မိူဝ်ႈၼႆႉ ဝၼ်းတီႈ 19/10/2021 ယၢမ်းၵၢင်ၼႂ် ၵၢတ်ႇၽိတ်ႈ (ဝၼ်းတုမ်းသိလ် ဢွၵ်ႇဝႃႇသႃ ) တီႈမိူင်းပၼ်ႇ ၵူၼ်းမိူင်းပိုၼ်ႉတီႈ ၶဝ်ႈသိုဝ်ႉၸၢႆႇၶၢႆၶူဝ်းၵိၼ်ၶူဝ်းလူႇ ၵိုၼ်းၶွၼ်ႈသတ်ႉၼႅၼ်ႈ ၵူၼ်းပိုၼ်ႉတီႈမႆႈၸႂ်တၢင်းပဵၼ်ၶူဝ်ႊဝိတ်ႉ။
ၵူၼ်း မိူင်းပၼ်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ဝၼ်းၵၢတ်ႇၽိတ်ႈ တီႈမိူင်းပၼ်ႇ ၵိုၼ်းႁႅင်းၼႃႇၶႃႈ။ ၽႃႈတူမ်းသူပ်း တႄႉ သႂ်ႇၵၼ်ယူႇ ၵူၺ်းၵႃႈ ဢမ်ႇယူႇႁၢင်ႇယၢၼ်ၵၼ်သေဢိတ်း။ ယူႇၸမ်ၵၼ်ႁႅင်းၼႃႇ။ ဢမ်ႇႁူႉလႄႈ ဢမ်ႇၵူဝ်ႁိုဝ် ဝႃႈလႃးၵေႃႈ ႁူႉၵၼ်ယူႇလႄႈ ၵူဝ်ဢိုပ်းမဵဝ်းလဵဝ် ဢမ်ႇၵူဝ်တၢႆႁိုဝ် လီမႆႈၸႂ် ၸွမ်းပီႈၼွင်ႉမိူင်းပၼ်ႇႁဝ်းၶႃႈ ၵူႈၵေႃႉၶႃႈဢေႃႈ။ သင်ဝႃႈ ၼႂ်းၵၢတ်ႇၼၼ်ႉ မီးၵူၼ်းတိတ်းၸပ်းၸိူဝ်ႉမႅင်းဝႆႉ 2 -3 ၵေႃႉၼႆ တေႁဵတ်းႁိုဝ် ။ ပႃးၵၼ်တိတ်းၸပ်းမူတ်း ၶႃႈဢေႃႈၼၼ်ႉ”- ဝႃႈၼႆ။
ဝၼ်းၵၢတ်ႇၽိတ်ႈ တီႈမိူင်းပၼ်ႇ မိူဝ်ႈၼႆႉ ၸတ်းႁဵတ်း တီႈႁူင်းႁေႃၸဝ်ႈၵေႃးလီႇ မီးၽၵ်းတူၶဝ်ႈ ဢွၵ်ႇပဵၼ်တၢင်းၵၢၼ်ယူႇသေတႃႉ ၊ ဢမ်ႇမီးလွင်ႈပႂ်ႉၵူတ်ႇထတ်းၵဵပ်းၸိုဝ်ႈ တီႈၼႃႈၽၵ်းတူ ၵူၼ်းပိုၼ်ႉတီႈ လၢတ်ႈၼႄၼင်ႇၼႆ။
“ၵၢတ်ႇၽိတ်ႈ မိူဝ်ႈၼႆႉ ၶၢႆႉမႃးႁဵတ်းတီႈႁူင်းႁေႃ ၸဝ်ႈၵေႃးလီႇ။ ၵွၼ်ႇၼႃႈၼၼ်ႉ ႁဵတ်းတီႈၼႃႈဝတ်ႉမူၺ်ႇတေႃႇ ၵၢင်ဝဵင်းၶႃႈဢေႃႈ။ တီႈႁူင်းႁေႃ ၸဝ်ႈၵေႃးလီႇၼႆႉ မီးၽၵ်းတူၶဝ်ႈဢွၵ်ႇဝႆႉ သင်ဝႃႈ မီးၸုမ်းဢဝ်ပုၼ်ႈၽွၼ်း မႃးပႂ်ႉၸႅတ်ႈတၢင်းပဵၼ်တီႈတၢင်းၽၵ်းတူၶဝ်ႈဢွၵ်ႇၼၼ်ႉ တေလီၵျႃႉၶႃႈ။ ယဝ်ႉ ၵေႃႈ ပၼ်ၶဝ်ႈဢွၵ်ႇၵႂႃႇၸွမ်းပၵ်းၸွမ်းပိူင်ႁႄႉၵင်ႈတၢင်းပဵၼ်ၼႆတႄႉ ဢမ်ႇမီးတီႈလၢတ်ႈသင်ယဝ်ႉၶႃႈ”- ဝႃႈၼႆ။
ယၢမ်းလဵဝ် ၼႂ်းၸႄႈဝဵင်းမိူင်းပၼ်ႇၼႆႉ မီးၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 500 ပၢႆ လူႉတၢႆယဝ်ႉ 9 ၵေႃႉ ။ တေႃႇထိုင်မိူဝ်ႈၼႆႉ ယင်းတိုၵ်ႉမီးၵူၼ်းတိတ်းၸပ်းၼမ်ၶိုၼ်ႈမႃးယူႇၵူႈဝၼ်း ၊ ပဵၼ်ဢၼ်လီမႆႈၸႂ်ဝႆႉယူႇ ၵူၼ်းပိုၼ်ႉတီႈလၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ