ပေႃးထိုင်မႃး လိူၼ်ဢေႃႊၵတ်ႊသ် – လိူၼ်သႅပ်ႊထႅမ်ႊပိူဝ်ႊၼႆ ၵူၼ်းမိူင်းပွတ်းထုင်ႉ ဝဵင်းမိူင်းၼၢႆး၊ မိူင်းပၼ်ႇ ဢွၼ်ၵၼ်ၶၢႆၽၵ်းမီႇႁေႃ လႆႈငိုၼ်းပဵၼ်ၵွၼ်ႈသေတႃႉ ပီၼႆႉတႄႉ ၶၼ်ၽၵ်းမီႇတူၵ်းႁႅင်းလႄႈ ႁဵတ်းႁႂ်ႈၸဝ်ႈသူၼ်ၶဝ် မီးလွင်ႈလူႉသုမ်းထူပ်းတၢင်းယၢပ်ႇၽိုတ်ႇၼမ်။

ၸဝ်ႈသူၼ်ၽၵ်းမီႇ ဝဵင်းမိူင်းပၼ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ပေႃးမိူၼ်ၼင်ႇ ပီၼႆႉတႄႉ ၵူၼ်းသိုဝ်ႉ မၼ်းၵေႃႈသုမ်း ၵူၼ်းၽုၵ်ႇမၼ်းၵေႃႈသုမ်း။ မိူဝ်ႈလဵဝ်ၼႆႉ ၶၼ်ၶၢႆမၼ်း ၽၵ်းမီႇႁေႃ ပၢၵ်ႇၸွႆႉၼႆ လႆႈသႅၼ်ၸဵတ်းမိုၼ်ႇပျႃး ဢၼ်ၼႆႉ ပဵၼ်ႁူဝ်လဵၵ်ႉမၼ်း။ ပေႃးပဵၼ်ႁူဝ်ယႂ်ႇမၼ်းတႄႉ ပၢၵ်ႇၸွႆႉၼႆ လႆႈသၢမ်သႅၼ်ပျႃး။ လႆႈၶၼ်ၵႃႈၼႆသေတႃႉၵေႃႈ သမ်ႉဢမ်ႇမီးၽႂ်သိုဝ်ႉ။ ၵူၺ်းၵႃႈ ဢၼ်တေႃႉၵေႃႈ တေႃႉယူႇတင်းဝၼ်း ယဝ်ႉၼင်ႇၵဝ်ႇ။ မၼ်းပဵၼ်ၸဝ်ႈပွႆးၸႃး (ပွဲစား) သိုဝ်ႉၶဵဝ်ဝႆႉသေ ၶဝ်မႃးတေႃႉမိူဝ်းၸိူင်ႉၼၼ်ၵူၺ်း။ ၵမ်ႈၽွင်ႈၵေႃႈ တိုၵ်ႉတေပႂ်ႉတူၺ်းၵႃႈၶၼ်မၼ်းတၢင်းၼႃႈထႅင်ႈယူႇ”- ဝႃႈၼႆ။

ပီၼႆႉ ၼွၵ်ႈလိူဝ်ၶၼ်ၽၵ်းမီႇတူၵ်းႁႅင်းယဝ်ႉ ၽွင်းၽုၵ်ႇမၼ်းသမ်ႉ လႆႈလူင်းတိုၼ်းလၢင်းၼမ်လိူဝ်ၵူႈပီလႄႈ တႃႇၸဝ်ႈသူၼ်ၶဝ်တေလႆႈၶိုၼ်းတိုၼ်းလၢင်းၵေႃႈ ယင်းပဵၼ်လွင်ႈယၢပ်ႇဝႆႉထႅင်ႈ ဢၼ်ၼိုင်ႈ။

“ဢၼ်သုမ်းတႄႉတႄႉၼႆႉ ပဵၼ်ႁဝ်းၸဝ်ႈသူၼ်ဢၼ်ၽုၵ်ႇသွမ်ႈမၼ်းၼႆႉယဝ်ႉ။ မိူဝ်ႈပီၵၢႆၼႆႉ လႆႈၶၢႆၼိုင်ႈၸွႆႉ 8 ႁဵင် ထိုင်မႃးၶၢဝ်းလိူၼ်သိပ်းၼႆႉသမ်ႉ လႆႈၶၢႆထိုင်ၼိုင်ႈမိုၼ်ႇ။ ပီၼႆႉတႄႉ ၼိုင်ႈၸွႆႉ 3 ႁဵင်ၵူၺ်း။ မိူဝ်ႈႁဝ်းလူင်းတိုၼ်းလၢင်းသမ်ႉ ႁဝ်းလႆႈသဵင်ႈငိုၼ်းၼမ်ၼႃႇ။ ၽိူင်းဢမ်ႇမီးၼႆၵေႃႈ လႆႈၵႂႃႇႁႃသိုဝ်ႉဢဝ် တၢင်းလွႆပုၼ်ႉ။ ၵႃႈလၢႆးဝၼ်း မိူဝ်ႈၽုၵ်ႇမိူဝ်ႈထူၺ်ႈၵေႃႈသမ်ႉၶိုၼ်ႈထႅင်ႈ လႆႈပၼ်ၼိုင်ႈဝၼ်း မိုၼ်ႇႁႃႈႁဵင်ထိုင် သွင်မိုၼ်ႇပျႃးၼႆႉယဝ်ႉ။ ပေႃးယဝ်ႉ ၸဵမ်ၵႃႈၾုၼ်ႇထၢတ်ႈယႃသိတ်းမၼ်းၸိူဝ်းၼႆႉၵေႃႈ ၶိုၼ်ႈထႅင်ႈဢိူဝ်ႈ။ ပီၼႆႉ လႆႈသိုဝ်ႉၼိုင်ႈထူင် သႅၼ်သွင်မိုၼ်ႇ လႆႈဝႃႈၶိုၼ်ႈပဵၼ်သွင်ပုၼ်ႈလူးၵွၼ်ႇ။ ၵွပ်ႈၼႆလႄႈ မိူၼ်ၸိူင်ႉၶႃႈၶဝ် မိူဝ်ႈလဵဝ်ၼႆႉ တႃႇတေလႆႈၶိုၼ်းတိုၼ်းလၢင်းၵူၺ်းၵေႃႈ ပေႃးပဵၼ်ယၢပ်ႇယဝ်ႉ”- ၸဝ်ႈသူၼ်ၽၵ်းမီႇႁေႃ မိူင်းၼၢႆး လၢတ်ႈတီႈၽူႈတွႆႇႁွၵ်ႈၼင်ႇၼႆ။

ၽၵ်းမီႇ ဢၼ်ၽုၵ်ႇတၢင်းမိူင်းၼၢႆး မိူင်းပၼ်ႇၼႆႉ ၵမ်ႈၼမ် လႆႈသူင်ႇၶၢႆတင်း မိူင်းထႆး။ ၵူၺ်းၵႃႈ ယၢမ်းလဵဝ် တၢင်းမိူင်းထႆး ဢမ်ႇႁပ်ႉသိုဝ်ႉ ၵူၺ်းဢမ်ႇၵႃး ၸွမ်းတႃႈၸွမ်းတၢင်းၵေႃႈ ယင်းလႆႈသႂ်ႇၶွၼ်ႇ ၸွမ်းၵဵတ်ႉလၢၼ်ႇၼမ်ႁႅင်း ၼႆယဝ်ႉ။

“ဢၼ်ၽၵ်းမီႇၶၼ်မၼ်းတူၵ်းၼႆႉ မၼ်းယူႇတီႈဝႃႈ တၢင်းၾၢႆႇဝဵင်းတႃႈၶီႈလဵၵ်းပိူၼ်ႈႁပ်ႉသိုဝ်ႉ ၸိူင်ႉၼၼ် ၵူၺ်းဢေႃႈ။ သင်ဝႃႈ တၢင်းၾၢႆႇတႃႈၶီႈလဵၵ်း − မိူင်းထႆးၼၼ်ႉ ပိူၼ်ႈႁပ်ႉသိုဝ်ႉဢိူဝ်ႈၼႆၵေႃႈ ၵႃႈၶၼ်မၼ်း တေပုင်ႈၶိုၼ်ႈမႃးၵမ်းလဵဝ်ယဝ်ႉၶႃႈ။ ၼႂ်းပီၼႆႉ ၶွၼ်ႇမၼ်းသမ်ႉတေၼမ်ၵေႃႈပႃး ၸွမ်းတႃႈၸွမ်းတၢင်း ၵဵတ်ႉလၢၼ်ႇၸိူဝ်းၼၼ်ႉၵေႃႈ ပိူၼ်ႈယွၼ်းငိုၼ်းၵျၢမ်းၼႃႇ။ လႆႈပၼ်ငိုၼ်းယူႇၵူႈတီႈ ပေႃးပဵၼ်ၸိူင်ႉၼႆ ၵူၼ်းသိုဝ်ႉမၼ်းၵေႃႈ သမ်ႉတေႁၵ်းဢဝ်ၼႂ်းၵႃႈၽၵ်းမီႇထႅင်ႈလႄႈ ၽၵ်းမီႇၼၼ်ႉၵေႃႈ ၵႃႈမၼ်းတေပေႃး လူင်းထႅင်ႈ ၼၼ်ႉၼႃႇ”- ၸဝ်ႈသူၼ်ၽၵ်းမီႇႁေႃ မိူင်းပၼ်ႇ သိုပ်ႇလၢတ်ႈၼႄၼင်ႇၼႆ။

ၽၵ်းမီႇႁေႃၼႂ်းမိူင်းတႆးၼႆႉ တႄႇၽုၵ်ႇၶၢဝ်းႁၢင်ပီ မၢင်တီႈၽုၵ်ႇၽွင်းလိူၼ် 11 လိူၼ် 12 သေ ဢွၼ်ၵၼ်ထူၺ်ႈၶၢဝ်းလိူၼ် 3 လိူၼ် 4 ၵမ်ႈၽွင်ႈ ဢဝ်ၶၢႆၵမ်းသိုဝ်ႈသေတႃႉ ၸွမ်းၼင်ႇငဝ်းလၢႆး ၶၼ်ၽၵ်းမီႇသေ ၵမ်ႈၽွင်ႈၵေႃႈ ပႂ်ႉဢဝ်ၶၢႆၼႂ်းၶၢဝ်းဝႃသႃ ၶၢဝ်းလိူၼ် 9 လိူၼ် 10 ၸိူဝ်းၼႆႉ။

ၼွၵ်ႈလိူဝ် ၸဝ်ႈသူၼ်ၽၵ်းမီႇ မိူင်းၼၢႆးတင်းဝဵင်းမိူင်းပၼ်ႇယဝ်ႉ တီႈဝဵင်းမိူင်းတူၼ်ၵေႃႈ ၸဝ်ႈသူၼ်ၽၵ်းမီႇၶဝ် လႆႈသုမ်းတိုၼ်းလၢင်းမိူၼ်ၵၼ်။ သင်ၶၼ်ၽၵ်းမီႇႁေႃဢမ်ႇပဵၼ် ၵၢၼ် တႃႇၵူၼ်းမိူင်းတေႁဵတ်းသၢင်ႈ ႁႃၵိၼ်လဵင်ႉတွင်ႉမိူဝ်းၼႃႈ ယင်းတေထူပ်းလွင်ႈယၢပ်ႇလၢႆပိူင်လႄႈ ၸဝ်ႈသူၼ်ၶဝ်ဢွၼ်ၵၼ် မုင်ႈမွင်း ႁႂ်ႈၾၢႆႇလူင်ပွင်ၸိုင်ႈ ၸွႆႈၵႄႈလိတ်ႈပၼ် လွင်ႈၵၢၼ်ၵႃႉၶၢႆ ၶူဝ်းၽုၵ်ႇသွမ်ႈ ၸိူဝ်းၼႆႉ ဝႃႈၼႆ။