ဝၼ်းတီႈ 22/10/2021 ယၢမ်းၵၢင်ၼႂ် ၵူၼ်းထဝ်ႈ ယိင်း ဢႃႇယု မွၵ်ႈ 60 ပၢႆ ၵေႃႉၼိုင်ႈ ပၢႆႈၽေးသိုၵ်းသေ လႆႈမႃးလူႉၶွႆႈတီႈ ပၢင်ႇၵေႇတု ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။

ပႃႈၼၢင်း ဢႃႇယု 60 ပီ ယူႇဝၢၼ်ႈမႂ်ႇလၵ်းမႃႉ ဢၼ်ပၢႆႈ ပၢင်တိုၵ်း မႃးယူႇဝႆႉတီႈ ဝၢၼ်ႈၼႃးႁီး/ မႆႉၸဵတ်းမဵဝ်းၼၼ်ႉ လႆႈလူႉသဵင်ႈသုတ်းမုၼ် ၵႂႃႇ။

ၵူၼ်းၸိူဝ်းမႃးမီးတီႈ ဝၢၼ်ႈၼႃးႁီး ၼႆႉ ၵမ်ႈၼမ် မီးဝူဝ်း မီးၵႂၢႆး မႃးလၢမ်ႈလဵင်ႉ၊ မႃးႁဵတ်းသုမ်ႉႁဵတ်းသွင်း မုင်းၽႃႈယၢင်သေယူႇ၊ ပၢႆႈမႃးမီးၶၢဝ်းတၢင်း မွၵ်ႈ 20 ဝၼ်း ပႆႇၸၢင်ႈပွၵ်ႈႁိူၼ်း၊ ပႃႈၼၢင်းၼႆႉ သမ်ႉမႃးယူႇ ဢမ်ႇလီ ၵိၼ်ဢမ်ႇဝၢၼ် သေ ထိုင်တီႈ လႆႈလူႉသဵင်ႈၵႂႃႇ။

ၽူႈမီးပုၼ်ႈၽွၼ်း ဢၼ်ၸွႆႈထႅမ် ၵူၼ်းပၢႆႈၽေးပၢင်တိုၵ်းသိုၵ်းသိုဝ် ၵေႃႉၼိုင်ႈလၢတ်ႈဝႃႈ -“ၵူၼ်းပၢႆႈၽေးသိုၵ်း ဢၼ်ပၢႆႈမႃး မီးတီႈၼႃးႁီး/မႆႉၸဵတ်းမဵဝ်း လူႉသဵင်ႈၵႂႃႇၼႂ်ၼႆႉသေ လႆႈပူၼ်ႉၶၢပ်ႈတူဝ် မိူဝ်ႈၼႆႉ ၵမ်းလဵဝ်ဢေႃႈ ။ လႅပ်ႈတေ ထၢတ်ႈၸႂ်တူၵ်းၵေႃႈ တေပႃးၽွင်ႈ ယွၼ်ႉမီးတၢင်းပဵၼ်ၶၢမ်ႇတူဝ်ဝႆႉၵေႃႈပိူင်ႈၼိုင်၊ လုမ်းလႃးၵၼ်ဢမ်ႇတဵမ်ထူၼ်ႈ ဢမ်ႇမိူၼ်ယူႇတီႈ ႁိူၼ်းၼၼ်ႉၼႃႇ”- ဝႃႈၼႆ။

ယၢမ်းလဵဝ် ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉ တီႈၼႃးႁီး/ မႆႉၸဵတ်းမဵဝ်းၼႆႉ တင်းမူတ်း လင်ႁိူၼ်း မီး 23 လင်။ ၼႂ်း 23 လင်ၼၼ်ႉ ပဵၼ် ၵူၼ်းဝၢၼ်ႈမႂ်ႇလၵ်းမႃႉ 21 လင်၊ ဝၢၼ်ႈလွႆသၢႆး 2 လင် ႁူဝ်ၵူၼ်း မီး 64 ၵေႃႉ ၼႆယဝ်ႉ။