လုၵ်ႈဢွၼ်ႇယိင်း ဢႃယု 16  ၶူပ်ႇၵူၼ်းဝၢၼ်ႈလွႆၼွႆႉဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆး ပွတ်းၸၢၼ်း တၢႆယွၼ်ႉသျွၵ်ႉ (Shock) ယႃႈမဝ်းၵမ် ၵူၼ်းပိုၼ်ႉတီႈ တူၵ်းၸႂ်ၽေးယႃႈမဝ်းၵမ်မီးၸမ်တူဝ်။

ဝၼ်းတီႈ 21/6/2025 ယၢမ်းၵၢင်ၶမ်ႈ လုၵ်ႈဢွၼ်ႇယိင်းဢႃယုပႆႇတဵမ် 18 ၶူပ်ႇၵေႃႉၼိုင်ႈ ပဵၼ်သျွၵ်ႉတၢႆ ၽွင်းၵႂႃႇတီႈႁၢၼ်ႉမူၼ်ႈသိူဝ်းၵိၼ်ၵျေႃႇKTV ဢၼ်မီးတီႈဝၢၼ်ႈလွႆႇၼွႆႉ ၊ ၵူၼ်းပိုၼ်ႉတီႈလၢတ်ႈဝႃႈ မၼ်းၼၢင်းတၢႆယွၼ်ႉယႃႈမဝ်းၵမ် ယႃႈမိုၼ်လိုမ်း Happy Water ၵိၼ်ၼမ်လူၼ်ႉပူၼ်ႉလိူဝ်ဝႃႈၼႆ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ လုၵ်ႈဢွၼ်ႇၸိူဝ်းၼႆႉ တင်းတႆးၵေႃႉတႆးသႄႈၶဝ်ႁေ ၸူဝ်းၵၼ်ၵႂႃႇလႄႇ KTV ၼၼ်ႉၼႃႇ ၊ ပေႃးၵႂႃႇတီႈၼၼ်ႉ ၵိၼ်ၸေး လဵၼ်ႈၸေးလူး။  Happy Water ၸိူဝ်းၼႆႉ ပေႃးၵိၼ်ၼမ်ၵေႃႈ ထိုင်တၢႆၶႃႈဢိူဝ်ႈ။ မၼ်းၵိၼ်ၼမ် ပဵၼ်သျွၵ်ႉယဝ်ႉ ဢဝ်မႃးႁူင်းယႃၶႃႈဢိူဝ်ႈ။   တီႈႁူင်းယႃႇဢမ်ႇႁပ်ႉလႄႈ ၸင်ႇဢဝ်မိူဝ်းႁိူၼ်းၼၼ်ႉၼႃႇ”- ဝႃႈၼႆ ။

 လုၵ်ႈဢွၼ်ႇယိင်းဢၼ်လူႉတၢႆၵႂႃႇၼၼ်ႉ  ၸိုဝ်ႈႁွင်ႉ ၼၢင်းႁဵဝ်းငိုၼ်း ဢႃယု 16  ပီ ဢမ်ႇမီးပေႃႈယဝ်ႉ။  တိုၵ်ႉႁဵၼ်းလိၵ်ႈဝႆႉယူႇတီႈႁူင်းႁဵၼ်းၸၼ်ႉသုင် ၼႂ်းဝဵင်းမိူင်းပၼ်ႇ – လႆႈႁူႉၼင်ႇၼႆ။  

ပႃႈယိင်း ၵူၼ်းမိူင်းပၼ်ႇလၢတ်ႈၽူႈတွႆႇႁွၵ်ႈဝႃႈ – “ လုၵ်ႈဢွၼ်ႇယိင်းမိူင်းႁဝ်းၼႆႉ ၶွႆပိူၼ်ႈၵိၼ်လိူင်ႇ ၼုင်ႈလိူင်ႇ။ ၶႂ်ႈမီးငိုၼ်းၼၼ်ႉၼႃႇ ၸင်ႇဝႃႈ ၸူဝ်းၵၼ်ၵႂႃႇ KTV ။ သမ်ႉလႆႈငိုၼ်းငၢႆႈလူးတီႈၼၼ်ႈ။ လႆႈငိၼ်းဝႃႈ ၵိၼ်ၼမ်ႉ Happy Water ၵိၼ်ယႃႈမဝ်းၵမ်ၸွမ်းပေႃးလဵင်ႉၼႆႉ ၼိုင်ႈၵွၵ်းလႆႈငိုၼ်း 1 သႅၼ်ၸိူဝ်းၼႆႉလူးၵွၼ်ႇၼႆလူး။ ၵိၼ်ၵွၵ်းလဵဝ်ၵူၺ်းၵေႃႈပေႃးမီးၽေးယူႇယဝ်ႉ။ ဢၼ်ၼႆႉလႆႈငိၼ်းဝႃႈၵိၼ်ပဵၼ်လၢႆလၢႆၵွၵ်းၼႆလူင် ၸင်ႇဝႃႈ ထိုင်တီႈသျွၵ်ႉတၢႆၼၼ်ႉ။လီသေးလၢႆဢိူဝ်ႈ တိုၵ်ႉလဵၵ်ႉတိုၵ်ႉသၢဝ်။ ၵွပ်ႈၼႆ လုၵ်ႈၽႂ်လၢၼ်မၼ်း ႁႂ်ႈတူၺ်းထိုင်လီလီလႃႈ ၽေးယႃႈမဝ်းၵမ်ၼႆႉမၼ်းၸမ်တူဝ်ႁဝ်းၼႃႇယဝ်ႉ ”- ဝႃႈၼႆ။

ယႃႈ Happy Water ၼႆႉပဵၼ်ၽွင် ၊ ပဵၼ်မဵဝ်းဢၼ်ၵိၼ်တၢင်း Cocktail ၊ ၼမ်ႉ ၊ လဝ်ႈ ၸိူဝ်းၼႆႉ ။ ပေႃးၵိၼ်ယဝ်ႉ ႁဵတ်းႁႂ်ႈၵူၼ်း ဢမ်ႇႁိူဝ်ႉဢူၼ်ႈ    ဢမ်ႇၶႂ်ႈလပ်းၶႂ်ႈၼွၼ်း   ။ ၵူၺ်းၵႃႈ ပေႃးၵိၼ်ယဝ်ႉ တၵ်းလႆႈတူင်ႉတူင်ႉတိုၼ်ႇတိုၼ်ႇ ၵျွၵ်းၵျွၵ်းဝႅၼ်ဝႅၼ်ယူႇတႃႇသေႇ လိူတ်ႈၸင်ႇတေၸႅဝ်ႈ ။ ပေႃးၵိၼ်ယဝ်ႉသေ ယူႇၼိမ်ၼိမ်သမ်ႉၵူၼ်းၼႆႉတေ ၵတ်းလၢင်ႈ ၊ ၼိူဝ်ႉၼင်ၸပ်း ၊ ဢဵၼ်ၶဵင်ႈသေ လိူတ်ႈတေတုင် ။ သင်ၵိၼ်ၼမ်ပူၼ်ႉတႄႉ ၸိူင်ႉႁိုဝ်ၵေႃႈ တိုၼ်းဢမ်ႇလွတ်ႈတၢႆ – ၵူၼ်းႁူႉလွင်ႈ Happy Water ၵေႃႉၼိုင်ႈလၢတ်ႈၼင်ႇၼႆ  ။  

ၼႂ်းၽိုၼ်လိၵ်ႈၽိုၼ်လၢႆးတႄႉတႅမ်ႈဝႆႉဝႃႈ ယႃႈမဝ်းၵမ်  K  ၊ Happy Water ၼႆႉတီႈတႄႉမၼ်း ပဵၼ်ယႃႈယႃသမ်းပၼ်တူဝ်သတ်း ။  ႁဵတ်းႁႂ်ႈမိင်း၊ မိုၼ် ၊ လိုမ်းတူဝ် ၸူဝ်ႈၶၢဝ်း မိူဝ်ႈၽွင်းၽႃႇတတ်း။ ယႃႈယႃၼႆႉ ပေႃးၵိၼ်ႁူမ်ႈတင်းလဝ်ႈၸိုင် တေတုမ်ႉတိူဝ်ႉပၢႆးၸႂ်၊ ဢွၵ်းဢေႃ၊ ႁူဝ်တေမဝ်းႁႅင်း၊ ႁၢၵ်ႈ၊ လိုမ်းတူဝ် ၊ ထိုင်လူႉသုမ်းသၢႆၸႂ် ။

ဝၢႆးလင် သိုၵ်းမၢၼ်ႈယိုတ်းဢႃႇၼႃႇၸိုၼ်ႈမိူင်းမႃး တီႈဝဵင်းမိူင်းပၼ်ၼႆႉ ႁၢၼ်ႉမူၼ်ႈၵျေႃႇ KTV လႄႈ ယႃႈမဝ်းၵမ် တိူဝ်းၼမ်မႃး ႁဵတ်းႁႂ်ႈပေႃႈမႄႈ မႆႈၸႂ်တွၼ်ႈတႃႇမိူဝ်းၼႃႈ လုၵ်ႈလၢင်းၽႂ်မၼ်း ဝႃႈၼႆ ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“မိူဝ်ႈဢွၼ်တၢင်းတီႈမိူင်းပၼ်ၼႆႉ KTV ၵေႃႈဢမ်ႇမီး ၊ Happy Water ဢၼ်ဝႃႈ ၵေႃႈ ဢမ်ႇယၢမ်ႈငိၼ်း ၊ ယၢမ်ႈငိၼ်း ယႃႈၾိၼ်ႇၽိူၵ်ႇ ၊ ယႃႈမ ၸိူဝ်းၼႆႉၵူၺ်း ၊ ဝၢႆးဝၢၼ်ႈမိူင်းဢမ်ႇလီမႃးၼႆႉ လုၵ်ႈဢွၼ်ႇၵေႃႈ ၶႂ်ႈၸၢမ်းတူၺ်း ၵူႈလွင်ႈ ၊ ၵူဝ်ႇၶဝ်ႁွတ်ႈတၢင်းၽိတ်းၼႃႇ”- ဝႃႈၼႆ ။

ၵဵဝ်ႇၵပ်းလွင်ႈ ယိင်းသၢဝ်လူႉတၢႆၵႂႃႇၼႆႉၵေႃႈ ဢမ်ႇမီးၸုမ်းလႂ်ၵႄႈလိတ်ႈပၼ်သေ ႁၢၼ်ႉ မူၼ်ႈၵျေႃႇ KTV ၸိူဝ်းၼႆႉၵေႃႈ ပိုတ်ႇမိူၼ်ၵဝ်ႇဝႆႉ – ၵူၼ်းၸၢႆးပိုၼ်ႉတီႈလၢတ်ႈ ။

ယူႇတီႈၽူႈတွႆႇႁွၵ်ႈ ၶတ်းၸႂ်ႁႃမၢႆၾူၼ်းတႃႇၵပ်းသိုပ်ႇတိတ်းတေႃႇၸူးထိုင်ႁၢၼ်ႉတၢင်းၵိၼ်ၼၼ်ႉယူႇၵေႃႈ တေႃႇထိုင်ယၢမ်းလဵဝ်တႄႉ ပႆႇၵပ်းသိုပ်ႇလႆႈ။   

မိူၼ်ၼင်ႇၼႆ ၼႂ်းဝၼ်းတီႈ 17/9/2023 ၼၼ်ႉၵေႃႈ ယွၼ်ႉၸႂ်ႉသူႇသမ်းယႃႈမဝ်းၵမ် ၼမ်လႄႈ ယိင်းသၢဝ် ဢႃယု 19  ယူႇဝဵင်းမူႊၸေႊ လူႉတၢႆၵေႃႉၼိုင်ႈ လႆႈႁူႉၼင်ႇၼႆ ။