လုၵ်ႈဢွၼ်ႇယိင်း ဢႃယု 16 ၶူပ်ႇၵူၼ်းဝၢၼ်ႈလွႆၼွႆႉဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆး ပွတ်းၸၢၼ်း တၢႆယွၼ်ႉသျွၵ်ႉ (Shock) ယႃႈမဝ်းၵမ်ၵႂႃႇၼၼ်ႉ ပေႃႈလဵင်ႉၶႄႇ ၽူႈႁွင်ႉႁူၺ်းၸိူဝ်းၼၼ်ႉ ဢဝ်ငိုၼ်းၵႄႈလိတ်ႈပၼ်ႁႃဝႃႈၼႆ ။
ၼႂ်းဝၼ်းတီႈ 21/6/2025 ၼၢင်းႁဵဝ်းငိုၼ်း ဢႃယု 16 ပီ ၵႂႃႇႁၢၼ်ႉ KTV X3 ဢၼ်ပိုတ်ႇဝႆႉ တၢင်းဝၢၼ်ႈမႆႉၼိဝ်ႉ ဢိူင်ႇၼမ်ႉတိုင်း ၸႄႈဝဵင်းမိူင်းပၼ်ႇ ၵိၼ်ယႃႈမဝ်းၵမ် Happy Water ၼမ်သေ ထိုင်တီႈလႆႈလူႉတၢႆ ။
ၵူၼ်းမိူင်းပၼ်ႇ ဢၼ်ႁူႉႁၼ်ၸွမ်းလွင်ႈၼႆႉလၢတ်ႈတီႈၽူႈတွႆႇႁွၵ်ႈဝႃႈ – ၸၢဝ်းၶႄႇ ဢၼ်မႃးႁဵတ်းၵၢၼ်မႆႉတီႈဝဵင်းမိူင်းပၼ်ႇႁူၺ်းႁွင်ႉဢဝ် ၼၢင်းႁဵဝ်းငိုၼ်းလႄႈ ဢူၺ်းၵေႃႉမၼ်းၼၢင်း 2 ၵေႃႉ ၵႂႃႇႁၢၼ်ႉ KTV သေၸႂ်ႉၵိၼ် ၼမ်ႉယႃႈမဝ်းၵမ် Happy Water ။ ပေႃးၵိၼ်လႆႈ ၼိုင်ႈၵွၵ်းတေပၼ် ငိုၼ်းၼိုင်ႈသႅၼ်ပျႃး ၊ ၼၢင်းႁဵဝ်းငိုၼ်း ၵိၼ်ၼမ်ႉယႃႈမဝ်းၵမ် Happy Water 5 ၵွၵ်းသေပဵၼ်သျွၵ်ႉ ထိုင်တီႈလႆႈတၢႆ -ဝႃႈၼႆ။
ၵူၼ်းႁူႉၸွမ်းလွင်ႈၼႆႉ လၢတ်ႈၽူႈတွႆႇႁွၵ်ႈဝႃႈ-“ ပေႃႈလဵင်ႉၶႄႇ ၸၢင်ႈၶဝ်ၵိၼ်ဢိူဝ်ႈ။ ၼိုင်ႈၵွၵ်း တေပၼ်ၼိုင်ႈသႅၼ်ၼႆ ၊ တႆးၵေႃႉမၼ်းတႄႉ ၵိၼ် 4 ၵွၵ်း ဢမ်ႇတၼ်းတၢႆ ။ တၼ်းၶိုတ်းသူင်ႇႁူင်းယႃႇ ၊ ထႅင်ႈၵေႃႉတႄႉ ဢမ်ႇၵိၼ်သင် ၊ ၼၢင်းႁဵဝ်းငိုၼ်းၼႆႉ ၵိၼ် Happy Water 5 ၵွၵ်းသေ ဢမ်ႇၶၢမ်ႇလႆႈ မၼ်းပေႃးၼွၵ်ႉ ၸဵမ်မိူဝ်ႈ 7 မူင်းၵၢင်ၶမ်ႈယဝ်ႉ ၊ လႆႈဝႃႈတၢႆၵႂႃႇၼႂ်းႁွင်ႈ KTV ၼၼ်ႉယဝ်ႉ”- ဝႃႈၼႆ ။
ၼၢင်းႁဵဝ်းငိုၼ်းၼႆႉ တိုၵ်ႉပဵၼ်လုၵ်ႈႁဵၼ်းၶိုၼ်ႈႁူင်းႁဵၼ်း G-12 တီႈဝဵင်းမိူင်းပၼ်ႇဝႆႉ လႆႈႁူႉၼင်ႇၼႆ။
ၵူၼ်းတီႈႁၢၼ်ႉၶေႇထီႇဝီႇၼၼ်ႉ လႆႈဢဝ်တူဝ် ၼၢင်းႁဵဝ်းငိုၼ်းသူင်ႇႁူင်းယႃႇသိုၵ်း တီႈဝဵင်းမိူင်းပၼ်ႇ ယူႇသေတႃႉ ႁူင်းယႃႇဢမ်ႇႁပ်ႉ လႆႈဢဝ်မႃးၶိုၼ်းတီႈႁိူၼ်း။ ၵေႃႉမႄႈလႄႈပီႈပီႈၼွင်ႉၼွင်ႉ ပူၼ်ႉၶၢပ်ႈတူဝ် ပၼ်ၼႂ်းဝၼ်းတီႈ 22/6/2025 ။
ၼႂ်းဝၼ်းပူၼ်ႉၶၢပ်ႈတူဝ်တၢႆၼၢင်းႁဵဝ်းငိုၼ်းၼၼ်ႉ ပေႃႈလဵင်ႉၶႄႇဢဝ်ငိုၼ်းၸွႆႈပၼ် 50 သႅၼ်သေ တူဝ်ပေႃႈလဵင်ႉၼၼ်ႉတႄႉ ပၢႆႈၵႂႃႇယူႇဝႆႉ တီႈဝဵင်းၼမ်ႉၸၢင် ။ ဝၢႆးၼၼ်ႉ ၵၢင်ႉၵႄၼႂ်းဝၢၼ်ႈ ၵႂႃႇတီႉၺွပ်းမႃးၶိုၼ်းမိူင်းပၼ်ႇ။ ၼႂ်းဝၼ်းတီႈ 28/6/2025 ဝၼ်းၵၢပ်ႈသွမ်းပၼ်မၼ်းၼၢင်းၼၼ်ႉ ပေႃႈလဵင်ႉၼၼ်ႉပၼ်ငိုၼ်းထႅင်ႈ 200 သႅၼ်ပျႃး ။
ထိုင်မႃးဝၼ်းတီႈ 1/7/2025 ပေႃႈလဵင်ႉၶႄႇၼၼ်ႉ ဢဝ်ငိုၼ်းမႃးပၼ်တီႈမႄႈၼၢင်းႁဵဝ်းငိုၼ်းထႅင်ႈ 2 ႁဵင် သႅၼ်ပျႃးသေ သွင်ၾၢႆႇလႆႈၸႂ်ၵၼ် ၵႄႈလိတ်ႈပၼ်ႁႃယဝ်ႉတူဝ်ႈယဝ်ႉၼႆ ၵူၼ်းၸမ်ၸႂ်တင်းၽူႈတၢႆ လၢတ်ႈၼင်ႇၼႆ ။
ၵူၼ်းမိူင်းဝဵင်းမိူင်းပၼ်ႇလၢတ်ႈၽူႈတွႆႇႁွၵ်ႈဝႃႈ -“ ပူၼ်ႉမႃးၼႆႉ ပေႃႈလဵင်ႉၶႄႇ ဢဝ်ငိုၼ်း 2 ႁဵင်သႅၼ်ပျႃးသေ မႃးတွင်းပၢၼ်ႇတီႈ မႄႈ ၼၢင်းႁဵဝ်းငိုၼ်းလႄႈ ၵၢင်ႉၵႄၼႂ်းဝၢၼ်ႈ ၊ ဝၢႆးၼၼ်ႉ ၶဝ်ႈတူၵ်းလူင်း လူင်းလၢႆးမိူဝ်းၵႄႈလိတ်ႈ ပၼ်ႁႃၵႂႃႇယဝ်ႉၼႆ ”- ဝႃႈၼႆ ။
တႃႇယိုၼ်ႈယၼ်လႆႈ လွင်းၵႄႈလိတ်ႈပၼ်ႁႃတင်း ငိုၼ်း 2 ႁဵင်သႅၼ်ပျႃးၼႆႉ ယူႇတီႈၸုမ်းၶၢဝ်ၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇၸူးတၢင်းၸဝ်ႈတူဝ်ၾၢႆႇ ၼၢင်းႁဵဝ်းငိုၼ်းသေတႃႉ ၵပ်းသိုပ်ႇဢမ်ႇလႆႈ ။
ၵဵဝ်ၵပ်းလွင်ႈၼႆႉ ၵူၼ်းပိုၼ်ႉတီႈတႄႉ လၢတ်ႈၵၼ်ဝႃႈ ဢမ်ႇထုၵ်ႇလီဢဝ်ငိုၼ်းၵႄႈလိတ်ႈ ထုၵ်ႇလီဢဝ်တၢင်းပၵ်းပိူင်မၢႆမီႈသေၵႄႈလိတ်ႈၵႂႃႇ။ ယွၼ်ႉဝႃႈ လုၵ်ႉဢဝ်လႅၼ်လိၼ်ထႆး မႃးထိုင်မိူင်းပၼ်ႇၼႆႉ ပေႃႈလဵင်ႉၶႄႇ ဢမ်ႇမေႃလၢတ်ႈၵႂၢမ်းတႆးမီးၼမ်ၼႃႇယဝ်ႉ ယႃႈမဝ်းၵမ်ၵေႃႈၼမ်လိူင်ႇၼႃႇယဝ်ႉ ။ ပေႃႈလဵင်ႉၶႄႇၸိူဝ်းၼႆႉ ပေႃးမီးပၼ်ႁႃတင်းၵူၼ်းပိုၼ်ႉတီႈ ၶဝ်ဢဝ်ငိုၼ်းသေၵႄႈလိတ်ႈဢဝ်တႃႇသေႇ။ ၶႂ်ႈလႆႈလွင်ႈၽဵင်ႇပဵင်းပဵၼ်ထမ်း – ၶႂ်ႈႁႂ်ႈၸဝ်ႈၼႃႈတီႈၾၢႆႇၵဵဝ်ႇၶွင်ႈ ၸွႆႈၵႄႈလိတ်ႈပၼ်ၽွင်ႈ – ဝႃႈၼႆ ။
ဝဵင်းမိူင်းပၼ်ႇၼႆႉပဵၼ်ပိုၼ်ႉတီႈ RCSS ၵုမ်းၵမ်ဝႆႉ ၊ ၵဵဝ်ၵပ်းလွင်ႈပၼ်ႁႃၼႆႉ ၾၢႆႇတင်း (RCSS) တေသိုပ်ႇၵူတ်ႇထတ်းၵႂႃႇ – ၼႆ ၸဝ်ႈၼႃႈတီႈၼႂ်းပိုၼ်ႉတီႈလၢတ်ႈၼင်ႇၼႆ ။
ယၢမ်းလဵဝ်တီႈဝဵင်းမိူင်းပၼ်ႇ ႁၢၼ်ႉမူၼ်ႈၵျေႃႇ KTV ၸိူဝ်းၼႆႉ သိုဝ်ႉၶၢႆယႃႈမဝ်းၵမ် Happy Water ၼိုင်ႈထူင်လႆႈပၼ် 3 သႅၼ်ပျႃး ၵူၼ်းၼုမ်ႇပိုၼ်ႉတီႈလၢတ်ႈၼင်ႇၼႆ ။
ၼႂ်းၽိုၼ်လိၵ်ႈၽိုၼ်လၢႆးတႄႉတႅမ်ႈဝႆႉဝႃႈ ယႃႈမဝ်းၵမ် K ၊ Happy Water ၼႆႉတီႈတႄႉမၼ်း ပဵၼ်ယႃႈယႃသမ်းပၼ်တူဝ်သတ်း ။ ႁဵတ်းႁႂ်ႈမိင်း၊ မိုၼ် ၊ လိုမ်းတူဝ် ၸူဝ်ႈၶၢဝ်း မိူဝ်ႈၽွင်းၽႃႇတတ်း။ ယႃႈယႃၼႆႉ ပေႃးၵိၼ်ႁူမ်ႈတင်းလဝ်ႈၸိုင် တေတုမ်ႉတိူဝ်ႉပၢႆးၸႂ်၊ ဢွၵ်းဢေႃ၊ ႁူဝ်တေမဝ်းႁႅင်း၊ ႁၢၵ်ႈ၊ လိုမ်းတူဝ် ၊ ထိုင်လူႉသုမ်းသၢႆၸႂ် ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ