ၾူၼ်တူၵ်းဢမ်ႇထၢတ်ႇ ႁဵတ်းႁႂ်ႈ ၼမ်ႉႁူၺ်ႈ/ လွႆ ထူမ်ႈသူၼ်ႁႆႈၼႃး  ႁိူၼ်းယေး ၵူၼ်းဝၢၼ်ႈ ၼႂ်းၸႄႈဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း ။

မိူဝ်ႈၼႆႉဝၼ်းတီႈ 17/7/2025  ယၢမ်းၵၢင်ၸဝ်ႉ 1 မူင်းပၢႆ ၽွင်းၼွၼ်းလပ်းဝၢၼ်  ၼမ်ႉပၼ်ႇၵိုင်ႉၵၢင်ႉၼွင်းထူမ်ႈဝၢၼ်ႈပႃႇၶႃး ၊ ဝၢၼ်ႈႁူဝ်ဝဵင်း ၊ ဝၢၼ်ႈႁူဝ်ၾၢႆလူင် ၊ ဝၢၼ်ႈမႂ်ႇ လႄႈ သူၼ်ႁႆႈတူင်ႈၼႃး ၵူၼ်းမိူင်း ႁဵတ်းႁႂ်ႈၵူၼ်းပိုၼ်ႉတီႈ ၵိုင်ႉၵၢင်ႉလႆႈ တေႃႉၶူဝ်းၶွင်ဝႆႉတီႈသုင်   ။

ၸၢႆးၸၢႆး ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၼႂ်ၼႆႉၵၢင်ၼႂ် 1 မူင်းၼမ်ႉၵိုင်ႉၵၢင်ႉၶိုၼ်ႈ ၼႂ်းသူၼ်ၼႂ်းဝၢၼ်ႈ ၊ မိူဝ်ႈၼမ်ႉတေထူမ်ႈၼၼ်ႉ သၢႆၾူၼ်း MPT ၶၢတ်ႇၵႂႃႇ ၵမ်းၼိုင်ႈ ၊ ဢွၼ်ၵၼ်ၵိုင်ႉၵၢင်ႉလႆႈၶၢႆႉရူတ်ႉၶၢႆႉၵႃး  ၶၢႆႉၶိူဝ်းၶွင်ၸိူဝ်းၼႆႉ လႆႈတေႃႉဝႆႉတီႈသုင် တၢင်းၶမ်ႈတၢင်းၶိုၼ်းဢေႃႈ”- ဝႃႈၼႆ ။

ၼမ်ႉၼွင်းထူမ်ႈႁႅင်းၼႆႉပဵၼ်ၼႂ်းဝၢၼ်ႈ ႁူဝ်ၾၢႆလူင် လႄႈ ဝၢၼ်ႈမႂ်ႇ ။ ပေႃးၾူၼ်တူၵ်းဢမ်ႇထၢတ်ႇၸိူင်ႉၼႆ  ၼမ်ႉၵိုင်ႉၵၢင်ႉၼွင်းၸိူင်ႉၼႆယူႇၵူႈပီ၊ ၵွပ်ႈၼႆ ၸဝ်ႈသူၼ်ၸဝ်ႈၼႃးၵူၼ်းပိုၼ်ႉတီႈ ႁႂ်ႈဢွၼ်ၵၼ်ၾၢင်ႉၵႂႃႇမႃး ၊ ၶူဝ်းၶွင်ဢၼ်မီးၵႃႈၶၼ်ႁႂ်ႈၵဵပ်းဝႆႉတီႈသုင် တီႈလွတ်ႈၽေး ဝႃႈၼႆ ။

ၸၢႆးၸၢႆး လၢတ်ႈၽူႈတွႆႇႁွၵ်ႈဝႃႈ -“ ပီၼႆႉ ၼမ်ႉထူမ်ႉၼႆႉ ပဵၼ်ပွၵ်ႈဢွၼ်တၢင်းသုတ်းယဝ်ႉ ၼိုင်ႈပီၼိုင်ႈပွၵ်ႈ ၼမ်ႉၵႆႉထူမ်ႈယူႇ။  ၶၢဝ်းၾူၼ်ၼႆႉယွၼ်ႉၼမ်ႉၵိုင်ႉၵၢင်ႉထူမ်ႈလႄႈ ပေႃးၾူၼ်တူၵ်းဢမ်ႇထၢတ်ႇၼႆႉ ယႃႇယူႇမဝ်မၢင်ၵၼ် ”- ဝႃႈၼႆ ။ 

ဝဵင်းမိူင်းပၼ်ႇ ၼႃႈတီႈ RCSS တူင်ႉၼိုင်ၵုမ်းၵမ်ၼႆႉ – ၼင်ႇႁိုဝ်လွင်ႈၼမ်ႉထူမ်ႈတေဢမ်ႇပဵၼ်ႁၢဝ်ႈႁႅင်းၼၼ်ႉ ယူႇတီႈ RCSS  ၵေႃႈ လူင်းပိုၼ်ႉတီ လၢင်းပၼ်ႁွင်ႈၼမ်ႉ ၵေးၼမ်ႉပၼ်ႇယူႇ၊ ၸူဝ်းတင်းၸဝ်ႈႁႆႈၸဝ်ႈၼႃးသေ ၵႂႃႇတူၺ်းပၼ်တီႈႁူဝ်ၼမ်ႉပၼ်ႇယူႇၼႆၵူၼ်းပိုၼ်ႉတီလၢတ်ႈထႅင်ႈၼင်ႇၼႆ။

လွင်ႈၼမ်ႉၵိုင်ႉၵၢင်ႉၼွင်းၶမ်ႈဝႃးၼႆႉ  ပီႈယိင်း ၵူၼ်းမိူင်းပၼ်ႇ လၢတ်ႈဝႃႈ -“ၾူၼ်မႃးဢမ်ႇ ပေႃးႁႃယႂ်ႇၵႃႈႁိုဝ် ၊ မိူင်းပၼ်ႇၼႆႉ ဢမ်ႇၸႂ်ႈဝႃႈၾူၼ်တူၵ်းဢၼ်လဵဝ်၊ ပေႃးၼမ်ႉၶူင်း ၼမ်ႉၵႄးတၢင်ႇဢၼ်ယိုင်ႈၵေႃႈ ၼမ်ႉၵႆႉၵိုင်ႉၵၢင်ႉၼွင်းထူမ်ႈၸိူင်ႉၼႆ။   မိူဝ်ႈပီၵၢႆၵေႃႈ ၼမ်ႉထူမ်ႈႁၢဝ်ႈႁႅင်းလႄႈ ၸဝ်ႈသူၼ် ၸဝ်ႈၼႃးလူႉသုမ်းတင်းၼမ်”- ဝႃႈၼႆ ။

မိူၼ်ၼႆ ၼႂ်းဝၼ်းတီႈ 16/7/2025 ၵေႃႈယွၼ်ႉၾူၼ်တူၵ်းထပ်းၵၼ် ဢမ်ႇထၢတ်ႇလႄႈ ႁဵတ်းႁႂ်ႈ ၼမ်ႉတဵင်းၼွင်းလူၼ်ႉၾင်ႇ ၼမ်ႉထူမ်ႈၼႂ်းပွၵ်ႉၼႂ်းဝၢၼ်ႈ ၵူၼ်းမိူင်းဝဵင်းၵဵင်းတွင်း ။ ၵူၼ်းလၢင်းၶိူဝ်းၾၢင်ႉၵၼ်ဝႆႉဝႃႈ – ပေႃးၼမ်ႉထူမ်ႈတီႈၵဵင်းတွင်း -ဢမ်ႇႁိုင်သင်တေထိုင်လၢင်းၶိူဝ်းလႄႈ ၵူၼ်းယူႇႁိမ်းၾင်ႇၼမ်ႉတဵင်းႁႂ်ႈဢွၼ်ၵၼ်ၾၢင်ႉၵဵပ်းၶူဝ်းၶွင်ဢၼ်လမ်ႇလွင်ႈဝႆႉ – ဝႃႈၼႆ။

တီႈဝဵင်းမိူင်းသၢတ်ႇသမ်ႉ ၼႂ်းဝၼ်းတီႈ 15/7/2025  ၾူၼ်တူၵ်းဢမ်ႇထၢတ်ႇ ၼမ်ႉႁူၺ်ႈ ၼမ်ႉလွႆၼွင်း လႄႈ ၶူဝ်ဢၼ်မီးတီႈဝၢၼ်ႈ ၼမ်ႉၵျၢမ်း လူႉၵွႆၵႂႃႇ ယၢမ်းလဵဝ်သဵၼ်ႈတၢင်းၶၢတ်ႇ ၵူၼ်းပိုၼ်ႉတီႈဢမ်ႇၸၢင်ႈ ၵႂႃႇမႃး ဝႃႈၼႆ ။

ၽွင်းပီၵၢႆ 2024 ၼႂ်းလိူၼ် September  ၼမ်ႉထူမ်ႈၼမ်ႉၼွင်းပတ်းပိုၼ်ႉမိူင်းမၢၼ်ႈမိူင်းတႆးႁၢဝ်ႈႁႅင်းသုတ်းၼႂ်းပိုၼ်းၼၼ်ႉ ၵူၼ်းမိူင်းလူႉသုမ်းၶူဝ်းၶွင်ႁိူၼ်းယေးလႄႈမၢၵ်ႇၶဝ်ႈတဝ်ႈၼမ်ႉၼမ်။ မၢင်တီႈ လူႉသုမ်းသၢႆၸႂ် တၢႆယွၼ်ႉၼမ်ႉထူမ်ႈၵေႃႈမီး။ မၢင်ဝၢၼ်ႈမၢင်ႁိူၼ်း တေႃႇထိုင်ယၢမ်းလဵဝ်ယင်းပႆႇလႆႈပူၵ်းပွင်ႁိူၼ်းယေးၶိုၼ်း။  ႁဵတ်းႁႂ်ႈၵူၼ်းမိူင်းတႆး တူၵ်းၸႂ်သေ ၾၢင်ႉတူဝ်ဝႆႉယူႇတင်းပီ။ ပီၼႆႉၵေႃႈ ၾူၼ်တိုၵ်ႉတူၵ်းဢိတ်းဢွတ်းၵူၺ်း ဢွၼ်ၵၼ်ၾၢင်ႉတူဝ်ဝႆႉယူႇယဝ်ႉ- ၵူၼ်းမိူင်းမိူင်းၵိုင်- လၢႆးၶႃႈ –  ၵဵင်းတွင်း- လၢင်းၶိူဝ်းဢၼ်ယူႇၸမ်ၾင်ႇၼမ်ႉတဵင်းလၢတ်ႈ။