ၵူၼ်းဝၢၼ်ႈ ၼႂ်းၸႄႈဝဵင်းတၢင်ႉယၢၼ်း ဢွၼ်ၵၼ်ပၢႆႈယွၼ်ႉသိုၵ်းၵဝ်ႈၵၢင်ႉ MNDAA ယွၼ်းၵူၼ်းသိုၵ်းမႂ်ႇ မႄႈယိင်းၵေႃႈဢမ်ႇဝႆႉ သင်ႉႁႂ်ႈသူင်ႇပၼ်၊ ၵူၼ်းဝၢၼ်ႈဢမ်ႇၸၢင်ႈသူင်ႇပၼ်လႄႈမႃးပေႃႉထုပ်ႉၵူၼ်းထဝ်ႈၼႂ်းဝၢၼ်ႈထိုင်တီႈမၢတ်ႇၸဵပ်း။
ဝၼ်းတီႈ 19/10/2021 MNDAA ယွၼ်းႁႂ်ႈၵွၼ်းဢိူင်ႇၵၢင်ႉၵႄႇ ဝၢၼ်ႈၵုင်းၵေႃႇ ဢိူင်ႇၼွင်လႅင် သူင်ႇပၼ်ၵူၼ်းသိုၵ်းမႂ်ႇ 5 ၵေႃႉ၊ ႁႂ်ႈသူင်ႇပၼ်ပႃးၼၢင်းယိင်း ဝႃႈၼႆ။
ၾၢႆႇတၢင်းဝၢၼ်ႈဢမ်ႇသူင်ႇပၼ်ၵူၼ်းလႆႈလႄႈ ဝၼ်းၼၼ်ႉယၢမ်းဝၢႆးဝၼ်း သိုၵ်းၵဝ်ႈၵၢင်ႉၶဝ်ႈမႃးၼႂ်းဝၢၼ်ႈသေ ပိတ်ႉပေႃႉ ပေႃႈမႄႈ ပူႇၵႄႇ ။
“ဝၼ်းၽိတ်ႈလိူၼ်သိပ်းဢဵတ်းမူၼ်းၼၼ်ႉ သိုၵ်းၵဝ်ႈၵၢင်ႉၶဝ်ႈဝၢၼ်ႈမႃးႁေ မႃးၸူးပူႇၵႄႇ။ ၵူၼ်းဝၢၼ်ႈၵူၼ်းၼုမ်ႇၵေႃႈပၢႆႈမူတ်းယဝ်ႉ။ တူဝ်ပူႇၵႄႇၵေႃႈဢမ်ႇမီးႁိူၼ်း။ ၶဝ်ၵေႃႈမႃးပေႃႉပိတ်ႉပေႃႈမႄႈပူူႇၵႄႇသေၵေႃႈ ဢွၵ်ႇၵႂႃႇၶိုၼ်းၼၼ်ႉၼႃႇ ” ၵူၼ်းဝၢၼ်ႈၵုင်းၵေႃႇ လၢတ်ႈတီႈၽူႈတွႆႇႁွၵ်ႈၼင်ႇၼႆ။
ၽွင်းသိုၵ်းၵဝ်ႈၵၢင်ႉ မႃးထဵတ်ႈထၢမ်ယူႇၼၼ်ႉ ၵေႃႉပဵၼ်မႄႈ ပူႇၵႄႇ ယွမ်းၼွမ်းဝွၼ်းထိုင်ယႃႇႁႂ်ႈႁဵတ်းႁၢႆႉၸႃႉတီႈၶဝ်လႄႈတီႈၵူၼ်းဝၢၼ်ႈၼႆသေတႃႉ သိုၵ်းၵဝ်ႈၵၢင်ႉဢမ်ႇထွမ်ႇ ပေႃႉထုပ်ႉပိတ်ႉပၢပ်းသေၶိုၼ်းဢွၵ်ႇႁိူၼ်းၵႂႃႇ ၊ ၵူၼ်းဝၢၼ်ႈဢၼ်ယူႇႁိမ်းၵိၼ်ၸမ်သေ ႁၼ်ၸွမ်းၼၼ်ႉလၢတ်ႈၼင်ႇၼႆ။
“သိုၵ်းၵဝ်ႈၵၢင်ႉပေႃႉထုပ်ႉပေႃႈမႄႈပူႇၵႄႇလႄႈ ၵူၼ်းၼုမ်ႇၼႂ်းဝၢၼ်ႈ ၵေႃႉၼိုင်ႈဢေႃႈ။ ၶဝ်မႃးထၢမ်ႁႃပူႇၵႄႇၵႂႃႇလႂ် ႁဵတ်းသင်လႄႈဢမ်ႇသူင်ႇၵူၼ်းဝၢၼ်ႈပၼ်ၶဝ်ၼႆ ၊ မႄႈပူႇၵႄႇ ၶုပ်ႉၶဝ်ႇတွင်းပၢၼ်ႇၵေႃႈဢမ်ႇလႆႈ ပေႃႉပၼ်မႄႈထဝ်ႈ ၶႃမၼ်းပေႃးၵႂ်ႈဢေႃႈ “- ၵူၼ်းဝၢၼ်ႈၵုင်းၵေႃႇလၢတ်ႈၼင်ႇၼႆ။
လွင်ႈသိုၵ်း MNDAA မႃးယွၼ်းၵူၼ်းၼၼ်ႉ ၵူၼ်းဝၢၼ်ႈလႄႈ ၵၢင်ႉၵႄႇ ဢွၼ်ၵၼ်ၵႂႃႇယွၼ်းၼွမ်းဝႃႈ ႁႂ်ႈလႆႈသူင်ႇပၼ်ငိုၼ်းၵူၺ်း၊ ယႃႇပေဢဝ်ၵူၼ်းသေၵမ်း ၼႆသေတႃႉ ၾၢႆႇသိုၵ်းၵဝ်ႈၵၢင်ႉဢမ်ႇၽွမ်ႉ။ ၵူၼ်းၼုမ်ႇၼႂ်းဝၢၼ်ႈၸင်ႇဢွၼ်ၵၼ်ပၢႆႈမူတ်း။ ၵိုတ်းၵူၼ်းထဝ်ႈၵူၼ်းၵႄႇၵူၺ်း ၼႆၵူၼ်းၵုင်းၵေႃႇဢၼ်ႁွတ်ႈတၢင်ႉယၢၼ်း ၵေႃႉၼိုင်ႈၵေႃႈလၢတ်ႈၼင်ႇၼႆ။
သိုၵ်းၵဝ်ႈၵၢင်ႉၼႆႉ ၼွၵ်ႈလိူဝ်သေ ၵူၼ်းဝၢၼ်ႈၼွင်လႅင်ယဝ်ႉ ယင်းၶၢၼ်းၵူၼ်းဝၢၼ်ႈၼမ်ႉသႄႈ ပႃးထႅင်ႈ ႁႂ်ႈသူင်ႇသိုၵ်းမႂ်ႇ။ ၵူၼ်းဝၢၼ်ႈၼမ်ႉသႄႈၵမ်ႈၼမ်ၵေႃႈဢွၼ်ၵၼ်ပၢႆႈၶဝ်ႈဝဵင်းၼင်ႇၵဝ်ႇ လႆႈႁူႉၼင်ႇၼႆ။
တီႈတၢင်းဢိူင်ႇၼွင်လႅင် ၊ ၼမ်ႉသႄႈၼၼ်ႉ လိူဝ်သေ သိုၵ်း MNDAA ယဝ်ႉ ဢၼ်ပဵၼ်သိုၵ်း TNLA လႄႈ AA ၸုမ်းဢူၺ်းလီၶဝ်ၵေႃႈ ၶဝ်ႈမႃးတူင်ႉၼိုင်ယူႇသဝ်းဝႆႉ။ လိူဝ်ၼၼ်ႉသိုၵ်းၵူၼ်းမိူင်း ပျီႇတူႉၸိတ်ႉမၢၼ်ႈပၢင်ႇၵေႃႈ ယူႇသဝ်းဝႆႉမိူၼ်ၵၼ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ