉၼႆ မႃး တိၵ်းတိၵ်းတႄႉ။ မိူဝ်ႈၵူႈပွၵ်ႈ ဢမ်ႇယၢမ်ႈမီးသေပွၵ်ႈၶႃႈၸိူင်ႉၼႆ။ ”- ဝႃႈၼႆ။
တႄႇဢဝ် လိူၼ်ၵျုၼ်ႊ 2021 ၼၼ်ႉမႃး သိုၵ်း SSPP တင်း RCSS ပဵၼ်ပၢင်တိုၵ်းၵၼ် တၢင်းပွတ်းလွႆႁူၼ်းႁၢဝ်ႈႁႅင်းသေ ႁဵတ်းႁႂ်ႈၵူၼ်းမိူင်း ၼႂ်းပိုၼ်ႉတီႈ ပွတ်းၵေးသီး လႆႈဢွၼ်ၵၼ်ပၢႆႈယၢၼ်ႁိူၼ်းယေး တီႈယူႇၵၼ် ၼပ်ႉႁူဝ်ႁဵင် ၼႆယဝ်ႉ။
